نفساني - عرض مشاركة واحدة

22-12-2010, 07:15 AM

بس كل يوم كان شكلي وااااضح اني بأنحف اكثر واكثر وصاروا يمدحوني على رشاقتي يعني قعدت شهر ونص امكن ولا شخص عرف الموضوع يقولوا لي بتعملي رجيم ؟؟ وشايفين وجهي كل يوم بيتعب وينحف والهم والحزن مغطيه فبدات تراود ماما الشكووووك وكل شوية تسألني تقول لي فضفضي لي في شيء بتفكري فيه حاستك مهمومة وأنا لاتعليق , بس أنفضحت لما تركت الجامعة لأني ماني قادرة اكمل أكثر في هذه الحياة ,غبت عن الجامعة ثلاثة أسابيع وقدرت أعطي ماما وبابا أعذار بس بعد كدة ماما شافتني وسالتني ليش مابتروحي الجامعة؟؟ وأنهرت بكاء وحكيت لها كل شي وانهرت بس والله حسيت انه في احد حيشيل معايا همي ويدعي لي وبعد كدة بدأت رحلة العلاج رحت اول شيء شيخ يقرأ علي وكنت اتمنى اكون مسحورة او محسودة عشان اتعالج عنده بس طلع مافي شي , وارتحت بعد الجلسةيوم كامل حسيت بهدووء نفسي وانشراح وحسيت اني خلاص شفيت خخخ بس ثاني يوم رجعت حليمة لعادتها القديمة بكاء, وخوف, وحزن, وهم, واحاسيس غريبة وطول الوقت أصلي, وأدعي, وأبكي وأقطع في شعري وأقرا قران بطريقة جنونية الى أن بدأت أكره حتى الصلاة وفي يوم من الايام جبت سكينة وجرحت كفي وحسيت هنا اني فقدت السيطرة على نفسي وبس لما ماما شافتني ثاني يوم رجعت لحالتي بس طبعا ماشافتني وانا السكينة في يدي كان أتجننت ,المهم اقترحت علي نروح دكتور نفسي قلتلها لا ما حيفهمني قلتلها ماله داعي ما أبغىىىىىىىىىى أروح صعب احد يفهمني وبكاء طبعا , قالتلي طيب فكري وشوفي ماحتخسري شي لو رحتي ادا ما أستفدتي على الاقل تكوني عملتي اللي عليكي تفضفضي لشخص فااااااااااهم وقلت طيب ورحت للدكتور النفسي وأول ماشفت وجهه بكيت بكاء انهياري؟! وصرت أفضفض له مااتوقعت اني حأكون مرتاحة بس والله مرة كان طيب ومريح نفسيا ولافتح فمه بكلمة خخخخخ وقالي عادي كثير زيك وانتي تحسبي انك غير عندك اكتئاب بسيط وكتب لي حبوب , والله اظن انه بعد ما أخدت هذة الادوية بكم يوم رجعت طبيعية ومتفائلة ماشاء الله وقلت وه ليييييييي ضيعت شهور حزينة , وأذيت نفسي بسكين ليش ؟؟ ضيعت تررم كامل من الجامعة ؟ ليش شوهت شعري الغزير اللي كل ماأحد يشوف شعري يمدحه الين ماصار كله فراغات كاني عجوزة تعبان وضعيف وباهت شهور مسكين وأنا أقطع فيه . نصيحة من حساسة على الفاضي والمليان الى حساسة ثانية >> انك تقولي اللي بتحسيه لأحد تثقي فيه وترتاحي تفضفضي له أمك ,أو أختك وأو صحبتك وحطي نفسك مكانهم لو كان في أحد من أخواتك او امك تعاني اللي بتعانيه وبتفكر تنتحر بس ماتبغى تقولك ولا تقول لأحد ! ايش حيكون احساسك؟؟؟ عارفة كلامي كثير بس باحاول اوصل لك وضعي بالتفصيل وفي ناس عانوا اللي بتعانيه وأتعالجوا وارتاحو ا.