المشاركة الأصلية كتبت بواسطة شلهوم

السلام عليكم ورحمة الله وبركاته
انا والله احترت في نفسي مره اقول مرض نفسي ومره اقول روحي
الى درجة الحين مقدر افرق بين الاعراض
لاكن انا بقول الاعراض واحكمو :
1-كوابيس كثيره كل يوم واحيان اصحى اقول هذا حلم ولا افكار يعني مقدر افرق وافسرها تفسير مو زين
2- الاحساس بالموت
3-تفكير تشاؤمي في كل شي
4- قلة النوم ومع ذلك اذا نمت احس نومي خفيف اي صوت اصحى ع طول
5- كل شي عندي طفش ما استانس مثل اول اما اول اقل موقف اضحك منه الحين صرت ماعرف شي اسمه ضحك
6-احيان مالي نفس على احد ولا ابي اكلم احد ودي اكون لحالي
7- صار عندي كره لاهلي احيان تدق علي امي وما ابي ارد بس اغصب نفسي وارد عليها
8- ثقل او كره اداء الواجبات الدينيه
9- اذا دخلت مسجد اصلي ودي اخلص الصلاة بسرعه احسها ثقيله
10- صار عندي ميول للمعاصي بس من فضل ربي اقاومها وماسوي هالمعاصي
11- دايم احلم بجمل يطاردني بالمنام واحلم في ناس اموات
12- عندي ملاحظه مدري هي صدق او اتوهم انا اللي هي اني احس اني ما اشم زين يعني فاقد جزء من حاسه الشم والشي الثاني ماحس باليوم نهائي يعني احس يومي باهت اللون مافيه شي مميز مدري كيف اوصف
13- احيان يجيني تنميل بالذراعين ورجلي اليسار بس تنميل خفيف واحيان احس بشي ماسك ظهري
14-مزاجي متقلب خمس دقايق مستانس وخمس دقايق طفشان
15- افكر اربعه وعشرين ساعه احاول اوقف تفكير مقدر
16- احس بخمول واتكاسل اسوي اي شي
17-احيان اهمل شكلي وملابسي واحيان العكس
18-اي شي اشوفه او اقراه بالواقع لازم اتحلم فيه لو بعد فتره
19- عندي خوف من السفر ومخاوف احس انها تافهه مثل اذا صليت بجماعه اقول بيجي واحد من اللي يصلون وراي ويطعني بسكين
20- صرت انسان عصبي وازعل من اتفه سبب
21- احيان اقول براجع شيخ واشجع نفسي واروح له يومين وبعدها اطنشه
22- اي حلم فيه رقم مثلاُ 11 اقول بتاريخ 11 راح يصير لي شي
23- اشوف شكلي بالمرايه كأني قبيح مع اني ع كلام الناس عكس ذلك
24- صار عندي تشتت بالرأي مثلا اقول بروح المكان الفلاني ارجع اقول لا بروح المكان الفلاني ثم اكنسل كل شي
25-اذا رحت مشوار او اتمشى احب اخذ عيال عمي او خوياي بس اخواني اكرههم يروحون معي مدري ليش
هذي الاعراض اللي اتذكرها
وانا اسف طلعت عن حدود السؤال لاكن كتبت هالاعراض لاني بكل صراحه مدري حالتي نفسيه او روحيه وابيكم انتم تحكمون عشان اقدر اجاوب ع السؤال
وكل شكر ع هذا الموضوع الرائع