|
Effexor xr .. withdrawal journey diary
بسم الله الرحمن الرحيم
السلام عليكم
كيف حالكم حبايبي ؟؟
الهدف من الموضوع هذا هو المشاركة في رحلتي للتوقف عن استخدام الإفيكسور
و متأكد كثير ممن يستخدمونه مثلي يعانون من الأعراض الجانبيه للتوقف عن استخدام هذا الدواء
و تحملوا فضفضتي هنا .. و إن شاء الله تلقون بموضوعي هذا اللي يفيدكم و يساعدكم على التخلص منه
حاليا انا في آخر مراحل التوقف عن الدواء اللي بديتها قبل اكثر من 6 شهور
في البداية بديت بتقليل الجرعه ليوم ورى يوم و من تلك الأيام بديت اعاني من اعراضه
قعدت تقريبا 3 شهور و بعدها خففت الجرعه لمرتين في الاسبوع لمده 3 شهور ثانيه
و بعدها صرت آخذ حبه اسبوعيا لمده شهرين و بعدها اتوقف
باقي لي حاليا شهر و نص و اوقف العلاج
المهم بالموضوع هي الأعراض السيئه .. اغرب و اغبى اعراض جانبيه مرت علي
و ابذكرها وحده وحده
1
الصداع .. أغبى صداع ممكن تحس فيه .. مره صداع نصفي .. مره صداع قوي .. لكن دايما تحس ضغط راسك عالي .. و تحس انك مشدود و معصب .. و ما ادري وشلون اوقفه .. كل مره له مزاج .. مرات ينفع معه البندول .. و مرات ما ينفع معه الا الاسبريسو .. و اول مره اشوف بحياتي صداع ما يخف الا بدبل شوت اسبريسو :tongue: .. و اوقات ما ينفع معه الا انك تحط سماعات بأذانك و تشغل لك واحد يزاعق بأعلى صوته خخ
2
النفاضات .. او brain zaps .. سيئة جدا جدا .. تحس ان فيه كهربا تنفضك من رقبتك و تطلع تضرب شوط براسك .. و ما تحس الا براسك ينفض و رقبتك توجعك .. كأن واحد متحمي لك و صاكك بأحلى مخمس بين السامع و الدامع على قولتهم هع
3
إكتساب الوزن .. :( :( :( .. مضايقني كثيييييييير .. أجل أكثر من 15 كيلو :( و ما زال في ازدياد !! .. و الشهيه و عادات الأكل اللي تلخبطت كثييير .. توي آكل و جوعان .. أحيان ما افكر الا اروح لماك و اضرب لك بأحلى برجر .. و الا احوس امها كبسه .. و ما شاء الله أكل المطاعم صحي و خالي من الكلوستيرول و ينحف :tongue:
4
فقدان التركيز .. ماني قادر اركز بدراستي ابد .. او اتابع مع الدكتور بالمحاضره .. و الصداع و النفاضات ما تزيدها الا سوء .. حتى بالأشياء العاديه .. دلخ 666 .. اضيع حتى بالسواليف .. اذا احد جاب لي سالفه و الا نكته ما افهمها و لا اتابع معه .. و يا احووول يرجع يعيدها على مسامعي خخ .. او ينبهني على موقف او مشهد قدامي أخذ فتره حتى استوعب وش يبي بالضبط :tongue:
5
الكوابيس اللي ما ادري وش تبي ... و لا انسيبشن ههع
6
الكسل .. وش اقول عنه بس .. تعرفون الكسلان اللي كان يطلع مع اضحك مع غير البشر ؟؟ .. اقوى منه !! .. دبل كسل !!
7
نوبات الإكتئاب .. ترجع :frown: .. بعض الإحيان تحس بسووووء فضيع .. بعض الأحيان ما تدري وش تحس به .. ما تحس بشئ !! .. لا مبالاة فضيييعه .. feeling dull .. تمل من كل شئ حولك .. ما فيه شئ ممكن يسعدك .. تشعر بالأسف على حالك .. تحس انك ناقص و ناقصك شئ .. رهبه و تردد و خوف .. قلق غير مبرر .. تقلبات بالمزاج و احاسيس كوكتيل :frown:
8
نوبات خفقان و صعوبه في التنفس .. و تتعب بسرعه .. !!!
9
اعراض انسحابيه .. ما ودك تقعد مع أحد و تكره الناس و جمعتهم .. بس تبي تجلس لحالك :frown: .. ما اطلع مع اخوياي .. لدرجه بعض الاحيان اسحب على الجامعه و اتكي بالشقه .. الاسبوع هذا غبت يوم و الماضي يومين !!
آخر شي هو تقلبات النوم .. برنامج النوم متلخبط له أكثر من 4 شهور خخ
فيه باقي اشياء بس موب دايم تجيني .. مثل الغثيان .. زغلله و عدم وضوح رؤيه
الأعراض تختلف كثير من شخص لآخر .. و دخلت ابحث عنها و لقيت ناس كثير يعانون مثلي
ابحاول بقدر الإمكان من خلال الموضوع هذا اني افضفض و اتخلص و اقلل من حده بعضها خاصه النفسيه منها .. او اذا لقيت شئ ممكن يفيد بتخفيف الأعراض اشاركه معكم
و اذا فيه احد يعاني مثلي يشارك بالموضوع و يفضفض بكيفه .. و نحاول نشجع بعضنا في رحلتنا نحو ما يسمونه detoxification و نكون افيكسور فررري و اعراض جانبيه فرري و نرجع طبيعي أحسن من ما كنا قبل أو خلال استعمال العلاج
|