|
ادخلو تكـــــفون محتاجتلكم ..
السلام عليكم ورحمة الله وبركاته ،/
أبيكم تقرون قصتي وتوجهوني بالذات البنات الله يخليكم أنا محتاجه لأحد يسمعني
لاتطنشون . .
أولاً أنا أعيش في بيت مع امي وابوي واخواني طبعاً واخوي المتزوج وزوجته واولاده
بس من يوم وانا صغيره عمري ما حسيت بالراحه لاني كنت اشوف امي دايم مظلومه
من كل الجهات سواء من أبوي ولا أخواني أو من الناس اللي برى لان هي مرره طيبه
والناس مايحترمونها وهالشي اثر فيني وفي نفسيتي ..
تصير لي مواقف بالحياه انظلم من يوم انا صغيره وابي احد يساعدني ولا ع الاقل
يوجهني ويقولي شلون اتصرف بس للأسف كنت لما اقول لامي احس بالخوف زياده
واسكت ولا آخذ حقي لان امي ماتقدر تساعدني ولا توقف معاي . .
مثلا وحده من الحريم الكبار احرجتني ولا غلطت علي مفروض امي تكلمها وتوقفها عن
حدها بس للاسف امي شخصيتها ضعيفه تسكت ولاترد بكلمه وهالشي ورثته منها او حتى بالمدرسه كانو
كثير مرات يغلطون علي بس ما اقول لامي لاني اعرف انها ماراح تتفاعل معي
كانت تصير معي مصايب بس اسكت وابلعها وابوي اخاف منه ولا اقدر اكلمه وامي طيييييبه
ولا احب اقولها شي لاني اعرفها حساسه واللي فيها كافيها ما تتحمل . .
دايم أشوف الناس يستحقرونا أنا وامي لانا هاديات واغلب الوقت ساكتين يعني كأن مالنا
وجود وابوي دايم ينقدنا واحسه يكرهنا من طبعنا ويفشلنا قدام الناس . .
اتعس اللحظات عندي لما تكون العايله .. متجمعه الناس بالعاده يكونون مستنانسين ومبسوطين
أما أنا لا لان اخوي الكبير اشوف امي تكلمه وهو مايرد عليها والله احس قلبي بيتقطع على
أمي أما زوجته مره يحترمها وعامل لها الف حساب رغم انها تغلط على امي ومقصره في بيتها
ولاهي جميله ولا متعلمه بس حظ سبحان الله . .
وحتى ابوي نفسه مره يحبها كانها هي بنته مو انا مع انها والله مثل ماقلت مافيها شي ملفت
حتى كلامها وارائها بايخه بس تتكلم كثير على غير سنع . .
وفيه مرات كثيره يكونون ابوي واخوي موجودين بيسوون عزيمه او شي ماياخذون رأي امي
ولا يكلمونها بس يسألون زوجة اخوي واشوف امي ساكته ومرات تنفعل بس ابوي مافيه قلبه رحمه
يسكتها ويرد عليها ويسبها والله لو انه حجر يوجه لها الكلام كان انتحر كلامه جارح بمعنى
الكلمه ولا فكر فينا احنا اولاده ولافي مشاعرنا وكيف راح نتاثر واللي يقهر أكثر ان زوجة اخوي وكالة
انباء اي شي يصير في بيتنا وتسمعه اليوم الثاني
كل اللي بالديره عارفين حتى تتكلم عني تقول مره ما تكلم اخوها
ولاابوها تخاف منهم وتجلس تتشمت فيني كله ذا يصير من ورانا وحتى
امي ما تقصر معها صرت احس كل الناس ما يطيقونا ولا احب اطلع عند أحد وصرت انطوائيه كثير
وخجوله ولا اعرف آخذ حقي لاني تربيتي من الاساس من اول ما فتحت
عيني ماحسيت اني عايشه في اسره سويه ، ،
من يوم عمري ثلاث
سنوات وانا حاسه بهالشي . . عشان كذا من يوم ما انا صغيره احس اني تافه ولا لي فايده
عند الناس اما من جوا كان عندي قدرات وفيني ذكاء بس ضغف الثقه والخوف
حرمني من اشياء كثيره . .
من زمان وانا اشوف امي مثل الشغاله بالبيت تقوم بدري وتسوي كل شي وتنظف
وتسمح وتكوي وتغسل وتطبخ وعيالها كثييير وفوق كذا متحمله عيال ولدها ولا عندها
مانع تخدمهم بعد وابوي برضوه من النوع اللي يتشرط ويتحكم فيها مره كل شي
يبيه على مزاجه حتى لو سوت الشي اللي بيبه لازم يهاوشها كذا يفرغ فيها
ودايم تجي عندنا عزايم وامي ماشاء الله اللي يشوف شغلها ما يصدق
انه هذي بس مره وحده اللي سوته والله ما ابالغ فيها طاقات كبيره ماشاء الله الله يحفظها
وكانت تحاول ترضي ابوي باي شكل ما انكر انه كثير يمدحها ،، بس وربي مايجي المدح
الا من بعد مايغسل شراعها قبل ما يجون الناس .. حتى كانت تقولي لما كانت حامل
فيني بالشهر التاسع ابوي سوا عزيمه وقالت اني تعبانه مره ما اقدر اطبخ ولا استقبل
احد قام ابوي هاوشها يقول انتي عدوانيه ما تحبين الناس -أنا اتوقع ان امي ما كانت
طبيعتها كذا من اول بس ابوي مره حطمها - المهم بعدها واقفت وعزمهم ابوي وطبعا
امي لازم تطبخ بالبيت واخواني كثير واشقياء مره ووراء بعض
كل ما تنظف من جهه يحوسون من جهه ثانيه وما كان عندها شغاله واللي عزمهم عشر
عوائل أخوي يقول لما كنت صغير اتذكر دخلت على امي وكانت بتطيح وتمسكت
بالدولاب وجلست تقرا قران شوي وبعدها شالت القهوه وراحت عن الحريم حطتها ورجعت
المطبخ تكمل طبخ وهي باين عليها تعباااانه مره واليوم الثاني جابتني وليت ابوي يقدر . . لا زعل عليها لاني بنت
ولا حس على نفسه ولا انبه ضميره انه كرفها وهي مريضه . .
<< والله حاسه نفسي ما اقدر اكتب وافكاري متلخبطه لاني نفسيتي هاللحظات زفت
من اللي اشوفه فكرت كثير انتحر بس عندي إيمان بالله . .
اكمـل ::
أمي بعد ماتقدر تطلب من ابوي فلوس لانه طبعا راح يهاوشها وانا بعد ما اقدر اطلبه شي
كنت انحرم كثييير مع انه مبسوط مره وخيره على الناس اشوف عماتي وبناتهم
لما يروح عندهم يجيب لهم هدايا مكلفه واحسه يحبهم ويعاملهم بأحترام مو مثلي أنا
إذا جيت وشافني كأنه شاف حمار عنده وإذا جسلت يضربني على ظهري وانا ازعل
شي طبيعي بس يقول اعوذ بالله من طبعنا ( يقصد انا وامي ما نتحمل شي )
مرات يقولي انتي وامك بالشكل حلوات لكن انكم اغبياء وبقر .. مره يقهر
مرات ودي اذبحه مع اني احبه بس ما احد حطمني بالحياة انا وامي الا هو
وزجته اخوي ياما سوت لنا بلاوي ومصايب وحرقت قلوبنا بس والله مدري وش
اكتب وش اخلي :: اللي يقهرني بالموضوع:: انو لا انا ولا امي نقدر نتكلم
ولا نعارض أحد وحقنا يروح من قدامنا واحنا ساكتين بس بالاخير ننقهر ..
والحين السنتين الاخيره البيت اللي ساكنين فيه بيت ابوي هو مرره كبير
بس كتبه بأسم اخوي يقوله هذا بيتك .!! واحنا اذا تبينا نجلس
معك جلسنا واذا تبينا نروح رحنا عشان ما نضايقك بمره هو يحب اخوي وزوجته
بس مو لدرجه يعطيهم بيته واحنا مالنا بيت حتى ماشاور امي المهم اخوي
وزوجته بس يجاملون ابوي يقولون لا احنا مانقدر نستغني عنكم طبعا ( لان امي خدامه عندهم
واولادهم دايم عندنا وهم نايمين ومرتاحين ) حتى مصروف البيت والاكل امي اللي تصرف
من فلوسها من الاعياد وهم مع ان عندهم شقه بس يجون ياكلون معنا وليتهم يقدرونها..
والحين بعد ماصار البيت باسم اخوي صار شايف نفسه علينا وحتى على امه
ويحسسنا ان احنا مالنا بيت زي الطرارين ساكنين معهم وزوجته بعد
تبي تغير بأثاث البيت كأن هي صاحبته واحنا نقدر نتكلم آآآآآآآخ يالقهر ..
وانا صاير علي ضغط مره وصرت دايم جالسه بالغرفه اللي زوجة اخوي حاسدتني عليها
تقولها انها كبيره علي *~* هي لو على كيفها تطردنا بالشارع المهم
امي دايم مشغوله ولا اسولف معها كثير وابوي اخاف منه وهو مايطيقني ولا اكلمه
واخواني ما يعطوني وجه ابداً .. وانا بغرفتي تقريبا لما كان عمري 16 دخلت الشات وتعرفت
على ولد بالبدايه كنت خايفه منه بس صار شي عادي بعدين لاني لقيت عنده
الحب والحنان اللي فاقدته من كل الناس اللي اعرفهم .. والله اني بعد ماعرفته ساعدني اني
اطلع من الانطواء اللي انا فيه وصارت شخصيتي احسن بكثيييير عن أول وصار فيني ثقه بنفسي
يعني علاقاتي تحسنت بالناس اللي برا وصرت اجتماعيه بي الحال بالبيت
نفس ماهو ..
لاني حسيت انه في انسان متهم فيني هالشعور روعه حسيت بالحياه لأول مره بحياتي
وانا كنت عارفه ان هالشي غلط وانه في إساءه لاهلي ولابوي واخواني ..
بس والله انا افكرت فيها قلت عاد هو وش نفعني فيه ماغير يحطمني من اول ما
عرفت نفسي وحارمني من التمشيات بس محبوسه بالبيت انا عدد اخواني سبعه وانا اعرف
هالشي يعتبر مصيبه عند الشباب بالذات بالسعوديه بس وربي أنه هم غلطو
علي اكثر من الغلط اللي سويته انا مهمشيني دايم وحارمني من ابسط حقوقي يفكرون
ما عندي احساس ..
بس الفتره الاخيره تبت عشان الوالده اللي يحفظها جلست تقول لي كلام وتنصحني
بالقران والاذكار واني ابتعد عن المعاصي فاظطريت اني الغي علاقتي بالولد
اللي احبه مع اني والله قلبي مو مطاوعني وقلت له وهو ما استوعب واقنعته
وبالاخير اقتنع بس الحين حياتي مالها طعم ابد ... من بعده خلاص احس اني رجعت مثل
اول الله يعيين بس
ادري ان كلامي ملخبط وكثير وافكاري مشتته بس من اللي فيني بس محبوسه بين اربع حيطان
والله لو ماهو حرام ولو ماعندي دين ولو مو الغاليه موجوده كان سويت اشياء تطلعني من
اللي انا فيه
انا الحين ابي احد يحس فيني ويقولي شلون اتصرف مع أبوي واخوي وزوجة اخوي والناس كلهم
ومع انا نفسي انا كيف اعالجها ومع امي
والله ييعينكم علي ..
وودي اكمل اقول مشاكلي اللي اعانيها
هالفتره بس بعدين إذا احد عطاني وجه
|