نفساني - عرض مشاركة واحدة

06-06-2008, 02:39 AM

السلام عليكم ورحمة الله وبركاته

كيفكم جميعا

انا بقولكم وضعي وانتم عطوني الحل

انا انسانه انطوائيه
ما احب اطلع للناس وانا قبل ماكان فيني شي كنت اطلع اتغشمر اقول نكت

ما ادري وش صارلي
صرت ما اعرف اتكلم
اذا احد سالني عن شغله اتلعثم انسى ولساني يصير ثقييل
ثقافتي انعدمت

صرت بالجلسات اكثر وقتي ساكته واوزع ابتسامات
والله صرت اكره نفسي

كل ماجيت افكر احاول اكون صداقات اطلع للناس للعالم الخارجي
اتراجع في دقائق
صارت ثقتي بنفسي شبه معدومه
انا ودي اسولف اتكلم
افضفض باللي بداخلي بس اقسم بالله عجزت
شريت كتب تتعلق بحالتي
بس بدون فائده اقرا صفحتين واقول خرابيط يعني ما اطبق اللي مكتوب

وانا فيني شغله يمكن تكون سبب من اسباب نفسيتي
فيني شعر كثيف في وجهي الحمدلله والشكر على كل حال واحمد ربي ان زوجي متفهم..يعني اذا وحده قالتلي كانه شعر رجال خلاااص زي ماتقول اكره اقرب من الانسانه هذي ونفسيتي تزييد..
اتمنى انكم تفهمو كلامي

واذا تنصحوني بطبيب نفسي بالرياض
بكون ممنونه لكم
والله انا استفدت منكم كثيير

بس ابي حل لمشكلتي

واذا فيه حل كيف ازيد من ثقافتي لان القراءه ما احبها
والمجتمع اللي حولي مثقفين اجتماعيين عشان كذا صرت احس بعجز في داخلي اني اتغير رغم انو المفروض العكس

وهل تعتقدوون ان الفراغ سبب لوجود النفسيه لان عندي فرااغ كبير
يعني ودي اكمل دراستي الثانويه ادخل الجامعه بس احطم نفسي..ما ادري واعذروني على الاطاله

وانا متوكله على الله اولا ثم عليكم

والحمدلله على كل حال ..

أختكم/أم لين

المصدر: نفساني