|
)))((( أبــو وجـهــيـــــــن )))(((
بسم الله الرحمن الرحيم
السلام عليكم ورحمة الله وبركاته
قال صلى الله عليه وسلم : ( إن شر الناس ذو الوجهين الذي يأتي هؤلاء بوجه وهؤلاء بوجه)
أيها الكرام ..
أضع بين يديكم هذه القصيدة ، والتي تتحدث عن صفة ذميمة ، وما دفعني لكتابتها هو إنتشار هذه الصفه بين الناس ، كتبتها ناصحاً و محذراً و مذكراً ..
ياناس أنـا محتـار أبغـى إجابـه
وقت(ن) غدينا نشوف فيه التهاويل
حنا بزمـن يانـاس كلـه غرابـه
واليوم أنا غرقان وسـط التخاييـل
ياناس (أبو وجهين) جـاب الكآبـه
أردى فعول الرجال هذي الأفاعيـل
اليوم (أبو وجهين) يقـرا خطابـه
وبكرة اسأله وش قال ينفي الأقاويل
واليوم (أبو وجهين) يكتـب كتابـه
وبكرة هكالمكتوب عنـده مجاهيـل
هو يحسب ان الناس سكان غابـه
وإلا غنم سرّاح وسـط المحاصيـل
ترى اللعب بالنـاس ماهـو نجابـه
لا يحسب ان الناس شلـة مهابيـل
قولوا ل(أبو وجهين) فعلـه خرابـه
ماهي يا(بو وجهين) سلوم الرجاجيل
هو يحسب ان العمر دايـم شبابـه
مايدري ان الوقت أسرع من الخيل
مايدري ان المـوت مفتـوح بابـه
وياما دخل هالباب جيل(ن) باثر جيل
عزي ل(أبو وجهين) لاجا حسابـه
يوم الحساب تضيع ذيـك التآويـل
واللي ضحك بالناس يلقـى عذابـه
تشهد عليه إيديه وترميـه للويـل
لكن يا(بـو وجهيـن) قـدّم إنابـه
اتبع طريق الحق واعدل عن الميل
لاواهني من عاش مثـل الصحابـه
يلقى السعد قدّام وأمـره تساهيـل
سامي لـ (أبو وجهين) هالقاف جابه
وصلوا على المختار خير المراسيل
اللهم صل وسلم على محمد
أخوكم/سامي الشمري
3/1/1428 هـ
|