مساء الورد :
هذى الشروط من المشرف العام لأحد المواقع المشهورة بعد ان جاءته حالة من الطفش من كثر مشاكل الأعضاء والموقع ,,
**********************************
لقد تغيرت شروط التسجيل في المنتدى ....وتم تغيير مسمى المنتديات لتواكب مرحلة ما بعد الحرب الباردة
اعرفوا الشروط زين....وافهموها....واللي ما يبي هالشروط جعل اصبيعاته اللي طقت على الكيبورد للكسر...ولو ما عليه كلافه يطق راسه باقرب جدار....حنا ما نلعب....واللي يبينا حياه الله بيننا....فهمتوا .
بما أن هذا الموقع موقعي لحالي لابارك الله في العد وفي الساعة اللي فتحت لكم هالموقع....فاللي يبي يسجل معنا يوافق على الشروط من ورى خشمه ....والشروط هي كالتالي ...
1- اللي يسب اي واحد من الاعضاء نبي نجيه وبنربط حواجبه في صدامات الهايلكس وبنروح ونطعس فيه باقرب طعس...همني قايلكم حنا ما نلعب .
2- لما تكتب موضوع خل البقيه يجون ويتميلحون ويتهاوشون بس بحدود وخلهم يذبون براحتهم.....واللي بيقلبها سب...عز الله ان امه داعيه عليه...لاني ابحتريه وقت صلاة الفجر بالحجر وابشخمط وجه وابخليه يغني اغنية...خروفي خروفي لابس بدله صوفي...له عينين واربع رجلين...من كثر ما امحطه بالحجره .همني قايلكم حنا ما نلعب.
3- اللي بيخربط بالدين ولا بالسياسه....هذا عذابه عذاب ابخليه يتخيل انه قرد ولا عمره ذاق موز....وابحجز له على اقرب رحله على طياره ترش الجراد وابرقى فيه على ارتفاع 50000 الف قدم وابرميه على خوص نخله...علشان ما يتعود لها همني قايلكم حنا ما نلعب .
4- انتم اعضاء لكم تكتبون بس....ولااحد فيكم يسوي لي فيه مراقب مانبي مراقبين.....فهمتوا ولا افهمكم...
5- الساحه الرياضيه لكم ثنتين...واللي ماهو هلالي لايوطوط فيها ساحة ابو جدي وانا حر فيها ولا عندنا ديمقراطيه....ولا عمرنا سمعنا فيها وهي وشهي...هي الديمقراطيه حاجه تنوكل ..
6- مسموح الذب...والذب هي كلمه اتيه من الذباب وهي فعل مضارع جمع تكسير مضارع بسيط...فهمتوا...صح ولا ماهو صح...قولوا صح لابارك الله في العدوين ...واللي بيزعل من الذب بنخربط وجهه ونخليه يطالع في المرايه ويطلع الاخطاء التسعه عشر....ايه تسعطعش...ساحتنا وحنا حرين فيها ...
7- ياويلك ويا سواد ليلك لو تعطي احد كلمة الضروس....إلا عندي سؤال ليه سموها كلمة سر...ليه ما سموها كلمة خشم ولا ضرس ولا مصران احول قصدي اعور.....طبعا قايلكم ساحتنا وحنا حرين فيها ...
8- اللي بيسجل باسماء مخله بالادب....هذا بنوديه لا اقرب شيخ وبنكويه ..وبعدين بناخذه لا اقرب بير ...وبنغطسه وبنطلعه...ونغطسه ونطلعه الين ماهي خلف ألين ..مايقول....اشهد ان الددسن سياره...واشهد ان الاقلاع ما هو بالشطاره ولا بالمصاله.....الاقلاع فن .اقول لا تكثر بربستكم يا هوووه..وش هالمسكه الغلط...همني قايلكم ما نلعب...
9- قريتوا الشروط........هاه عجبتكم....فهمتوها...طيب ما عندنا تسجيل هالايام....واللي يبي يسجل معنا يرسل لي ايميل على التلفون حقي اللي ماني ذاكره لكم...لان الدعوه عناد...واللي براسه حب ما انطحن....تراي ابطحنه له....واذا فيه خير يقابلني وين ما بغى عند الصمان ولا ديراب ولا بالشرقيه ولا باي محل....
10- كلنا عيال قريه وكلن يعرف خيه...
11- همني قايلكم حنا ما نلعب
الان اسماء المنتديات بعد التعديل :-
* منتدى شخبط وخمبق ترى محد لمك.....المنتدى العام سابقا
* منتدى شاعر في المشمش......المنتدى الشعري سابقا
* منتدى مواضيع مهناش احد.....منتدى المواضيع الجاده سابقا
* منتدى معاهم معاهم عليهم عليهم....المنتدى الرياضي سابقا
* منتدى ياهلال ياهلال كخ كخ....منتدى الهلاليين سابقا
* منتدى كن صديقي.....منتدى المواضيع المتميزه
بالنسبه للبريد ان شاء الله في السنه الجايه زي هالحزه ما حنا حاطينه كخخخخخخخخخخخ....ماعندنا
بالنسبه للمحادثات....إن كان ودكم نسوي لنا طلعة بر على الطبيعه ازين...
ملاحظه......
اللي بنكتشف انه رجال مشورب ويكتب باسماء اناثي...ولا اناثي تكتب باسماء رجاليه هذولي بنخلي خششهم كلمات متقاطعه يصعب حلها.....والله ما يضرب بعصا يا سرع طيحتهم ...
موافق ( )
غير موافق ( )
تحياتي : سمية القحطاني
( الموضوع أكيد أكيد أكيد منقول بس مغيرة بعض الألفاض ما تناسب رقي منتدانا :) ) .