|
هل هو اوهام ، او وسواس ، واي تسمية افضل؟
السلام للجميع ، وثانكس على هل منتدى الرائع ، اللي يفتح ابواب لكل من يعاني حالات نفسية.
آنه صارلي من عمري 21 ولهذا اليوم حالات اسردهه لكم بالتفصيل :
1) ياتلي مرة وحده وساوس اني مصاب بالايدز بس كانت على خفيف ، وكل يوم تعجبت من روحي زيادة اشفيني وليش اول مرة اركز في موضوع صارله 7 سنوات امسويه( العلاقة الجنسي) فحصت روحي 3 مرات والحمد لله مافيني شي ، بس الفكرة بعد ظلت اتراودني بس بدون شيقة خلق( بدون اكتئاب) ، مرة وحده وآنه قمت من النوم في يوم من الايام حسيت اني غير عن امس ، شعور غريب ، ضيقة خلق ، كأني سأموت ، موعارف شنو فيني ، ومن يومها تميت 3 ايام على الفراش كل يوم اتمنى اني اكون في كابوس واقوم عادي ، بس ليس كل مايتمناه المرء يدركه ، وفي اليوم الثالث صديقي نصحني يقول روح حق مستشار نفسي اهمه يعرفون شنو سالفتك وهذي شغلهم . رحت حق دكتور سألني اشفيك رديت عليه وقلت له شنو فيني والقصة كاملة قاللي في ( اكتئاب ) وكل انسان في مرحلة من حياته من زيادة الضغوط اتصيدة هل سالفة ، عاد عطاني كيلو حبوب وقاللي تعال بعد اسبوعين.
رحت حق هل دكتور بعد اسبوعين الا غيروه؟ صارت دكتورة بدل دكتور ، المهم قلتلهه اني على موعد مع دكتور ، قالت لي اهيه مكانه لان اهو سافر ، عاد عقب اسألتهه سوتلي مرض يديد اتسميه وسواس قهري ، عاد آنه ماعجبني الاسم (ليش خلصوا الاسامي؟؟. المهم تميت فترة اراجعهه ماكانت اتسوي لي شي ، بس ادوية في ادوية بدون كلام او حجي لين اقنعتني ان فيني وسواس قهري ، ومن يومهه لهل يوم كل مرة اتييلي افكار يديدة وسيناريوهات يديدة ، مرة في العقيدة وفي اشياء ثانية ، لين وصلتلي فكرة اني اوسوس اني ما استحق اني اتزوج وغير صالح للزواج ، اتعرفون ليش ، لاني اول شي خنت زوجتي في الماضي ( فكرة غبية ومثالية زيادة عن اللزوم ) ، والفكرة الثانية اني اشلون باقول حق خطيبتي اذا خطبت اني وسواسي / مع ان الواحد لين يسمع فكرتي يضحك علي ويقول لي ماعندك سالفة ، بس واليوم خفت الفكرة لاني احاول اقنع نفسي ان كل انسان فيه نقاط ضعف.
المهم ، حبيت افضفض معاكم ، وابين لكم ان الدكاترة نظرتهم سطحية للامور ، اي وسوسة على طول قالوا وسواس قهري ، واذا متضايق على طول اكتئاب ، وهذي الاسامي اتضايق الواحد ترى لانه يحس انه غير سوي ، ياما ناس عاشت بدون ما تفكر بهل امور ويتوكلون على الله لان اهوه الشافي.
الدكتور لو لم يقل اني مصاب بوسواس قهري لاصبحت الان احسن حالا .
وعندي نقطة ، مثلا لو تم تسميتها اوهام او خيالات افضل من تسمية وسواس والا اشرايكم؟
وتحياتي
|