16-02-2003, 04:05 AM
|
#1
|
عـضو أسـاسـي
بيانات اضافيه [
+
]
|
رقم العضوية : 964
|
تاريخ التسجيل : 12 2001
|
أخر زيارة : 13-11-2004 (05:25 AM)
|
المشاركات :
986 [
+
] |
التقييم : 10
|
|
لوني المفضل : Cadetblue
|
|
......بخ ....
أهلين ..ونخش في الموضوع علطول
هذا واحد يحكي ويقول:
مساكم الله بالخيـــر
المهم وانا في عز النوم وهالحلووم إلا فجــأه رن التلفون .. وطبعا تلفونـّـا شايل ابوي منه كل الأرقام .. موب مخلي إلا رقمين التسعه والثمانيه .. يعني مالك إلاّ تدق على الشرطه ولاّ الدفاع المدنـي وغيره ماااافيه.. المهم اني رفعت السماعه واقول نعم ..
إلا وذاك الصوووت اللي يررد الرروووح..صووووت بنت .. واخوكم اذا سمع صوت بنت اوجعه بطنــه وانواااع الاسهاااال.. وقالت الوووووو.. انا ماعاد عرفت وش اقول انشلت براطمي وطلعت كني ياسر عرفات .. ال ال ال ال لوووووو .. قالت مين معاااي ..؟؟ قلت: معاك انا .. وهي اللي تضحك .. وانا قلبي احسه مووب طبيعي قـالبها سامري وتستنزل عندي الكبد والبنكرياس
انواع الررربكه .. وقالت لي : سوسو موجوووده ..؟؟ قلت لها : هــــاه وشو...قالت :سوووسو ....قلت :منهـــي!!!!!!؟؟ وضحكت للمرره الثانيه على التولي .. وقالت: يؤيؤ .. شكلي غلطاانه .. طيب آسفــه ... قلت لها:. لاعادي.. لاشكــرن على واجب .. (( دايم اسمع هالكلمه .. وجالس احتري الفرصه اني اقولها ..!! )) وقفلت السماعه.
تصدقون ماادري وش صار فيني حسيت بشعقريــره في جسمــي وان ودي اروح انبطــح في الحوش واكتب قصيـده هجائيه .. ياااااااالهوتي لايكون هـذا هــو الحـب اللي يقولوون (( نعن ابو الحب اللي تعرفه يالضفــدع ..!! :عاااااد انا ماتعودت على البنات لأن ما شاالله بيتنا فيـه خـمـسـطـعـشـر رجااااال اللي هم انا واخواني وابوي وامــي (( الله يخلف على ابوي واميمتي أنا ولدهم الكبير ..يع أفشل .. الله يسامحنــــــــي بس ))
المهم .. يعني انا واخواني ماشفنا بنت ابــد .. وهذا اللي سبب لنا عقــده تسمــى العقـده الفيسلوجيـه .. (( من وين جت ذي ..!! ))
المهــم .. انـا قررت انــي اتعرف على بنات بس فيــه مشكلــه وحـــده اللي هـي انـي ماعنــدي اسلوب ابــد(( يعنـي وقفـت على الاسلوب .. نعن بوبليسي أنا عندي الف مشكلـه مو مشكله بس .. واهمها مشكلــة الشكل))
الوكاد اني مالقيت قدامي إلا واحد مـن العيال اسمه عبدوش .. معروف ان البنات ما يعوقون معـه.. وانا اللي ألقـط مفتاح سيارتي واروح لــه .. وعلمتــه بوضعـي وان امنيتــي في الحياة اتعرف على بنـت قبل ما اموت (( اخسسس يالشايب ..! ) فقال لي: السالفه بسيطــه اذا بغيـت البنـت تحبــك حسـسـها انها احسـن وحــده فـي العالم ... قلت لـه: يعنـي وشلون يعنـي اقولها انتـي احســن مـن مارادونا !! وهو اللي يرفسنـي برجلــه فـي بطنــي .. وقال لي .. انت ثووووور .. وش دخل مارادونا يالغبـي !! انا قــصدي انـك تحسسها بانوثتها وان مافيه بنت غيرها في العالم. قلـت لـه :يعني وشلون مافهمت وهــو اللي يمحطنــي بيــده علـى جبهتـــي.. وقال لي: شوف انت أنواع الدباشـه والثواره فيك .. وماراح تفهـم إلا بالدروس العمليــه ويطلــع جواله ويــدق .. وقال لي : شووف انا اللحين باكلـم وحــده وتعلــم .. قلت لـه: طيـــب
وكلم وقال: هلا حياااتي هلا عمـررري هلا روووحي .. انا لــؤي حبيبـك ومجنونك (( الحمدلله على العقل .. نعن بوبليسك وين لؤي معه ...أبوجهل ويخب عليك ))وقام يقوول لها: احبــك وامووت فيــك انا بدونك مثــل البيـت بدون حاره مثل التلفون بـدوون حراره مثل السواق بدوون سياره انا الشارع وانتي الإناره انا مبنى التجاره العالمي وانتـي الطياره.. (( قســم بالله اني بغيـت أخمـّـه يووم سمعـت كلامه .. نعن بوبليسه لو يكلم جدار كان ذاب ))
المهم .. انه خلـص المكالمـه والتفـت لي .. وقال لي: يالله دورك, باعطيـك رقـم بنــت وكلمها,وقل لها نفــس كلامي ... قلـت لـه بكـل خجـل : طيـب .. وهو اللي يدق على بنت ويعطيني الجوال عشان أكلمها ..وأنا اللي أقول: الووووو ...
ويوم سمعــت صوتها ضاعت علومي .. ونسيـت كل الكلام .. وقلت لها :وين بابا ..!! وما حسـيت إلا بذيـك الجزمـه اللي لازقـه في مقفاي ... وقال لي:قـل نفس الكلام اللي قلتـه يالثور ... وانا اللي اقول لهـا: هلا حياتي هلا روحي وتعالي وكل شئ .. وقالت: طيب وبعــدين ... قلت لها: انا بدونك مثـل الكيبورد بدن فاره .. مثل السلطـه بدون خياره .. انا الددســن وانتـي الغمااره ... انا الصرصور وانتـي البياره ... انا طوووط طوووط طووط طووط قفلـت الخـط في وجهــي.
. قال عبدووووش: وش فيــك ؟ .. قلـت لـه: لا ابــد الخــط مشغول ...!! (( واحد مايعرف يصرف أبد ..!! )) ومادريت إلا وعبدووش مطلــع لوح فيه مسامير ودبجنــي فيــه اللين قلــت للعنــز ياخاله
المهـم .. اني رجعــت للبيـت وضايق خلقي .. وانا اللي ادخـل البيــت بشووويش عشان مايشوفني احــد .. واطلـع غرفتي واسكــر الباب وانام ... وفـي عــز النوووم .. دق جررس التلفون وارفع السماعه .. الا هـي نفـس البنــت اللي كلمتنـي اول مره .. قلـت: نعــم .. قالت : سوسو موجوووده ..؟؟ قلـت لهـا :. شوفي ..ترى منيب فاضيلك بيتنا كلــه شباب .. ومافيه احـد يبدا اسمـه بحررف السيــن . والبنــت كررتها ضحكــه .. وقالت ما شاالله دمـك خفيــف ...((هي تحسبني استهبل مادرت اني دلخ من جد )) وقلــت لها:شكــرا .. (( مسووي مؤدب ..!! ))
وسـألتنـي البنــت : وش تسووي اللحيــن ..؟ .. قلت لها:والله كنـت نايم ليه عندك مانع ..قالت : يؤ يؤ تنوم في الليل انــت ..!! .. قلت: اجــل متـــى انوم ..؟؟ قالت : لا انا انام في النهار واسهر في الليـل . قلـت لها: ليـش الاخـــت بووومـه ..!! قالت : لا بس الليل وقـت الرومانسيه انت تعررف الرومانسيه ..؟؟ قلت لها:لاوالله ماأعرف وحده بالإسم هذا !! (( مسووي فيها فاهم ))
وسألتنـــي :انت وش اسمــك ؟ قلت لهـا: مصيول..قالت :وش معناه .. قلت لها : هذا اسـم كلـب كان عنــد جـدي وسماني ابوي عليـه.. وسألتها: وانتــي وش اسمــك .. قالت :. داليدا .. قلت لها:. انا ابي اعرف اسمــك موو عيارتك ...!! قالت .. هــذا اسمــي ..!! بعدين قالتلي:اوكي اكلمك بكره لان امـي تناديني .. قلت موو مشكلــه ..
ومدري وشلون تطورت العلاقه .. وصرنا نكلم بعــض كـل يوم .. وانا انقلــب حالي .. ولاحظوا أهلــي انــي تغيــرت .. يعني نكون جالسين على الغـدا ولاّ العـشا وانا ما آكــل .. سارح واصبعي في خشمي ..
ولاحظوا أهلــي انـي صرت مؤدب واقرا واجد .. وانا اقرا عشان اعرف كلام جديد في الحـب .. تلقاني اقرا كتـب الشعــر والحب والطبـخ .. (( لا تستغربون لأن كتب الطبخ اتعلم منها كلام حلو بعـد مثـل .. ياعسـل , ياحليـب , ياكريم كراامل ..!! ))
المهم .. انه في ليلـه من الليالي.. قالت لي البنـت:مصيول.. اوصـفلي شكلــك ووش اهتماماتك ..!! ياولله البلشــه .. وش اقولها هذي هاللحين .. اعترفلها بالحقيقة المرة وأقول إني أحوم الكبد وإني تافه وماعندي اهتمامات ياربي وش أقول ...أقول وراه ما أنصب عليها مثل هالشباب اللي ينصبون ...
يعني تلقـى الواحد من الشباب شين ومنحط ويقعد يفك على البنات أنا مهندس وأنا وسيم وأنا عندي فلوس ......إيه بس يالله خلني أنصب
قلت لها : شوفي اناعيوني مثل عيون جواد .. وطولي مثل طلال الرشيـد .. وخشمـي مثـل خشـم خالد عبدالرحمن .. وملحـي مثل ملـح راشد الماجد .. ومهضوم كثير مثـل رامي عياش ...
الظاهر ان البنــت شكلها صدقت و خقـــّـــت معــي ((ذا المخفّه )) وقامت تشاهق من الفرحه .. قمت وسألتها : طيب وانتي اوصفيلي شكلـك .. .. قالت :.. ما اقدرر لما تشوفيني بتعرف لأن مالي شبييـه .. (( اخسس يا بريتنــي ..!! )) .. وانا اللي افـك خشتــي وسعابيلي تقوطر , كني كلـب شايف له عظمــه ... وقلت لها: يعني باشوووفك ..؟؟ قالت اكيــد .. انا بكره باروح شاليهات اليمامه اللي على طريق الرياض الخرج ونتقابل هناك .. قلت لها: بس هذيك للعوائل بس .. قالت :عاد انت دبر نفسـك ... قلت: اووكي موو مشكلــه بس كيف اعرفك ... قالت :بيننا الجوال .. اذا وصلت كلمني وانا اعلمك وين تلقاني .. قلت لها: خلاص الوعـد هناك ....
المهم .. اني انا توهقت .. وش لون ادخــل الشاليهات وهي للعوائل ... وقلت مالي الا عبدوووش .. اتصل عليه واتفاهم معاه ودقيت عليه .. ورد علــي وقالك بعصبيه: نعم وش تبـي يالغبـي ؟.. وعلمتــه بالسالفه من سلسل اللين طقاق عليكم ..((تراني اقصد من طقطق اللين السلام عليكم بس مدلخ شوى ))وقال لي: والله صعبـه وش بتسوي .. قلت له:. وش رايك تلبس عباة وتسوي نفسك حرمه وتروح معي على انك زوجتي ... وهو اللي يتغير وجهه وقال: انا ولـد ابوي .. قلت له : بالله .. تووني ادري كنت احسبك ولد ابوي انا ..!! قال : تستهبل إنت ويا وجهك .. انا اسوي نفسي حرمه .. ياويل ويلي ويلاه .. خيل الخيـل خيالها .. قلت له:. يارجال كلك تبـن لادووس في بطنك .. جالسين في مضارب الباديه احنا ..!! .. قال لي: لا يا مصيووول هذا شي ما اقدر عليـه .. وش اقوول :للجماعه ..؟؟ قلت له: ومن قالك اننا بنحضر عرس .. حنا بنروح الشاليهات .. وانت ماراح تكشف وجهــك ابــد .. قال : طيب ليش انت ماتسوي نفسـك حرمه وانا الرجال ..!! قلت لـه: ياخوي انا ما اقدر .. لاني لا رجال نافع ولا حرمه نافع .. وبعدين افهم يالغبي ... قال لي :خلااااص .. بس لااحد يدري ... قلت لـه :ابشــر .. بس جهز نفسـك بكرره بامرك ونروح
وأخـذت سيارة واحد من العيال .. ورحــت لبيت عبدوووش ولقيت عنـد بابهم شحاده....وهي اللي تجـي تبي تركب .. قلت لها: الله يعطينا ويعطيك ياخاله .. وهي اللي تطق قزازة السياره شوي وتكسرها .. وانا اللي اطلع من جيبـي ريال ونص كنت ناوي اشترري فيـه تويكـس .. بس قلت موو خساره فيها عشان الله يوفقني .. وتوني افتح الدريشـه باعطيها .. إلا وهي تقول افتح الباب الله ياخذ هالراس ..... الصوت موب غريب علي ..
يوووووووه عبدوووش.. قال: اييه عبدوووش الله لا يبارك فيك .. افتح بسررعه قبل ما يطلــع احد من هلـي ... وفتحــت لـه الباب وركب .. وانطلقنا للشاليهات ...
To be continue
يتبـــــــــع ..
--------------------
اتكاءة الحروف:
إذا ماخلوت بريبة في ظلمة ...... والنفس داعية إلى االعصيان
فاخش من نظرالإله وقل لها ...... إن الذي خلق الظلام يراني
|
|
التعديل الأخير تم بواسطة لمياء ; 16-02-2003 الساعة 04:31 AM
|