السلام عليكم ورحمه الله وبركاته
تحيه طيبه للجميع
بصراحة أنا عندي مشكله وحبيت أعرضها عليكم لكي تفيدوني في الطريقة السليمة لحلها .
أنا معلمه ورائده فصل أول ثانوي ....... البنات عندي مشاغبات وجريئات لأبعد حد ومعروفين بهذا من يوم كانوا بالمتوسط
ما تتخيلون بين الحصص ما يجلسون لازم يطلعون خارج الفصل .... ويا ليت كذا وبس كان مو مشكله بس المشكلة أنهم يسوون زيارات بين الحصص للفصل الثاني والفصول الأخرى اللي فيها زميلاتهم ويتمشون في الاسياب ويروحون بعدها لدورات المياه هروباً من المعلمات وليس خوفاً منهم ليجلسوا مع بعضهم أطول فتره ممكنه
وهذا حال طالبات المدرسة كلها تجي المعلمة للفصل ما تلقى أحد كلهم طالعين بلا استثناء تقعد تطارد فيهم لحد ما يجتمعون وحجتهم في ذلك أنهم زهقوا من جلسة الفصل وأنهم لالالازم يطلعون !!!!!
بالأضافه إلى أنهم داخل الفصل وأثناء الدرس مستحيل يجلسون هاديين لازم يتحركون إلا يتكلمون وإلا يردون على المعلمه والا والا والا أشكال والوان من ها الحركات غير ضعف مستواهم وكسالتهم
أنا أول مره أجي للمدرسه وانصدمت منهم وتعبت نفسياً من اللي شفته خصوصاً أني متعوده أشرح في حصتي وكل البنات منتبهين ومندمجين معي في الحصه ..... وأطلع منها وأنا راضيه عن نفسي وأني أديت واجبي
في هالمدرسه أدخل عليهم وأنا حازمه وشديده شوي مع ذلك أعصب على الفاضي وأصرخ وألا ما أصرخ لاحياه لمن تنادي ويمكن يزيدون ويعاندون بعد .
أسأل المعلمات هل يستخدمون ها الاسلوب معكم وها الحركات وأنتم تشرحون قالوا أثناء الدرس يكونون هاديين وغيره لا !!!!
قلت أكيد السبب تصرفي معهم وأني دايم أعصب عليهم
بصراحه أنا انصدمت من ها البنات وما عمري شرحت عند ناس بها الشكل لذلك أستغربت الجو .
وفيه نقطه ثانيه أني إذا شرحت ما أحب ولا وحده تحرك أو تصير مشغوله بشي ولازم تنظر لي وللسبوره يعني لازم لازم تنتبه وتستوعب وإلا ما أحس أني أديت واجبي أبداً وما أكون راضيه عن نفسي خصوصاً أن مادتي فيها عملي ونظري .........هل أنا على حق فب هذا أما لا ؟
بعدها قالوا أني رائده لفصلهم أول شئ حزنت وشلون أبضبطهم وهم أصلاً ما ينظبطون داخل الحصه ؟؟؟؟؟؟؟
فقررت أني أغير أسلوبي معهم وطريقتي في الحوار بدل ما أكون شديده أكون لينه معهم شوي صارحتهم بسلوكهم وأخذت وعطيت معهم .......ما تصدقون مجرد ما تكلمت على طول صاروا يبررون كأنهم كانوا مكبوتين وأنا عطيتهم الفرصه أنهم يفرغون الي بداخلهم
وقالوا أن المعلمات يعاملونا بقسوه من يوم كنا في المتوسط وأن كل وحده تدخل تقعد تهزئ فينا ووووووو الخ من ها الكلام .... وهم فعلاً أعترفوا بأنهم مشاغبات وجريئات .
وأتفقت معهم أنهم لازم يتغيرون عشان المدرسه كلها تعرف أن أول ثانوي تغيروا كلياً للأفضل ..... وصرت أمدحهم وأقول أنكم أصلاً ممتازات وأنكم طاقه المفروض المدرسه تستغلها وأنا فعلاً صادقه .
في النهايه وافقوا وقلت راح اكلم المعلمات وأقولهم أن أول ثانوي تغيروا فلازم تغيرون معاملتكم معهم وحولت النقاش بيني وبينهم لتحدي بين الطالبات والمعلمات لانهم معروفين في ها السن بحب التحدي ..... وفعلاً لاحظ أنه عندهم رغيه قويه للتغيير والدليل أسبوع كامل الكل يمدحهم ..... صحيح فيه حالات بسيطه بس المهم أن أغلبهم كان متجاوب معي
وبعد أسبوع وعلى حصتي أنفجروا تغيروا لدرجه أني ما كملت الدرس ولا دخلتهم المعمل نتيجه تصرفهم وفي النهايه قالوا أنا كنا مكبوتيين وانفجرنا في حصتك لانك رائده الفصل .
بصراحه فيه بنات كانوا زعلانين من تصرف زميلاتهم ؟؟؟!!!!!
تركتهم بعدها وعلى الاسبوع اللي بعده لاحظت أنهم يرجعون زي أول يعني مشاغبات وعلى حصتي العملي جننوني صوتي راح من كثر ما أصرخ يافلانه أنتبهي يافلانه ركزي ومع ذلك مافيه فايده .... بالاضافه أني لاحظت أنه قل أحترامهم لي يعني يتأففون إذا شافوني أصرخ عليهم ويردون علي وبعضهم تعطيني نظرات وهي متكئه على الكرس وكأنها حاقرتني ...........
كل هذا علشاني عطيتهم وجه وخليتهم يفضفضون اااااااااااااااااااه تعبت والله تعبت منهم
قررت بعدها ما أكلمهم ولا أعطيهم وجه !!!!!!!!!!!!
بس المشكله أني أبغى أغيرهم عندي رغبه قويه تدفعني لذلك خصوصاً أني قلت لهم أنكم لازم تفوزون في المسابقه لأحسن الفصل وأني مصره على ها الفوز كدافع لهم على ذلك .....بالأضافه اني أحس أنه فيهم خير كثير وأني مسئوله عنهم عند ربي !!!!!!!
والحين وش الحل معهم والله تعبت ها الكلمه طالعه من قلبي أنا ماني ناقصه الي فيني مكفيني
والله أني أجي للبيت وصوتي رايح فيها وما أقدر أتكلم ولا أكل وعندي قولون عصبي ومتعبني
قولولي وشلون أضبطهم في حصتي درجات ما نفعت معهم ولاعقاب ولاتهزيئ ولا الاداره اتخذت كل الاساليب مانفع
وشلون أخليهم يركزون معي هذا أول شئ ؟؟؟؟؟؟؟
بصراحه صرت أشك بنفسي وقدراتي وأني ما أعرف أشرح وأني(طرطوره )عندهم والله صار تفكيري كذا خصوصاً أني أسمع أن المعلمات جادات معهم وأنهم ما يبتسمون معهم أبداً ما أدري هل علشانهم متعودين على ها الطالبات من زمان أو أن المشكله فيني أنا!!!
أما عن نفسي فأنا جاده في الحصه .... صحيح أني أعطي أبتسامات حفيفه في الحصه لموقف معين يستدعي الضحك أو اني أعلق على طالبه معينه تعليق يضحك فيضحكون زميلاتها وأنا أبتسم فقط ....... يمكن يكون هذا السبب ؟؟؟
إذا كان هذا السبب وش الحل أنا أنسانه ابتسامتي على وجهي دايم وأحب أضحك لان الضحك مفقود في بيتنا فدايم الابتسامه في وجهي مع أنها ما تعبر عن اللي بداخلي حتى فيه مواقف ماتستدعي الابتسامه تلقوني ابتسم !!!!!!!!!!!!!
وأخيراً وشلون أشجعهم وأخليهم بدلاً من أن يكونوا مشاغبات أخليهم مؤدبات ؟ أو على الاقل أغير من سلوكهم شوي
أدري أني حساسه بزياده ويمكن أكبر من المشكله بس ها الحسسيه الزايده تعبتني كرهت المدرسه وكل شي وش الحل
ملاحظه طالبات المدرسه جميعهم بهذا الشكل ولكن هذا الفصل بزياده !!!!!
قولوا لي وشلون أخليهم يحترموني أكثر ووشلون أعرف شخصياتهم وطريقه تفكيرهم ؟؟؟!!!
أدري طولت وجبت لكم المشكله كامله بس مالي ألا الله ثم أنتم محد يسمعني وأن سمعوني سمعوني مجامله ولا أحد يهتم!!!!!!
فيه طالبه منهم قريبتي وبين أهلنا مشاكل والطالبه تعاندني بشكل ملحوظ !!!
أبغى أحد يهتم على الاقل مو علشاني علشان ها الطالبات الي المفروض نساعدهم وياليت أحد الاساتذه الكرام يعطيني تعليق على كل هذا ويتابع معي ها القضيه؟
أرجوكم لاتهملون الموضوع
الموضوع فعلاً حساس ويمس شريحه كبيره من هالمجتمع
أرجــــــــــــوكـــــــم