نفساني - عرض مشاركة واحدة

21-11-2002, 04:50 AM

الحلقة الخامسة ( الاخيرة ) ;)

طق طق طق طق طق طق طق طق
هيا وهاي وهيا .. اها .. هيا وهاي وهو اه اه

واهمه : لمياء وجع وش ذا الشريط يااااااقدمك .

الخيالة : الحين بالله مزعجتنا باجيب لكم حفلات حلوه وازعجتينا والحين هذي اخرتها .. طلعو الشريط طعلووه ..

لمياء: لا والله ماعليكم ،، حطو الوجه الثاني يمكن هذا قديم شوي ..

جنا : قديم شوي ،، الا خلاص انقرض الله يسلمك حطو الوجه الثاني نشوف ..

اساهير : هذا الوجه الثاني ..

عريسنا يا بدر بادي ،، .... ليالينا الملاح

القريشية : اقول لميووووه هذا بالله شريط .. طلعوها طلعوها برى رحي العبي مع البزارين برى يالله

لمياء : لا تقعدون تنفخون علي عشاني صغيرة .. هذا احسن من وجيهكم .. خلاص بكيكم تبون تطلعونه طلعوه (يقالها زعلت )

( اهات " الزميلة المفضلة لساره " جابت شرط مسكت استااانسو عليه النسوان )

اهات : بنات ... تفضلو العصير ..

وردة : تسلمين يا اهات .. نخدمك في عرسك انشالله

اهات :ايه خير انشالله

همس الغمام : اللي عنده سكر لا ياكل ..(جايبه شوية حلويات )

مثايل : الله لا يجيب المرض .. بس ترى مضر بالصحه ..

لينا محمد : اقول مثايل ..بالله فكينا .. خليها على الله

المستبدة : ياعروسه ما سمعنا صوتك ..

غريبة : هي عروسه وحده ماشالله .. ثلاث اللهم لا حسد ..

انماااار : يالله نبي من كل وحده تقولنا وش مشاعرها في هذي الليلة السعيدة . .

عاليه : انتو ..عمركم ماشفتو عرايس .. حلو عنا .. بدنا نفس بس ..يالله كل وحده تروح تاخد كرسي وتجلس .. وبلا كترة لعي ..

لمياء : ياااربي وتنفخ بعد .. انا والله ماني مرتاحه لها من يوم شفت شعرها ...

ام احمد : هاه يابنات وش عندكم .. متجمعين على العرايس ..يالله وخرو خلو الناس يشوفونهم .. وخرو .. يالله لمياء اتصلي على صوت الشباب .. قلي له جا العشا ولا الى الحين ..

وتستمر الحفلة والنسوان يتفرجن في الحفلة .. وطبعا شلة نفساني مجتمعين في زاوية .. والشاهي والقهوة
نظرة امل : واااخزياه شفو ذا البنت شلون لابسه لاحووووول .. ما تستحي على وجهها

روح الحياة : وين اللي لابسه اخضر ..

فاطما : شفيها ذيك اللي شعرها احمر ..

النجمة : لا لا شفو ذيك الطويلة الخبلة اللي نازلة ترقص مدري وش تبي ..

( والبنات يضحكون )

ام مروان : بنات مايصير تقعدون بس تتكلمون على بنات الناس اللي صادقه تروح تكلمها ولا تنصحها .. لا تغتابون

جروح تبتسم : بس شفي يا ام مروان شفي هاللي الحين نزلت وش لابسه .. ام مروان انتي ام العروسه ولك حق تسوين شي ..

ام مروان : لاااااهالشي ما ينسكت عليه ابد
( وتروح ام مروان وتمسك المكرفون و وتفجر الكلمة ) : الله يحيكم كلكم واحنا سعداء بتلبية الدعوة .. لكن رجاء البنات اللي لابسين ملابس غير لائقة ما ينزلون .. والله يحييكم كلكم ..
ام احمد : ام مروان تدرين هالبنات ما ينفع معهم .. وقفو الرقص كله ..

ام مروان : ايه بس مايصير عاد نسكتهم .. نبيهم يستانسون ..

ام احمد : تبينهم يستانسون .. جبي المكرفون وعطيه لمياء وخليها تسوي البرنامج اللي تبيه وبتشوفين كيف بيصير عرسنا .. واذا صارو بيطلعون العرايس زفيناهم ..

ام مروان : اللي تشوفينه .. لمياء تعالي هاك المكرفون تصرفي ..

لمياء : هات انا اوريكم .. سيداتي اانساتي .. وبعد ان فليناها .. يسرنا ان نكون متميزين بتميز عرايسنا الليلة .. ( لمياء صراحه صعبة تقول زي ذا الكلام لكن المخرج يبي كذا )
والان نلتقي بعرايسنا الليلة ونشوف وش رايهم ..
ساره وش شعورك ؟؟

ساره : والله الحمدلله شعورنا شعور أي بنت تتزوج .. يعني الحمدلله
الله يوفقني في هالزواج ويقدرني اكون اسرة سعيدة .. وو

لمياء : طيب وش شعورك .. لو الحين اعطيك حلاوة هدية من عريسك ..
ساره : شكرا .. مدري صراحه وش اقول

لمياء : الف الف مبروك ننتقل الان الى وحده ثانيه يقولون اسمها عاليه.. يالله تكلمي .. وش فيك ليه تزوجتي ..

عاليه : الله يبارك فيك .. انا تزوجت لان هذي سنة الحياة والحمدلله قضاء وقدر يعني .. والشدة على الله

لمياء : شدي حيلك .. شدة وتزول انشالله ،،،،،، ننتقل الى عروسه جديده .. هي ام اللي قبل شوي عاليه .. هلا .. انتي كبيره وتزوجتي ماهو شعورك .. وكيف تم ذلك بنجاح ..

ام عاليه : والله الحمدلله .. كله كان بتوجيهات من الجهات العليا .. والثبت البتار انه رجل يعني .. وهذي الكوره فوز وخساره ..

لمياء : الف الف مبروك .. انساتي سيداتي .. والان ننتقل الى مشهد تمثيلي من تاليف مثايل .. وتمثيل لمياء و اساهير وهمس الغمام ..

( يبدا المشهد )
لمياء : امي ..يامي .. لا استطيع ان اكون وحدي هنا .. اريد ان تنامين معي هاهنا ..
همس الغمام : يا بنيتي نامي لوحدك .. تحملي يابنيتي فان ابوك لن يقبل .. تهئ تهئ تهئ

اساهير : امي .. امي .. هيا بنا لقد تنوم ابي في المستشفى .. هيا لنزوره ..

لمياء : هيا هيا

همس الغمام : تعالو .. تهئ تهئ .. لن يصلح .. اننا يجب ان نذهب بكره .. لان الزيارة الان سكرت .. تهئ تهئ

( وتدخل القريشية تخرب المشهد )
القريشية : اقول من جدكم انتو ؟ وش ذا المشهد ؟؟ اقول رحو اجلسو بس استريحو .. احنا في حفلة ولا في عزا ..

لمياء : لا لو سمحتي دعينا نكمل المشهد .. ( يعني الممثلة مندمجة في الدور )

القريشية : اقووول بلا دعيني ما دعيني .. يالله بس هات المكرفون .. اهلا بكم مره ثانيه .. حقيقة ولانكم نساء .. ولا يحق لنا ان نسلبكم اهم واروع هواية عندكم ... لذا فقد قررنا ان نمنحكم فرصة تمارسون هوايتكم .. حشو .. وقطعو في الاوادم .. و لكم بس نص ساعه .. احنا نعرف انها ماتكفي لكن الوقت ضيق ..

( اما عند الرجال فالوضع مختلف تماما )
صوت الشباب : ابو مروان .. هاه متى قالو العشا ترى اهلي يسالون ..
ابو مروان : انشالله الساعه 10
هدهد سليمان : الف مبروك اخوي البتار .. والله زين ماسويت .. ياليتنا مثلك ..
البتار : الله يبارك فيك شد حيلك عاد ..

عبياني: مبروووووك قيس ،، والله فرحنا لك ، عاد اسمع نصايح مجرب.. اذا جيت بكره ...............
قيس : الله يبارك فيك ،، لا تخاف علي اشوى اني قريت 13 كتاب عن ليلة الدخله ..

شراني : تابط شرا ،، يقولون انك تزوجت ؟ شد حيلك .. مابعد الشده الا الرخاء
تابط شرا : الحمدلله على كل حال .. هذي حال الدنيا ..
عسول : أي والله وابن ادم مثل البشر اذا مات توفى ..
صوت الشباب : اقول كنك تستخف دمك يا عسول ترى تقدر تروح تتقهوى مع الشباب ..

ابو مروان : ساكن الرياض ،، وين القهوة تعال صب للعرسان ..
ساكن الرياض : هذااااا شاهي نعناااع لعيون العرسان ..

( في احدى جلسات الاستراحه الجميلة )
د.انسان : لو سمحت .. نعناع لو سمحت

مقرقع البيبان : الووووو ياخوي .. انت اطلع مع المخرج .. بتشوف لوحة كبيرة على يسارك مكتوب عليها استراحة نفساني .. ايه خلاص خل اللوحه على يمينك و امش الين تجيك الاستراحه على اليسار ..

مشعل : اقول شباب .. ما سمعتو فيه لعب اليوم ولا لا ؟

( ولا زال الاطفال يلعبون في تلك الساحة الخضراء الكبيرة ،، والشباب في جلساتهم يتسامرون .. والشيبان يتذاكرون بطولاتهم السابقة ،، والعرسان كل على همه سرى )

وحانت الزفه ،، وكل واحد من العرسان ياخذ حقته ويروح

البتار :انا قايلكم الزفه في الهايلكس حقي ماني متخلي عنه ابد .. انا موصي صوت الشباب يغسله وساكن الرياض بيودينا بيتنا على طول ..

صوت الشباب : هاه قيس جاهز يالله ترى العروسه بتطلع ..
قيس : بشر وش استاجرت لي .. كدلك ولا بي ام ..
صوت الشباب : اقول لا يكثر .. مستاجر لك فورد وتخب عليك ..
قيس : ليه وانا عطيتك 1000 ريال ..
صوت الشباب : ياخوي طفرت وتعرف حلقت .. و شريت اغراض لي المهم موب الحين نتحاسب بعدين بعدين .. يالله امش طلعت العروسه ترى ..

تابط شرا : هاه عمي ابوهاشم ،، مشينا ؟
ابو هاشم : يالله يا ابني .. عاليه طالعه مع العرايس ..
تابط شرا : اصصص لا تقول اسمها لا احد يسمعك .. هذولا محارمنا الله يخليك ..
ابو هاشم : هههههه الاخ سعودي
تابط شرا : لا والله اماراتي .. اف ام أي خدمات ..
ابوهاشم : خفيف دم على عادتك .. يالله يالله مشينا ..

(( وكل واحد راح بزوجته وهم مبسوطين واحلى ليلة زفاف في العالم .. وكل واحد مخطط على سفره ))
تابط شرا ناوي يروح بيروت ( من الحين تحكمت فيه زوجته ،، وهذا اللي قاهر لمياء اكثر)
قيس حاجز على ابها
البتار يقول زوجتي الجديده كلها لو حرجت عليها في سوق الكمبيوتر ما جابت قيمة تذكرة .. نقعد في الرياض ونمشيها على كورنيش القمامه ( قصدي الثمامه ) واهم شي اني معها في مكان واحد ..

((( ولا زال صوت الشباب والكثير معه .. الكثير الكثير .. لازالو في الاسواق يبحثون عن عواطف .. وافضلهم حالا ، لازال في بيته يتقلب اخر الليل تقول ماكل ملحوس .. على قولة الشيخ سليمان الجبيلان )))

انتهت حلقات مسلسل نجوم نفساني .. ولكن مسلسلات صوت الشباب .. باذن الله ستستمر
واعدكم .. بدون دعايات

تحيااااااتي