نفساني - عرض مشاركة واحدة - 2

30-08-2010, 05:40 AM

ـــــ أبدا أنا بقالى 3 أيام مابأشوفوش ؛ من بعد ماوديت له الكمبيوتر البيت ؛ وقال لى مش عايزين
نغير عوايدنا ؛ وأنا مابأروحش عندو .. انت عارف انه عازب وعايش وحده ....
ـــــ بس دا بقالوا مده لاحس ولا خبر ؛ ومبقيناش عارفين إيه بيجرى ؟
ـــــ على العموم ميعادنا النهارده هنا ؛ وقال ياخبر بفلوس ؛ بعد شويه يبقى بلاش !!!!
ــــ هاهاهاها لأ وحياة والدك ؛ شبعنا ( بلاش ) ركز على ( الفلوس ) هاهاهاها
وشاركه محمود افندى ضحكاته ؛ حتى تراءى لهم من بعيد ( العبقرى ) مقبلاً عليهم ؛ متهلله
أساريره ؛ فاستبشروا خيرا ؛ واستقبلوه بحفاوه وترحيب ..
جلس بهجت متفرسا فى وجوههم ؛ مبديا ابتسامة من يقرأ اسئلتهم فى أعينهم ؛ وبادرهم قائلاً:
ــــــ هاهاها عارف عايزين تقولوا إيه .. باين فى عنيكم .. بس أحب اطمنكم .. الشغل ماشى عال
فقال الباشا مستفهما :
ــــ يعنى تم توزيع اللى طبعتوا ؟
ـــــ هاهاها توزيع اللى طبعتوا ؟ إيه ياباشا ؟ انت فاكرنى حأطبع على ورق لحمه ؟ هاهاهاهاها
الحكايه عاوزه شوية صبر لغاية ماأجمع من السوق الورق المناسب ؛ دون لفت للأنظار ؛ وكمان
أشترى الأحبار والأصباغ من أماكن متفرقه ؛ حتى لاأثير شكوكا .. أُمال إيه ؟ مش كل حاجه لها
أصول ؟
ـــــ لأ .. عفارم عليك يابهجت .. طمنتنى كدا إنك حويط وحريص ...
ــــ اطمئنوا .. رقبتى قبل رقبتكم .. أُمال فين عم سيد ؟
ـــــ مش عارف إيه أخره .. كنت متوقع ييجى معاك ...
ـــــ لأ.. ييجى معايا دا إيه ؟ مش عايزين نغير عوايدنا زى ماقلت لكم ..
ــــ لكن يعنى مابقيتش تظهر كل ليله زى ماكنت ؟
ـــــ مشغول ياأبو الأحناف ... مشغول لشوشتى .. بأعمل تجارب على المنتج الجديد عشان
يطلع حاجه اكسترا ؛ ومن ناحيه تانيه زى ماقلت لك باجمع المستلزمات من السوق ...
ــــ الله يعينك .. لو تحب مساعده ؛ احنا فى الخدمه ..
ــــ طبعا ادواركم جايه .. أُمال يعنى حأسيبكم كدا عواطليه ؟ .. دلوقت اسمحو لى
أنصرف ...
ـــــ بدرى كدا ؟ ماانت قاعد شويه ؟
ـــــ بدرى من عمرك ياحبيبى .. أنا بس حبيت اطمنكم ؛ واهدى بالكم ؛ لكن انا مش فاضى أهرش
ـــــ نهرش لك إحنا ؛ بس شد حيلك هاهاهاهاها
ـــــ هاها إن شاء الله .. كلو على الله .. بس زى مااتفقنا ؛ خللوا الأمور طبيعيه ؛ عشان مانلفتش
النظر ...أشوفكم على خير ..
ــــ إمتى ؟ حنتقابل تانى امتى ؟
ــــ والله مش عارف بالظبط ؛ بس لما يكون الوقت مناسب حتلاقونى طابب عليكم ؛ ومعايا
مالذ وطاب لكل واحد منكم ؛ وأحللى لكم بقكم ....
ـــــ يارب ياخويا ؛ أحسن ريقنا ناشف زى ماانت عارف ؛ والأحوال جيم ...
ــــ هانت يابشبوش .. سلام بقى ..
ــــ مع السلامه ياعبقرى ....
مشى العبقرى ؛ ونمشى إحنا كمان ؛ فما يعنينا من أحاديث محمود أفندى والباشا ؛ وقد انضم لهم
عم سيد الذى حضر بعد انصراف بهجت فى شىء ؛ ولنعد إليهم بعد اسبوع جديد ...

**********

هاقد عدنا فى الوقت المحدد للقاء ابطالنا ؛ لنرى الباشا ؛ ومحمود أفندى ؛ وعم سيد ؛ وقد
اتخذوا اماكنهم المعتاده؛ يعلو وجوههم البشر وهم يتحادثون عن النفحه التى حملها لهم أمس
عم سيد من الأستاذ بهجت ؛ كباكوره لإنتاج مشروعهم العملاق .. مائة جنيه بالتمام والكمال
لكل واحد ؛ أحيت فيهم آمال الثروه الواسعه ؛ ودفعتهم للصبر على غياب بهجت الذى لم
يعودوا يرونه ؛ وبالطبع لايجرؤون على زيارته كما يقضى الإتفاق المبرم بينهم ؛ لدرجة أن
بهجت بذاته هو الذى زار عم سيد ؛ وأعطاه المال لتوزيعه على الشركاء ؛ محملاً بسلامه
لهم ؛ وأمنياته أن يشملوه بدعواتهم بالتوفيق والسداد ....
لايشك عاقل فى سحر المال ؛ وانه يغير ويبدل من حال الى حال ؛ فلا عجب إذا لو راينا

يتبع