|
بقينا نسوي حادث بالسيارة بسبب جرادة !!!
صباح الخيرر عالجميع ......وكل عام والاحبة من اعضاء نفساني بخير وبصحة وسلامه
<> < > نكتة العيد السنة <> <>
الله يسلمكم القصه والحمدلله ذيك الايام ماكان فيه بلوتوث والا جوالات بو كاميرا كان رحنا فيها خخخخخ ونشروها ليومنا هذا !
الحقيقه كنا نازلييييييييين بالاحساء نشم هواء ونشوف اهلي والغوالي ونسامر معهم ونضحك ونتغدى ونتعشى لمدة اربعة ايام
....بعد الوناسه والاستمتاع في بيوتهم رحنا لمزرعة خالي الوحيد وطبعا كان فيها ليمون وطماطم وفجل ونخيل وبركة سباحه ....الخ ،، الكل حب السباحه الا انا طبعاً قلت : اسفه مامعي ملابس تغيييييير <<< اساسا تعمدت اقول كذا لاني معرف السباحه ليش افشل عمري قدامهم !
المهم بعد ماخلصنا وودعناهم توكلنا على الله وركبنا السيارة ، ففوجئت انه مع عبدالله جرادة في علبه !!!!!! طبعاً صرت اقول : ياااااااااايي ويش ذا  ...ليش جايبها ومن عطاك اياها ،،يالله ارميها من النافذه تولي خخخخ .. رفض عبدالله يسمع كلامي ، قالي ابوه : ويش عليك منه ، اهي في علبه مسكره ..يعني ماراح تاكلك . فقلت له : شوف شكلها تثير الاشمئزاز حقيقه !
قال ابوه : احد طلب رايك عاد اشمئزاز والا عود مزاز ..لما نوصل احرقيها اشويها اوارميها سوي اللي تبيه تراك بطيتي راسي مسويه نفسك عايشه بفيلا وبنت ملوك وماقط عمرك شفتي جرادة ....قلت له : امبلى شفت بس ماحب اقرب من الحشرات ولا الحيوانات
حاجه " تقرف " صار يتضحك ويقول : ابي اسوي حديقة جراد في البيت عشان اذا عصبتيني والا ضايقتيني بشيء برميك عليهم ، طبعا ضحكت ضحكة بسخريه وقلت له: تبي تسوي دمك خفيف ! وفر كلامك احسن لك ..... وبين ماكنا نسولف مع بعض .....الا سمعنا عبدالله يصرخ : الجرادة طارت ......بابا  ،، فصار ابوه يهدي فيه ويقوله : اسكت ياعيون بابا تراها قدام.. جنب ارجول امك ! مالقيت نفسي الا نافضه هدومي وشلت السيارة من الصراخ ودموعي اربع اربع كني مضروبه ضرب او احد جالدني بخشبه وبحديده ! .....فارتبك ابو عبدالله وصار يقولي : ويش فيك استخفيتي تراها جرادة ماهي فيل ، اجل لو تشوفين اسد ويش تسوين !! ...صرت اصرخ وانا مغمضه عيوني : يمه شيلهااااا .." فلان " شيلها ..يمه بمووووووووت ....والا احسن لك وقف السياره ابي انزل ! ...صار ابو عبدالله يتضحك ويقول " ويش تنزلين فيه ؟؟! " اقول الله يثبت عقلك ....كل ذه خوف من الجراده ! ..ترى شكل" السكان" حق السياره بينكسر وماني عارف كيف اسوق من صراخك ؟! ....طالعي ولدك ويش حلاته ويش زينه هادىء ومحارب بنفس الوقت وقلبه قووووووي.. ويضحك عليكي << والمصيبه مسويه نفسك مسترجله وماتخافي من شي ابد !!
،، اضطر أخيرا ً انه يوقف السياره ويصفطها على جنب ،، ونفض كلشي من السياره ومالقى حاجه ، وانا اقوله : دور عدل ترى ماني راكبه بالسياره والا اقولك وقف سيارة تاكسي او اي سياره قال ابو عبدالله : شوفي اذا بتركبين اهلا وسهلا والا روحي بيت اهلش مشي << صج عطيتك وجه زيادة !!
المهم انجبرت اركب السيارة وانا فيني الغليقه وكل ما حسيت بشي يتحرك صرت انقز واصرخ ،، حتى انه عبدالله رمى النعال حقه جنبنا لانه تعب منا ويبي ينام ،، ومالقيت نفسي الا ماسكه قلبي واقول : يمه شكلي بمووووووت وربي ....ابو عبدالله ترى جد حرارتي مرتفعه صابني هبوط في الدم والدورة الدمويه ! ،، قال ابو عبدالله : أهدي ويش فيك ترى والله مالقيت شي بالسياره ،، ويوم قلت انها جنب ارجولك كنت امزح معك ،،،قلت له : طيب متى راح نوصل ؟! ..ترى ودني على الاسعاف فورا احس نبضاتي مو طبيعيه ،، وصج رحنا عالمستشفى وبعد الفحص اتضح انه الضغط مرتفع جداً ويلزمني الراحه 3 ايام ،المهم رحنا البيت واكيد اخذيت دش ونمت نومة الكهف من بعد اليوم الكئيب !
|