تعبانة عن جد تعبانة
ابي اهرب اروح مكان بعيد عن البيت
للأسف ما أقدر اسوي هالشي لأني مو بفيلم اجنبي
اعيش في واقع صعب ومهلك وهذا الصيف كان اكره صيف عشته في حياتي
محد يفهمني
تعبت من النجرة والهواش طول اليوم

لما كنت صغيرة ما كنت احس ان امي تحبني كانت دايما تهاوشني وتهزئني جدام الكل وجدام صديقاتي لدرجة اني قمت ما اعزمهم في البيت واخلي خط فاصل في علاقتي معاهم
للحين اخاف اعزم صديقاتي في البيت ما ادري شنو راح يصير
حتى لما اطلع معاهم لما احد يتصل من البيت اتكلم واني ميتة من الخوف.. اخاف يسمعون شيقولون لي
مرة انحرجت حدي وصرت الوان لأن اختي اتصلت فيني وقامت تصارخ عليي
من وجه صديقتي حسيت انها سمعت لصراخ

لما كنت في الاعدادي(المتوسط) قررت اني ادرس برة عشان انعم بالحرية وفي خاطري كنت اقول عشان افتك من بيتنا
خصوصا بعد ما اتقاعد ابوي وصار يتصرف بغرابة وصار اهو وامي دايما يتهاوشون
ساعات اقوم واسكر الباب بقوة عشان يفهمو اني ما اقدر اتحملهم وهم يتهاوشون وصار لكل واحد غرفته الخاصة فيه!!!

الحين انا ادرس برة وراح اتخرج جريب ان شاء الله
ساعات احس ان الغربة رحمة عشان ابتعد عن الجو اللي كله شحنات متنافرة
لما جرب الغربة كانت شي رهيب وما زالت بس خفت شوي صرت ما اشتاق لبيتنا وايد على الرغم اني كنت ابجي طول اليوم في اول سنة لي في الغربة
مهما يكون احب اهلي واشتاق لهم
بس تصرفاتهم معاي تخليني احس ان حبي لهم يقل وانا ما ابيه يقل

في الغربة كل البنات اللي معاي اهلهم يدزون لهم مسجات طول اليوم ويقولوا لهم كل الاخبار اما انا فعادي ايام ما اسمع منهم شي
دايما اقول لهم دزوا لي مسجات ما ابيكم تتصلون كل يوم ما راح تكلفكم شي
علما ان عندي اخوان وخوات وااااااااااااااااااااااايد
بعكس اللي معاي اكثر وحدة عندها 5 او 6

وفي بعض اخواني ما اسمع لهم صوت طالما انا في الغربة

عن جد ما ادري شسوي
الناس حاسدينا ان احنا وايد ونتجمع في الويك اند بس احنا نتجمع بالهواش كل اسبوع في احد يتهاوش

ما ادري شقول بعد بس عن جد انا تعبانة

في الغربة بعد اعيش صراع الحب من طرف واحد وما ادري شعوره نحوي شنو وكتبت من قبل مشكلتي
احس ان الموت هو الحل لمشكلتي ماراح انتحر لا تخافون بس انا انتظر الموت