نفساني - عرض مشاركة واحدة

29-10-2002, 11:34 AM

بسم الله الرحمن الرحيم

سلام الله عليكم جميعا.. اخواني واخواتي

من مدة وانا اود ان اكتب اللي في خاطري ولكن اتردد

اليوم وفي هذه اللحظة ما ادري ليش جلست اكتب

يمكن لاني مشتاااااااقة ومو قادرة اتحمل بعد اكثر..

اخواني .. اعذروني اذا كان في اخطاء املائيه

مو قادرة اشوف اللي قدامي ...

عيوني غرقانة في دمعها..

لاني .... مشتااااااااااقه..

ما ادري ليش انتوا بالذات جيت علشان افضفض لكم

يمكن لان امي بعيدة عني في بلد ثاني ..

وما ابيها تقلق علي ...

يمكن لان ما عندي خوات معي في نفس المنطقة ...

يمكن وهذا انا متأكدة منه اني ابوح باللي اشعر فيه

معاكم بدون خجل...
يمكن لاني مشتاااااااقه

هنا .. وعلى هذا الكرسي وعلى نفس الجهاز اذا جلست

كان يجي ويقول لي .. يمه تكفين .. خليني اشيك على ايميلي

اقول له .. يا ولد كم مرة اقول لك ... بالدور

اذا جاء دورك على النت .. سوي اللي تبي...

ولازم تحترم دور غيرك...

يبوس راسي ويقول لي تكفين يا ام احمد

ثواني بس واقوم ...

اقوم واخليه ... وتروح علي..

ما ادري ليش اذّكر هذا الحين

يمكن لاني مشتااااااااقه
ادخل المطبخ اسوي العشاء

دقائق والا واحد من وراي يقول بوووووووه

ويخليني انط من مكاني....

اطالع وراي والا هو اوحيمد...

اصرخ فيه واقول له يا مجرم راح تجنني

وهو رايح في اضحك ... ويقول خفتي يا ام احمد

ويخليني اركص وراه بملعقة خشب واعطية كم كفخة على ظهره

وهو ميت من الضحك....

ما ادري ليش جالسه اكتب ..

اكيد لاني مشتااااااااقه

ادخل المجلس .. هذا المكان يحب يذاكر فيه

الدنيا فوضى.. اوراق مبعثرة

كاسات فاضيه... علب عصير وشوكولاته على الكنب...

ورق النشاف في كل مكان... ليه يا ولد المكان كذا

يقول لي خلاص يا ام احمد .. حقك على المرة الجاية

انا برتب المحل .. وانا اقول له هذا اللي ماخذه منك

حقك علي .. ما يصير خاطرك الا طيب

يحب على راسي ويقول خليه بعد شوي

انا ارتب المكالن ... وتروح على... الشغاله ترتبه في اليوم الثاني

وش فيني .. اكيد انا مشتاااااااااقة

ادخل غرفته ... وهو يرتب كتبه حق اليوم الثاني ...

شيء ما ينتصور... وش هذا يا ولد

انت متى رجعت من المدرسه ولحقت تسوي كذا في الغرفة

يضحك ويقول ... يمه ... كل يوم نفس الكلام .. تقوليه

خلاص يمه ولا يهمك .. لا تخلين الشعالة ترتبها ...

انا راح ارتبها تكرة اذا رجعت من المدرسه

واخليها فوضى يومين وثلايه وما في فايدة

ارجع وارتبها انا والشغاله

والله اني مشتااااااااااقه ارتبها كل يوم

قابله والله انه يعفس وانا ارتب

لاني مشتااااااااقه

يعذبي وانا اجلسه من النوم في الصباح للصلاة

يقول يمه جلسي اخواني اول الحين انا راح اقوم

يالله يا ولد راح تطلع الشمس

طيب يمه والله الحين بقوم

ويالله يقوم ...

بعد الصلاة والفطور .. ابوه يقول له

شغل السيارة يا احمد .. يقول له .. دور اخوي

انا شغلتها امس .. يالله يا اخوة روح شغل السيارة

يقول .يبه هذا دور احمد انا شغلتها امس

احمد يقول واخوة يقول .. وانا اقول .. وابوهم يقول

وتضيع السالفه .. اقول لهم خلاص انا راح اشغل السيارة

يقوم اخوة يقول لا يمه انا راح اشغلها مع اني انا اللي شغلتها امس

يضحك ابو حميد ... مجرم بعض الاحيان يصير

والله مشتاقه.. الحين كل يوم بكل هدوء اخوة يشغل السيارة

واقول ياريت يرجع النجار من الصبح

بس لاني مشتاااااااااقه

يرجع من المدرسه .. الظهر .. وانا في المطبخ ..

ها يمه وش الغدا اليوم...

ما تدري وش صار يمه في المدرسه اليوم في حصة الانجليزي

ويوقف يسولف .. يتكلم عن هذا وعن داك

يبغي يعلمي كل شي وانا اقول له روح غير ملابس

الغداء صار جاهز .. يقول لكن بعد الغداء

تجلسين معي لاني عند سالفه خصوصي ابغي اقوله لك

وانا اقول .. انشاء الله .. يقول لي مو الحين تقولين انشاء الله

وتطنشين .. اقول له لا .. راح اجلس معاك وقول اللي تبيه

مشتااااااااااقه .. حق هالسوالف

العصر.... اسمع مطاردات برة في التهويه

نعل وانتوا بكرامه تتطاير..

اعرف ان الولد ترك دراسته

قولوا ليش ... في طبع مو راضي يتركه من هو صغير

ما يقدر يشوف قطو يمشي على جدار ما يضربه بالنعال !!!

اقول له يا ولد ما راح تكبر .... للحين تترك دراستك

علشان تضرب القطو حرام عليك

يقول لي يمه انا ما اضربه انا بس اخوفه

يضحك ويمشي ....

الحين القطاوه يسرحون ويمرحون في لبيت على راحتهم

مشتاااااااااقه

احط راسي على مخدتي آخر الليل

اتقلب يمين وشمال .... طاير النوم من عيني

صورته ما تفارقني ( كان الله في عون الامهات الفاقدات اولادهم)

اروي مخدتي بدموعي .. لين ما يغلبني النوم

واشوفه في احلامي .. اجظنه وابوسه

وافرغ كل مشاعري في احلامي

لاني ببساطه ... مشتاقه

المصدر: نفساني