أبو سمرة

بيانات اضافيه [ + ]

رقم العضوية : 30824  تاريخ التسجيل :  06 2010  أخر زيارة : 21-06-2010 (01:44 AM)  المشاركات : 2 [ + ]  التقييم :  10

لوني المفضل : Cadetblue

مشكلة زواج

السلام عليكم و رحمة الله و بركاته

انا عندي مشكلة غريبة شوية...

أنا وحيد والدتي و والدي متوفي... أمي مش قادر أقولك تعبت عليا قد ايه في حياتها... والدي تعب صحيا جدا في آخر 8 سنين من حياته و أمي كانت شايلانا و بالتالي أنا مدين لأمي بحاجات كتير من أهمها انها علمتني أحسن ما هي و أبويا اتعلموا و بفضل الله و فضلهم بقيت باشتغل في شركة اتصالات كبيرة و بعرف لغات و الحمد لله أقدر أقول من كلام الناس عني إني متربي كويس و وضعي المادي كويس بالنسبة لشاب في سني.

مريت بتجربة خطوبة عن علاقة شخصية و فشلت. لكن عن طريق جواز الصالونات اتعرفت ببنت طيبة من عائلة كويسة جدا عايشين في الاسكندرية.

أهل البنت بيحبوها جدا و هي تقريبا المفضلة عندهم أكتر من إخواتها لأنها طيبة و رقيقة جدا. لازم أقولك كمان اني للأسف عصبي جدا و اتكرر اني اتعصب على خطيبتي كتير و اعلي صوتي لكن باحترام. عمري ما شتمتها أو حتى مديت ايدي لأني عارف ان ده مش من حقي.

طبعا مشاكلنا كتير لكن أنا و هي بقالنا سنة و نص مخطوبين و حبينا بعض بالعقل قبل القلب. يعني حب باقتناع شديد ان كل واحد فينا لقى نصه التاني.

طبعا مع العصبية بتاعتي و رقة خطيبتي اللي مش قادر أقولك قد ايه.. كل خناقة كانت بتنتهي ببكاءها الشديد و أنا طبعا باحس بالذنب. لكن بنتصالح بسرعة لأن أنا و هي بنحب بعض.

المشاكل أغلب الأحيان بتكون على حاجات تافهة لكن بعد المسافة بيننا ماكانش مخلينا عارفين نتفاهم على حلول المشاكل بسرعة لأني كنت باشوفها يومين أو 3 كل شهر و هم كانوا بيستضيفوني عندهم في البيت.

سبب المشاكل دايما ان انا و هي بعيد عن بعض و انني دايما عاوز اتطمن عليها . يعني مثلا كل مرة بتخرج كان فيها خناقة عشان مثلا ماكلمتنيش. و الحقيقة هي ماكانتش بتخرج كتير لكن أنا باقلق لأن الحوادث كترت قوي.

آخر مرة حصلت مشكلة بيننا كان يوم 1 مايو و كانت على حاجة تافهة لكن الموضوع كبر و وصل لأهل خطيبتي عشان لقوها منهارة و بتبكي بحرقة.

المشكلة انتهت بإن والدها أنهى الخطوبة عشان أنا و البنت مش عارفين نتفق مع بعض.

بغض النظر عن ايه اللي اتحملته عشان خاطرها. بعت أصول كانت عندي عشان أقدر أجيب شقة في المكان اللي اتطلب مني أجيب شقة فيه عشان البنت تكون قريبة من أهلها اللي في القاهرة بحيث ان والدتها تكون مطمئنة عليها. و مش قادر أقولك ان أقساط الشقة عالية جدا 3000 حنيه في الشهر و كله عشان خاطر البنت.

و كمان بغض النظر عن ان نوع التفاهم اللي ما بيننا هم مش شايفينه.

طبعا أنا و البنت عايزين نرجع لبعض و البنت بتحاول مع أهلها عشان تقنعهم ان بغض النظر عن العواطف هي شايفة اني الانسان اللي هي اتمنت تتجوزه.

لكن كان الاعتراض على كذا حاجة:

أولا ان أنا عصبي و ممكن مع الوقت و زوال الحب اتعصب و أضربها أو حتى اهينها.

ثانيا ان انا وحيد والدتي و ده ممكن يخليها متدخلة في حياتنا لدرحة تخلي البنت تكره عشرتي (مع ان والدتي متدينة جدا و بتحب البنت قوي لكن لازم أعترف انها عامل مؤثر على قراراتي لأنها بتخاف عيا بشكل ممكن يكون مرضي).

ثالثا إن أنا عشان مفضل لأهلي كلهم و بيحبوني قوي هايكونوا متدخلين هما كمان في حياتنا و في قراراتي و ده هايخليني إنسان ماعنديش القدرة اني أواجههم و هاخضعلهم و بكدة تبقى البنت لوحدها في مواجهة كل ده.

طبعا الحاجات دي مش استنتاجات دي كلها حاجات أنا عرفتها من البنت لأن أنا و هي على اتصال لأننا رافضين نسيب بعض.

طبعا حصل الحاجات اللي مش لطيفة اللي بتحصل في العائلات المصرية في الظروف دي اللي هي كلام من أهلي و كلام من أهلها لدرجة انهم غلطوا في بعض و ده خلى العلاقات تتوتر و احنا (انا و البنت) اللي مظلومين في النص و مابقاش حتى ينفع نلطف الجو..

هي حاولت كتير تقنع والدتها ان انا انسان كويس و ان هي عايزاني لكن والدتها بترد دايما ان هي مش متطمنة.

و أنا حاولت أدور على وساطة خير عشان أهلها يقتنعوا. بغض النظر عن كرامتي و الحاجات دي لكن للأسف بعد الغلط اللي حصل من امي و امها مابقاش فيه حل لوساطة من اي حد. انا بافكر جديا اخدها و اهرب بيها و نتجوز في اي بلد برة مصر.

احنا كنا على وشك الزواج في شهر 9!! و طبعا مش قادر أقولك ان انا و البنت كنا بنعد الأيام لحد ما ربنا يجمعنا.

أفدني أفادك الله...

المصدر: نفساني