|
اخوي محمد التميمي جزاك الله خير
السلام عليكم ورحمة الله وبركاته
أولا احب اشكرك اخوي محمد وجزاك الله عننا ألف خير لانك تهون علينا حتى لو بالنقاش والكلام
احب اعرف عن نفسي
انا شاب عمري الان 28 سنه وغير متزوج
طبعا كنت انسان طبيعي ولا اشكي من اي شيء وكان عندي محل ودخلي ولله الحمد كويس وعلاقاتي الاجتماعيه ممتازه ولي صداقات كثير
وصارت ظروف وخسرت وكل شي بدأ يتلاشى ونقمت على حياتي وعشت تقريبا مدة سنه منطوي على نفسي في البيت والى الان لا اشكوا من شيء الا اني ناقم على المجتمع والظروف
وبدأت ارجع علاقاتي حبه حبه ولكن حصل مالم يكن في الحسبان
تعرضت لظرف نفسي وفي خلال هالفتره كنت جالس في البيت وفجأه حسيت بكتمه قووويه وخووف شديييد ونوبة هلع ودووخه وصرت ماني عارف وش اسوي لدرجة اني قمت اصلي وقطعت صلاتي قبل ما اكملها ماقدرت اكمل
الكلام هذا كله في بداية 2007
والمشكله الادهى والامر اني ماكنت عارف وش مرضي لغاية قبل 6 شهور
مره اقول عين ومره اقول مرض عضوي وماعرف لارحت لطبيب ولا سويت شي
توظفت سنة 2008 وخلال هالسنه كان فيه تحسن جيد في حالتي اذ اني خالطت المجتمع من جديد وبعد سنه طلعت من دوامي
المشكله انني كنت اشعر بدوخه مستمره واخاف من الاماكن العامه زي المجمعات والشوارع المزدحمه اشعر بتوتر شدييييد وانا امشي فيها واشعر اني بطيح في أي لحظه
والان مشكلتي زالت وصرت احسن ولكن صرت مشكله اكبر وهي سواقة السياره
انا من سكان المنطقه الشرقيه الدمام وكنت رايح الخبر مره من المرات وراجع لحالي بالليل وفي نص الطريق جاتني نوبة هلع شديييده جدااا وما اعرف كيف وصلت البيت
جلست بعدها 3 ايام ماطلعت من البيت
وصرت بعدها اسوق السياره لكن بخيفه وحذر شدييد ومن سنتين وانا ما اقدر اطلع الخبر مثلا او اي مشوار ابعد وكل مشاويري قريبه ولا اقدر ابعد خارج حدود الدمام
طبعا ما اعرف وش اقول ياما تعرضت لمواقف تجبرني على مشوار للخبر او مكان بعيد ودايم اخذل نفسي وبعدها الوم نفسي كثير وتزيد هالحاله عندي
طبعا الوضع هذا متذبذب على حسب اوضاعي النفسيه اذا تحسنت صرت اروح واجي براحه واذا تبدلت الاوضاع لأسوأ ترجع الحاله اكثر
ما اعرف وش الحل الارتباك من السواقه جنني وانا الان عزابي والاهل عندهم من يوديهم ويجيبهم لكن انا افكر لو تزوجت كيف بروح واجي وامشي العيال واوديهم مشاويرهم اللي ممكن تكون ابعد حتى من من الخبر او الجبيل او حتى خارج حدود الشرقيه
انا بنفسي اوقات ودي اطلع اتمشى او اخلص شغله بعيده شوي ولكن للاسف دايم محاولاتي تبوأ بالفشل
علما بأني الى الان مارحت لأي طبيب ولا استخدمت أي علاج
أتمنى يكون شرحي وافي ومفصل مما يساعدك في تشخيص الحاله والنصح لي وجزاك الله خير واسمحلي على الإطاله
ونسيت اقول شي بعد اخوي محمد
المرض أثر فيني لأني اكتم دايم واحاول اخبي وهذا اثر على اعصابي بشكل كبير
والان عندي رعشه خفيفه بجميع اطراف جسمي لمى اصحى من النوم تكون شبه مختفيه لكن بعد ساعه ونص الى ساعتين تبدا بالظهور ولا تختفي الا اليوم الثاني لمى اصحى من النوم ما اعرف وش الحل
|