الى من ظلمه الحبيب
ثم عاد عليه باللائمه يعيب !!
إسأل روحك؛؛ إسال قلبك
قبل ما تسأل إيه غيَّرنى
أنا غيَّرنى عذابى فى حبك
بعد ماكان أملى مصبَّرنى
غدرك بيَّا ؛؛ أثَّر فيَّا
واتغيَّرت شويَّه شويَّه
اتغيَّرت ؛ ومش بإديَّا
وبديت أطوى حنينى إليك
وأكره ضعفى وصبرى عليك
واخترت ابعد ؛ وعرفت أعند
حتى الهجر؛؛ قدرت عليه
شوف القسوه بتعمل إيه ؟!
******
كنت زمان بألاقيك بحنانى
بحر محبه وبر أمان
كنت بأحس ان انت زمانى
يومى ؛؛ وبكرا ؛؛ وبعده كمان
كنت بأشوفك بعيون حبى
وانت بعيد ؛؛ أو وانت بقربى
أقرب من بسمتى لشفايفى
أقرب من إحساسى لقلبى
بعد الود اللى رعيتهولك
بعد الحب اللى وهبتولك
بعد العمر اللى أنا عشتولك
فيه إيه تانى أقدمهولك ؟!
غدرك بيَّا ؛؛ أثَّر فيَّا
واتغيرت شويَّه شويَّه
اتغيَّرت ؛؛ ومش بإديَّا
وبديت اطوى حنينى إليك
وأكره ضعفى ؛ وصبرى عليك
وإخترت أبعد ؛؛ وعرفت أعند
حتى الهجر قدرت عليه
شوف القسوه بتعمل إيه ؟!
******
أنا مانسيتش الحب وعهده
ولا أيامه ؛؛ ولا لياليه
أما إن كان ع الحب لوحده
من غير هجرك : أهلاً بيه
دا أنا لوَّعنى هواك
وأنا عشان أنساك
بأبعد عن كل مكان
رُحته ؛ ولو مره معاك
وأهرب من أقرب ناس
يعرفوا قصتى ويَّاك
وبأغيَّر أى كلام
بيجيب سيره لذكراك
وصَّلتنى للحال دا بإيدك
بعد ماكانت روحى بإيدك
سبتك ؛ ومافيش حد ف عمرى
يشغل بعدك قلبى وفكرى
سبتك من غير حتى ماأفكر
حأقدر اسيبك ؛؛ أو مش حأقدر
غدرك بيَّا ؛؛ أثَّر فيَّا
واتغيرت شويَّه شويَّه
اتغيَّرت ؛؛ ومش بإديَّا
وبديت اطوى حنينى إليك
وأكره ضعفى ؛ وصبرى عليك
وإخترت أبعد ؛؛ وعرفت أعند
حتى الهجر قدرت عليه
شوف القسوه بتعمل إيه ؟!
******
إسأل روحك ؛؛ إسال قلبك
قبل دا كلو : اتغيروا ليه؟؟
أنا غيرنى عذابى فى حبك
لكن انت : غيرك إيه؟؟
هو حنانى عليك قسَّاك
حتى عليَّا؟؟
والا رضايا كمان خلاَّك
تلعب بيَّا؟؟
والا تسامُح روحى معاك
غرَّك فيَّا؟؟
أنا ياحبيبى صحيح بأتسامح
إلا ف عزة نفسى وحبى
وأما يفيض بى مابأعرف أسامح
وأعرف آجى كتير على قلبى
غدرك بيَّا ؛؛ أثَّر فيَّا
واتغيرت شويَّه شويَّه
اتغيَّرت ؛؛ ومش بإديَّا
وبديت اطوى حنينى إليك
وأكره ضعفى ؛ وصبرى عليك
وإخترت أبعد ؛؛ وعرفت أعند
حتى الهجر قدرت عليه
وانت ياعينى ؛ لوفى مكانى
كنت حتعمل غير كدا إيه؟؟!!
إسأل روحك
كلمات / عبد الوهاب محمد