نفساني - عرض مشاركة واحدة - تجربه تخلصي من الرهاب الاجتماعي والسلوكيات التي اتبعتها

14-05-2010, 12:17 AM

السلوك الرابع:
مناسبات وزواجات..
طبعا الرهابي مايحضر زواجات وتلاقون جماعته نسو شكله ..
فانا ابي اروح لمناسبات خصوصا زواج اختي قرب ،وطبعا لازم احضر.لاكن كنت مره ضايق صدري وشلون احضر كيف راح يكون شكلي في العرس..انا ماعرف اتكلم ولا عرف اضيف الناس..اصلا وين المكان اللي ابقعد فيه قدام ولا عند الباب
ولا وين..حاااالتي كانت صعبه بجد صعبه لدرجه فكرت مااحضر ...
المهم طلعت براسي فكره وهي اني احضر زواج ناس مااعرفهم:) ..
بعد صلاه العشاء اخذت شور وكشخت ورحت ادور لي على قصـر فيه عرس هههههههه
ولقيت وجلست انتظر برى لي يمتلي من الناس..المهم ..وانزل من السياره متجه الى الباب(وشعوري عارفين كيف) طبعا ماعرف احد كنت امشي ولقيت اقرب مكان فاضي جلست فيه طبعا كنت ساكت بس اطالع بعيوني ونفسيتي تمام وقلت لازم امر وامشي بين المعازم وبالفعل مشيت.. بصراحه لما مشيت بينهم حسيت ضااااااقت نفسي كثير وتوترت اعصابي وحسيت الكل يطالعني والكل يقول ذا وش يبي والكل يضحك علي والحين بيجمعون علي ويسالوني من انت وليش جاي(واصلا محد يمي) طلعت من العرس بغيت اروح للمستشفى اخذ اكسجين..حسيت راسي يرجف وكن فيه نبض قوي..(بس مايـآست وقلت خلاص معد راح اروح)
بعدها بيومين رحت لزواج بس اني مادخلت بس برى امشي بين المعازيم اللي برا.بعدها بيوم قلت يله شف لك اقرب استراحه ورح..ورحت بس هالمره كنت مطمئن كثير لاني جلست حوالي اكثر من ساعتين اعطي نفسي كلام ايجابي ودخلت وجلست وكنت اناظر اهل المعرس واهل العروس كيف يسلمون وكيف يضيفون وكنت الاحظ ادق التفاصيـل عشان اسويها في عرس اختي ومشيت بين الحاضرين كان يدق قلبي بس شوي لاكني ماالتفت له والمره هاذي استفدت كثير...

ورحت لعرس بعده بس جلست ربع ساعه مريت من جنب الناس
وكني ادور احد وهيبه العرس وتجمع الناس خفت كثير
...بقى شئ ..وهو ايش راح اقول لضيوف ان جو في عرسنا..
طبعا قعدت بغرفتي وكنت اتخيل الناس اللي بالعرس يتكلمون معي..
كتبت كلام وجلست احفظه مثل
على البركه //الله يبارك فيك..
الله يحييك//الله يبقيك
بشريني عنك ///ابشرك عن ماتحب ..
كيفكم وايش اخبارك.. // تمام او الحمد لله او بخير ونعمه يالله من فضلك..
وينك غايب مانشوفك(متوقع ذا السؤال)//ابد يالغالي في هالدينا مشاغل ..
لاتقطعونا//ابشـر بس انتو اوصلو
إستروا ماوا جهتم//ماواجهنا إلا كل خير.

يعني ترحيب وبـس..
(وجاء العرس كنت بصراحه ناسي الرهاب والخوف لاني كنت مشغول وتصرفت عادي واسلم والكلام كان يطلع معي بسهوله(بس ماكنت اسولف بس كلام عادي مثل اللي كتبته قبل شوي)..يوم جاء العرس بيخلص تذكرت ان ماجاني الرهاب (ممداني متذكر إلا وقام قلبي يرجف بصراحه ضحكت على نفسي قلت يوم جبت طاريك جيت).المهم اني رجعت للبيت وانا جدا جدا مبسوط من حالي)

السلوك الخامس:
التواصل..مع الاصدقاء

..طبعا مااقدر اوجه صديق لان لو قابلته اكيد بيكون فيه سوالف وكلام ونا ماعرف ارد وماعندي سالفه واللي بيجلس معي بتجيه الامراض من الطفش لاني ماعندي تعبير على موضوع او بعض الاحيان يقولون لي سالفه بس ماعرف وش ارد وش اقول..
المهم قررت اتواصل مع صديق..رحت لنوته الارقام ونقيت صديق حبيب من 5سنين ماكلمته
كنت اقول الحين بيقول وش يبي ولا وش ذكره فيني بس اني شطبت الكلام ذا من راسي..لانه كلام سلبي
جبت ورقه وقلم وكتبت فيها كلام ينقال
لصديق اللي من زمان ماشفته،عشاني عارف اني بدقر في الكلام

دقيت على صديق ثاني بس هالمره بالتلفون
اول ماسمعت صوته حسيت اني صرت اطرم (بسم الله علي)
لدرجه ابعدت السماعه وجلست اجرب صوتي ابي اتاكد بس ان فيني صوت..واقوله نفس الكلام اللي كتبته وقلتها لصديق الاول هههههههه ..المهم ماخلصت الدقيقتين وحسيت اني ماني قادر اكمل واحرك السلك حق التلفون
عشان تصدر شوشره ومانقدر نكمل المكالمه:tongue: وطبعا شوشرت به ثم قلت شوف بصلحه وبدق عليك..وانهيت المكالمه..

طبعا الصديقين لما كنت اكلمهم بصراحه كان كلامي حروف مقطعه وطلاسم غير معروفه..
وبعض الاحيان ماعرف ارد..او ارد رد ماله دخل بالسالفه..
لاكني ماهتميت من الجانب السلبي وعززت نفسي في الجانب الايجابي اني اتصلت وتجرءت
وبادرت وكلمت

والمره اللي بعدها كتبت سالفه صغيرره وقررت اقولها والحمدلله كلمتهم وقلتها..
وجلست اكلم هذا الصديقين لين تطورت علاقتي بهم كثير وصرت اتكلم وسالفه تجرسالفه..
وبعد فتره قررنا نتقابـل .. اكيد كان فيه تحميره وجهه ونفضه على توتر ودقات قلب..بس بعد مقابلتين او ثلاث صار عادي عندي لاني كثفت الرسائل الايجابيه..

الان:بعدل ماكنت اكلمهم بدقايق صرت اطلع واروح معهم..
وتعرفت على اصدقاء غير قابلتهم..وتيسرت اموري ولله الحمد

..هذه بعض السلوكيات اللي كان لها اثر كبير في تغير حياتي..

تــآبع