نفساني - عرض مشاركة واحدة

07-12-2008, 04:49 PM

السلام عليكم ..

اسعد الله اوقاتكم بالمسرات .. وكل سنه وانتو طيبين

عندي صديقتي من الثانوي ..

انا وياها كنا الثنائي المرح في الثانوي وكان عندناا قصص وذكريات رائعه

صديقتي احبها واتمنى لها كل خير .. وربي العالم بهالشي

لما خلصنا المرحله الثانويه .. انتقلنا للمرحله الجامعيه .. كل وحده راحت تخصص .. صح تفرقنا عن بعض .. لكن قلوبنا كانت مع بعض ..

صح انشغلنا شوي عن بعض .. لكن ربي العالم اني اعتبرها من أعز صديقاتي ..

صديقتي تمر بظروف سيئه عند أهلها .. كانت احيانا تفضفض لي ..

في الجامعه تعرضت لإنتكاسات .. حبت بنت حب جنوني .. كانت علاقتها بهالبنت علاقه قويه .. من بعد ما حبت صديقتي هالبنت احس شخصيتها تغيرت

كنت احس ان حبها للبنت فيه غلط .. كانت متعلقه فيها بشكل كبير حب موب حب صداقه لا يعني تغار عليها لو كلمت احد .. لما تمر قدامها تجلس تحب تطالع فيها ..

لما كانت صديقتي تقول لي هالكلام ما كنت اقول لها شي كنت اسمعها بس كنت استغرب هالحب

بعد فتره صارت مشكله بينهم كبيره كلمتني صديقتي منهاره .. بديت اتكلم وضحت لها أن اصلا هالشي غلط .. وان هالبنت اللي فهمته منها كانت تستغلها .. يعني تكلمها تكمل لها ملازمها وصديقتي عيبها طيبتها القويه .. المهم قلت لصديقتي هات رقم البنت اتفاهم معها

كلمت البنت وقلت لها ان الشي اللي يسوونه غلط مافيه حب بين البنات كذا واخذت كلامي معها على اساس نصيحه ..

سكرت السماعه وكلمت صديقتي ولما قلت لها الكلام جن جنونها ..

كانت تقول لي والله لا أوريك خير تقولين لها هذا غلط وبتندمين

انصدمت من كلام صديقتي وسكرت وقلت خلاص انا اللي علي سويته عشان صديقتي وماراح اتدخل مره ثانيه ..

جلست فتره ما اكلمها بعدين هي كلمتني وتتعذر وانها كانت غلطانه

وقالت لي انها بدت تكتشف ان البنت كذاااابه وانها كذبت عليها بأشياء من ضمنها انها كانت تقول لها انها متزوجه وما طلعت متزوجه وانها حامل وانها واخر شي ما طلع ولا شي ..

حمدت الله ان صديقتي عرفت ان اللي تسويه غلط وهي بعد اقتنعت بهالشي وتركته

صديقتي تخرجت من الجامعه .. صارت مدرسه بمدرسه أهليه ..

احها تغيرت شخصيتها .. صارت كل ما تكلمني تقول لي انها ضحيه وان كل الناس يستغلونها كل قصصها كذا

مع اقاربها وقريباتها انهم يستغلونها وهي ما تقدر تتحرك

في مدرستها كل المدرسات يستغلونها ويكرهونها وهي ما تقدر تسوي شي

لما اسمع صديقتي اقتنع بكلامها ولما اسمع مواقفها اتألم معها .. لكن لما اسكر اجلس افكر هل كل العالم اشرار وصديقتي طيبه ؟؟

مدري احس من بعد الجامعه تغيرت صارت اي دور تمثل فيه دور المسكينه وان اللي حلواه جشعين طماعين كذابين منافقين ..

صديقتي كانت تسمي نفسها عاشقة الإبتسامه ايام الثانوي

كانت الضحكه ما تفارقها .. لما تزورني نجلس نضحك ونتذكر ايام الثانوي وهي قلبها طيب مره

اتمنى صديقتي ترجع صديقتي الأولى .. عاشقة الإبتسامه

ودي اساعدها .. هي عندهم بالبيت مشاكل كثيير بين امها وابوها واتوقع هذا الشي أثر عليها بعد ..

بس اتمنى اكون لها صديقة خير وارجعها عاشقة للإبتسامه ثاني مره

هل أقدر .. وشلون ؟؟

شاكره لكم الإستمــاع ..

المصدر: نفساني