|
وليدي .....وعصابة الاربعين ...
...........قصه واقعيه وتجربة ام حقيقيه ..:D
عندي وليد شاق الارض .. متجمعه فيه خصال مختلفه ...ذكي جدا لكنه جبان
داهيه ياخذ اللي يبي من اللي يجي على باله
قوي البنيه ...قولوا ماشالله :rolleyes: لكنه يخاف من ظلله
رجه اذا حط في راسه شي لازم يسويه وان شاف العين الحاره مني والا من ابوه جانا يمثل علينا كل براءة العالم
يبتسم لنا ويحب الايدين والراس والخشم ويقصد فينا كلام حلو الين ينسينا الزعل;)
على فكره هو دايم مبتسم ولو ياكل مية علقه والا فقشه ..........تلاقونه مبتسم
نسيت اقول لكم ان عمره خمس سنين وشوي.
وليدي فيه ميزه حليوه ...ثرثاااااااااااااار وكلامه كثير ..وهذي الميزه هي اللي تكشف لي بلاويه
واحده من بلاويه واللي عرفتها من ثرثرته ...........هي
اكتشفت انه مسوي فيها وطواط ..خفاش الليل ..لو بينزل للبقاله ..
يتسحب مثل الحراميه عن طريق البدروم ...اللي هو مواقف للسيارات
ما اخفيكم ...قهرني وسويت معاه تحقيق بوليسي على كيف كيفكم ابي اعرف السبب
لكنه يتهرب مني اجيه من هنا يلف الموضوع من هنا .....طولت بالي عليه الى اخر قطره .
واخيرا قررت استخدم وسائل التعذيب وهددته با الكرسي الكهربائي :D
يوم شاف المساله وصلت للجد اعترف لي وهو لابس قناع البراءه والمسكنه
وقال لي ان اصحابه مسوين عليه عصبه وكل ما نزل يطاردونه ...........
هو مسوي فيها بريء وانا ادري انه اكيد متقيشر عليهم وماذيهم والا ما يحقدون عليه كل ها الحقد .
وحتى يسلم منهم ولا يشوفونه اذا نزل للبقاله لقى الحل الوحيد انه يروح عن طريق مواقف السيارات ..
لا تنسون اللي اسولف لكم عنه ...........وليدي
الموضوع شغلني كثير وحزنت لوليدي الشجاع ;) واحترت في التصرف السليم
ولا ودي اقسى عليه واقوي الخوف عنده ..............
ففكرت ..ثم فكرت
الى ان وصلت الى حل سلمي يرضي جميع الاطراف :D
قلت له شوف بكره العصر انزل لا اصحابك وقول لهم حياكم الله عشاكم عندي الليله .............يؤؤؤؤؤؤؤ
قصدي قول لهم تراني بسوي حفله فيها العاب وفيها هدايا ومسابقات اللي يبي يجي الله محييه بعد بكره
طالعني بدهاء .....وقال
---- يمى لو تنزلين انتي معاي وتعزمينهم بنفسك ترى احسن واشيك :D
ذابحه الخوف لكن كبرياءه مانعه يقولها صريحه ....وقليبي ما طاوعني سويت نفسي مصدقته
نزلت معاه وعزمت اصحابه وحددنا الوقت واليوم والساعه
وسويت لهم حفله شاي:D قصدي حفله لعب وضحك وهدايا ومسابقات ..................وسويت منهم عصابه وقلت لهم كلكم ابطال واقوياء وبنسميكم عصابة المعموره بس هاااااااا لا تخلون اي غريب يدخل بينكم واعطيتهم عصابه خضراء دليل للسلام يحطونها على جباههم وكانت حفله حلييييييييييييوه
كل حرامي فيها قصدي كل طفل فيها انتفخ وصار يشوف نفسه بطل ووليدي منهم
انتهت الحفله ...وكل وليد اخذ هديته راح لبيتهم طاير من الفرحه
وصاروا وش حليلهم وصار وليدي حبيبهم يدورون عليه كل ساعه
بسسسسسسسسسس
مر على ها القصه يمكن عشرة ايام ................الليله وليدي راح للبقاله عن طريق البدروم
الظاهر خوياه يبون حفله ثانيه .....
:D
ها الولد يذكرني برابيت الارنب اللي في افلام الكرتون
ارنب لكن ذيب ما يقدر عليه الا اللي خلقه .
وش رايكم اسوي له حفله ثانيه :eek:
|