الفتّوجيه مش مقصود بيهم الفتّوات ,
ده مصطلح هعبر بيه عن الناس اللي متكونش عارفه حاجه ولما حد يسألها تقوم تفتي, يعني جايه من فتوى وجمعها فتاواي والفاعل هو الفتوجي . وممكن نقول عليه أبو العريف . وهو اللي بيجيب التايهه ويقراها وهي تايهه – مش طايره - ومفيش أتنين منه ونادر زمانه وأوانه . (وبعيدا عن دول اكيد مش هنتكلم عن فتوجية الفضائيات ومن هم على شاكلتهم لانه موضوع تاني خالص )
يعني تبقى رايح حته ومش عارف المكان وتقف تسأل, وميكونش اللي سألته عارف , فيفتي بوصفه على كيفه, وطبعا لو أنت مش حريص وسالت كذا مرة عشان تتأكد , تلاقي نفسك بعد شويه بتدعي عليه,
وطبعا دي صورة للفتوجي في ابسط أفعاله , يعني بنتكلم بس عن عنوان شارع , كان يجرى إيه لما يقول معرفش . ؟ وقشطة يعني لو الفتوجي ده وانت بتساله سمع كلامكم حد تاني وده اللي بنسميه - بيلمع اكر - وراح داخل في الحوار تلاقي الفتوجي بصله شزرا وممكن يقوله اسكت انت مش فاهم حاجه وبكده تلاقي نفسك بين الفتوجي واللي بيملمع اُكر ,
(بيلمع اكر : مفهومه : اللي بيدي ودانه وتلاقيه قريب من اي حته تكون بتتكلم فيها او حتى بتتكلم في الموبايل او يتعمد يكون بقربك فتلاقيه دائما قريب من اكرة الباب ولما تاخد بالك منه يعمل انه بيلمع الاكره بتاعت الباب او بيلمع حذائه او زي م يكون - مفيد الحقيقة في القضاء على التلوث - اللي بيلمعوا اكر دول اوقات بنسميهم العصفورة الدبور النحلة دول عايزين موضوع ليهم الحقيقة هما كمان )
وطبعا الفتوجي في كل مكان تلاقيه , بدأ من الشارع مرورا بالجار وزميل العمل و الأصدقاء ووصولا حتى لأعلى المناصب , وطبعا تبقى كارثة لو في أيده سُلّطه - مش سَلطه بتاعت الخيار والقوطة - ويكون م النوع الفتوجي وخصوصا لو حواليه حاشية تزين له فتاواه وأفعاله ودول اسمهم المطبلاتيه – حاجه زي كدابين الزفه من نوعية , اللي تشوفه ياريس , وتمام يا ريس ومعاليك يا ريس , واحلام سيادتك اتنفذت قبل م تحلمها هههههههههههههههه
طب يجرى إيه : لما تسيب الرأي لأهل الخبرة والمختصين وأهل العلم - او هنقول عليهم - اللي يعرف - ؟
محدش عندنا بيقول معرفش ودي سمه مش كويسه في مجتمعنا
يا ترى هييجي وقت لما منكونش عارفين هنقول منعرفش ولا ايه رايكم ؟
كتب عمرو حسن