نفساني - عرض مشاركة واحدة

17-03-2009, 08:16 AM

شكرا على اهتمامكم بمساعدتي
أنا راح ابتدئ على طول في طرح مشكلتي

* اول شئ : احس اني من طلعت على هالدنيا وانا حظي نحس في كل شئ حتى في يوم عرسي استوت لي مشاكل
ما حاسة ان لي قيمة فقلب احد ابدا ابدا.. احس ان كل مكان اروح فيه أول ما احط رجلي فيه تبتدا المشاكل .. او يمكن الاشخاص اللي حولي ومتعايشه معهم كذا يحسسوني
احس ان مالي قيمه ولا لي هدف في هالحياه وحتى لي اي هدف كأنه مو من حقي احلم بشئ او اخطط لهدف معين
توقعت لما اتزوج تتغير حياتي .. بس مافي شئ جديد .. حياتي مثل ما هي وادمر بعد ..
حتى زوجي اقرب الناس لي ما عاطني اهميه فشئ ابدا .. هوه صح يحبني .. بس ما يعتمد علي فشئ ابدا وكأنه مستهين بقدراتي .. بس كله يقولي .. (انتي بارده .. بارده وكسوله وتنسين كل شئ ولا تذكرين شئ موليه) ..ويحسسني اني مو قد المسؤوليه ..
انا ما انفي هالشئ يمكن صحيح فيني هدوء زياده بس اللي حوليني يفسرونه انه برود بس انا عاجبتني طبيعتي وعاجبني هدوئي .. ما اعرف ليش هالانتقادات اللي هم يسوونها علي

وبصراحه احس احيانا انه ما عندي ثقه بنفسي ابدا ابدا.. من كثر ما اسمع الانتقادات
ثاني شئ : انا عصبيه زياده .. وعاد عصبيتي على عصبية زوجي تولد مشاكل كثير .. يعني انا احس انه يظلمني هو واهله في اشياء كثيره .. والمشكله اني ما اقدر اسكت.. اتكلم وادافع عن الحق وعشان كذا تجيلي مشاكل مره كثيره
لدرجة ان زوجي يخاصمني ويهجرني ولا يرد علي مول .. حتى لو اتصل فيه وحتى لو ارسل له مسج اني مريضه وابي اروح المستشفى .. وربي ما يسأل عني ولا حتى يرد علي ولا بكلمه
وانا ما ابي اكبر الموضوع والا وحده غيري كان راحت واشتكت لأهلها ولا قدرت تصبر لدقيقه وحده ... بس انا تحملت وسكت وعشت معه فغرفه وحده وتحت سقف واحد وهو على هالحاله بعدين كلمت ابوه لاني كنت متضايقه منه كثير .. وراح ابوه وكلمه فموضوعي .. ولا كأني سويت شئ .. ظل الحال مثل ما هو عليه .. وسكت وتحملت .. وهوه عنيد كثير بدرجه ما احد يتصورها .. وبعد مده كلمت مرت اخوه الكبير عشان تكلم اخوه يتكلم معه يمكن يقدر يأثر عليه .. وتكلم معه اخوه بدون لا يبين له اني انا اللي مشتكيه له منه.. لكن الحمد لله تغير شوي بعد ما تكلم معه اخوه ورجع معي شبه طبيعي .. بس اول ما ابتدا كلامه ظل يهددني ويقولي كلام قاسي .. وبعد قالي ( لا تفكرين ان شكواك حق ابوي مني يغيرني .. ولا تفكرين ان كلام ابوي لي يقدر يأثر علي .. انا ما اخاف لا من ابوي ولا غيره .. ما اخاف الا من الله.. حتى لو توصلينها حق اهلك .. انا ما يهمني ) .. بس انا سكت وتحملت كلامه ... لاني اذا تكلمت راح يقولي انتي لسانك طويل وانتي ما تسوين احترام حق احد موليه

لان طبيعتي اسكت واسكت واتحمل .. لكن اذا صار شئ يضايقني كثير انهار مره .. واطلع كل شئ بقلبي بصوت عالي وبصياح وبكاء كبير
وسبق وتكلمت مع ابوه و امه بهالطريقه .. لان امه صارت تتهمني بأشياء كبيره انا ما سويتها .. وتقولي بعد انتي اللي توسوسيله علينا .. عاد انا ما قدرت اتحمل كلامها وجلست ابكي كثير وادافع عن نفسي بصوت عالي ..

انا متضايقه كثير من نفسي لاني ما قدرت امسك اعصابي .. ولاني احس اني ضعيفة شخصيه وعلى طول ابكي من اقل شئ يصير لي .. واحس ان الكل يضحك ويستهزا على بهالطريقه

ثالث شئ : احس ان اخواته ما يدانوني بسبب مشاكل صايره من قبل في العائله من قبل حتى زواجي بأخوهم .. واتعرض لمواقف كثيره منهم بس اسكت ولما اتكلم يطلعوني انا الغلطانه

اهم شئ الحين :-

ابي تساعدوني على اني اغير نفسي واكون شخصيه قويه .. انا ما ابي اعصب ولا ابكي ابدا .. البكاء والعصبيه سببت لي مشاكل كثيره .. ابي اكون شخصيه قويه مره عشان اقدر اوقف فوجه اي احد يحاول يتعرض لي

ابي اكون على ثقه كبيره بنفسي .. بس ما اعرف كيف ؟ .. وبشو ابدا