نفساني - عرض مشاركة واحدة

14-09-2002, 02:07 PM

السلام عليكم يا جماعة الربع
احكي لكم قصتي والرجاء منكم افادتي ومساعدتي
انا ياجماعة عندي صديقات بالهبل والحمدلله على هذه النعمة ادري ان فيه منهم ما عندهم سالفة بس الاغلبية بنات محترمات وعلى قدر كبير من العقل الراجح
طيب بس وش المشكلة ؟؟؟؟؟ ايه
فيه كم وحدة من المقربات جدا باطين تسبدي ولا ادري وشلون اتصرف( معهن
المشكلة ان وحدة منهم متزوجة من آل ...........والاثنتين الاخريات ما عليهم زود
وكلهم يجتمعون في خصلة واحدة انهم مسوين ثقل ولا مدري وش الوضع .....يعني اذا حبينا نجتمع وتواعدنا في مكان ولا في بيت وحدة من الشلة ما يجون الا اخر ناس يعني اذا بغينا نسري لبيوتنا مهيب مرة ولا مرتين كان نقول ظروف الا دايم كذا ..................حسيت انهم مسخوها وحاولنا نطنشهم ,نكلمهم ما فيه فايدة.......
بعد ما رجعت من السفر كلموني وقالو يا فلانه ودنا نشوف بعض وبعد مشاورات ومحادثات على وين نجتمع قررنا ما هو ات اننا نجتمع في مطعم في احد المجمعات التجارية الساعة السابعة ............وبالفعل اختكم في الله من كثر ماهي مشتاقة لهم حاولت انها تكون جاهزة على الوقت ,وصار السواق مو موجود قال زوجي انا اوديك على طريقي وارجع اخذك وبالفعل رحت وانتصيت في ذاك المجمع من الساعة سبعه وكلمتهم ولا احد يرد على جوالاتهم وكل شوي ادق لا نه ما جيت للسوق عشان انطق فيه, ولا انا توني جايه من السفر والاسواق طالعه من خشمي لكن الشوق(امحق بنات مو كفو) ,المهم الظاهر انهم افتشلوا من مكالماتي وكل وحدة تقولي ان هنا ابنزلك الحين والثانيه تقول انا عند مدخل السوق وانتظر انا يالمسيكينه ولا لهم اي غبرة , وكل اشوي اهدي في نفسي الين ما عاد قدرت وكلمتهم قلت لهم يا تجون الحين ولا ابطلع .......... وحدة قالت انا عند المحل القريب من المطعم والثانية اكتشفت انها رايحة تقص شعر شغالتها (شف الفراغة) وتوها تبي تجي .............اية وش سويت ..عطيت كل وحدة فرصة خمس دقايق عشان ما اقول اني تسرعت فس تصرفي اللي بيصير بعد شوي........طيب طيب باقولكم خلوني اكمل ......رحت وتعوذت من ابليس وقام دق علي زوجي :هاه متى تبيني اجي قلت له على راحتك ..قال ربع ساعة واصير عندك قلت طيب ........... وش سويت؟؟؟؟؟؟؟؟
اتصلت وحدة منهم بعد ساعة ونصف وقالت انت وينك وانهدت علي وين رحتي هماك تنتظرينا من اليوم .........قلت الجمدلله انك قلتيها بنفسك اني انتظر المشتاقات لي .............لكن انا اسفة انا طلعت من السوق وراجعه للبيت واكتشفت انكم مشتاقين للسوق اكثر مني يالمخفة (اللي هي انا )واذا كنتم تبون السوق ليش نتواعد فيه لكن الشرهة علي, على بالي انكم تعدلتوا وصرتوا تقدرون اللي يشتاق لكم ويالله مع السلامة ................هذا الكلام موجه لصاحبتي آل..
والثانية قامت تكلم على جوالي كم مرة بس اني ما رديت عليها وجاء زوجي ورحنا للبيت وانا مقتنعه ان اللي سويته صح ...........
والحين صار لنا حوالي اسبوعين ولا احد كلم احد
وتوتا توتا خلصت الحدوته ........
وش رايكم الحين ياليت تقولون لي عشان اعرف اللي سويته صح ولا .......ادري طولت عليكم بس فعلا محتارة لانهم بنات طيبات وحبوبات ولا ودي اخسرهم
عاد لا تبخلون بردكم علي
:( :2:

المصدر: نفساني