|
تعبت من العطاء -_-" ولا استطيع ان احب
السلام عليكم
يعطيكم العافيه اول شئ جميعا
ويجازيكم خير على الافاده الطيبه سواء في ردودكم او حتى بمواضيعكم ومقالاتكم الي تكتبونها
ما اعرف وين ابتدي الصراحه
انا تربيت في بيت ما شفت فيه اي علاقه حب او حتى علاقه طيبه بين اب وام
ومب بس في البيت في المحيط العائلي والاقارب بعد
كان الجو من واحنا صغار >>> ما نطلع الكلمه والراي إذا قلناه او اي سالفه نسولف فيها نندم عليها لانها تنقلب ضدنا وانا اهني اتكلم عن الوالد الله يحفظه
العصبيه والكلام والشتايم القوييييه ما وقفت من ليله زواجه ليومكم
وامي صابره عليه ومتحمله تحت شعار" الصبر مفتاح الفرج..الريّال بيعدله الزواج والعيال..والزوجه مهما صار مالها الا بيت زوجها"
فاصبرت بس مافي تغير للأسف
وعشنا طفولتنا على الضرب والصراخ لدرجه اني انا بالذات كنت عرضه للإصابه بمرض التوحد كفاكم الشر.. ومن صوره " الرجل الزوج" الي عشت عليها في البيت واشوفها من الرجال في العايله" وبيني وبينكم انا ما اسميهم رجال اصلا..لان المرجله مب في التقوّي على الجنس الناعم.زولا اسميها حتى طفوله!" كرهت فكره الزواج وقمت اقول حتى اخواني الصغار الله يرحمهم على طيبتهم وياي كنت اقول اكيد مستقبلا بيصيرون نفس ابوي .. ويقطعون فيني وبامهم نفسه ابوي واخوانه واهله.. ودايما تجيني الله يعزكم لوعه وعصبيه لما اشوف واحد يقول كلام حلو حق وحده في برنامج او مسلسل او شئ ..واقول في نفسي .."الريّال ما يقول هالكلام إلا علشان غريزته الحيوانيه ويعفس مخ البنت (وهاي الصح) ولا اساسا اهم مالهم مشاعر من هالنوع...والتحقير والمعامله الزفته جايه بعدين".. ودايما اعد قصص الحب شئ خيالي تماما يمكن يكون من تأليف وحده تبي تحس بهالشئ لكن طبعا مستحيل... فتعبر عنه وترضي نفسها وحاجاتها عن طريق كتابه هالاشياء وترضي حاجات غيرها الي يقرون هالقصص والكلام الحلو"
ومع الوقت من خلال المنتديات وغيرها تعرفت "وندمت" على اشكال وايد كان معرفتي فيهم بالنت بس... وكنا وايد نتناقش بامور الحياه وهالشغلات وحاولوا يقنعوني بعكس الي كنت افكر فيه
وانجرفت نحو علاقات إلكترونيه يمكن بعضها وصل لمرحله اني اتكلم بالجوال .. لكني ندمانه قد شعر راسي
لاني اكتشفت بعد ما تعبت قلبي وياهم ان كلامي صح.. ومحد كفو
وطبعا لو فكروا البنات زين كان لاحظوا ان الوحده ما تاخذ من اي واحد تتعرف عليه الا الكلام .. والكلام مثل التراب ..
" وانا كذا... وبصير كذا.. وبسوي كذا... وانتي بالنسبه لي كذا ..و ..و...و"
لكن بعد التعب وخساره القلب .. وبعد ما شفت الدنيا على حقيقتها صح وعلى قوله وحده عندي " عقلت وصرت هاديه " ولعبت بمشاعري وفقدت إمكانيه اني احب
تقدم شخص لخطبتي "زواج تقليدي"من نفس العيله لكن من بعيد وامه من دوله خليجيه ثانيه وعاش معاها يقولون بره اكثر من معيشته اهني
صار خلاف بين امي وابوي كالعاده بخصوص الموضوع خاصتا اني اول وحده اتزوج مع اني الاصغر.. فتركت الموضوع لهم ووافقوا"يمكن يبون الفكه مني ..من يدري"
والريّال ما شفته ليومج مع ان الملجه هاليومين.. ولا ادري عنه شئ
وحتى يوم طرشت اكثر من شخص يسألون لي عنه كلهم قالوا فيه الخير و حليو .. وهادي وكذا.. لكن اشلون اصدقهم ؟؟؟... يمكن يكون نفس ابوي؟... بره البيت غير "جدام الناس" وجدامنا العكس تماما؟....اخاف مصيري يصير نفس امي الي ابوي يضربها ويهاوشها ويسبها سب واهناااااااات من ليله العرس!!...
ولو قلت بتفائل خير وبنطر لين العرس واحكم عليه حزتها بعدين اشلون ارجع؟؟ ماخلاص صرت زوجته ؟؟..
وهل صح اني اسكت واصبر؟؟... ولا ارد بطريقه محترمه من اول ما يرفع صوته علي..المهم اني احط رد من اول فعل له قصدي؟.. ولا شلون؟؟..
وصديقاتي وبنات من اهلي "الي مش متزوجات"يكلموني عن الحب وخرابيطه .. وانا الصراحه ما ابي احط اي تفكير ايجابي او اي امل في طبيعه علاقتي وياه علشان ما انصدم بعدين وانجرح زياده على الي فيني لاني وصلت لحد ما قمت احب فيه احد واتعامل بشكل عادي ومزح بس مع الي حوالي ..
وما اقدر اعطي او احب حاليا الا الاطفال وصغار السن من العائله الي اعدهم حسبه عيالي واغلبهم دون ال11 سنه
... فإيش رايكم ....
وتقبلوا مني الشكر الجزيل على إلتفاتكم لموضوعي الطويل
|