متأمله خير

بيانات اضافيه [ + ]

رقم العضوية : 9050  تاريخ التسجيل :  07 2005  أخر زيارة : 21-02-2009 (07:25 AM)  المشاركات : 18 [ + ]  التقييم :  10

لوني المفضل : Cadetblue

ماعنده اتزان انفعالي

السلام عليكم ورحمة الله
انا سعيده بإني اطرح مشكلتي بها المنتدى الراقي وأرجو من الله إنكم بعونه تساعدوني في حلها :


عندي ابن من صغره وهو ماعنده اتزان انفعالي
يحب يلفت الانتباه دايماً بصرخه بحركه بأي طريقه المهم الناس تلتفت له
سريع الحركات وكثير الالتفات
وايد يسرح وماينتبه مع إنه في بداية دخوله للمدرسه كان متفوق وكان الطالب المثالي لكنه بعدها صار متوسط بس ينجح
سريع في كلامه ولما يتكلم مايعرف يوصل للنقطه الأساسيه بسهوله بعض الأحيان
لمايبرر موقف أوسلوك نلومه عليه أنا ووالده يجيب تبريرات تكون ضده مش معاه
يحب الأكشن ودايماً يدخل البيت أو يبدا اتصاله بإثاره وكأن حاصله مصيبه
يحب يبيّن إنه في مواقف المشاده مع الناس وقّفهم عند حدهم وسيطر على الموقف بهواش بسلاطة اللسان.مع إنه ولله مؤدب عموماً بس يعصب بسرعه

بيئة الولد :
هو الإبن الأول وعمره الحين عشرين سنه ويشتغل ولله الحمد وعلى وشك زواج بإذن الله
عنده إخوان وخوات أصغر طبعاً وهو يغير من إخوه الأصغر لأنه هادي وملتزم ويلقى التقدير من الغير أكثر منه
..علاقة والده به من الصغر علاقه جافه إلى حدما وكان يلومه ويعاقبه أكثر الأحيان لأنه عصبي بطبعه ( الوالد )
علاقتي به عاديه يتخللها الحب والرعايه بس لما كان صغير ويتشاقى أحياناً مانتحمله
الحاله الماديه ميسوره ولله الحمد
إذا فيه تفاصيل تحبون تعرفونها لأهميتها مستعده بس أشوف اهتمامكم قبل من فضلكم

سؤالي :
مع هالعرض السريع هل هالأعراض تعتبر مرض أو مشكله نفسيه ؟
وهل تحتاج وقفه وحل ولجوء لعياده ؟

الصراحه آنا دايماً أختلف مع والده ( بدون علمه طبعاّ ) بإنها مشكله ووالده يقول إنتي تبالغين الولد طبيعي
أرجو مساعدتكم لأني قلقه عليه الله يحفظكم ويجزيكم كل خير ياااااااااااااااااااااااارب

المصدر: نفساني