نفساني - عرض مشاركة واحدة - هذا ما حدث لي بسبب التوتر والانفعال الي انا فيه

08-04-2011, 01:23 AM

شوفي أولاً بسبب اللي صار وياج اليوم أعتقد مفروض ما تنطرين ليوم الأحد وانتي تبين حل إلحين تاخذين السيبرالكس ولا السيروكسات وكل واحد بوضع اللي انتي فيه أخس من الثاني وما أظن بتلقين رد سريع من مثل د.رعد بوقت مثل هذا

فأنا أقترح كحل سريع لـ إلحين تروحين طوارئ مستشفى الطب النفسي ومفتوحين علطول ترى شفتات..مع أنه صح ممكن يطلعلج طبيب اخرطي شوي انتي وحظج بس بهالوقت للويكند خياراتج محدودة...وديري بالج يقولونج دشي المستشفى انسي انتي تبين الحل المؤقت بس! ترى داخل المستشفى عالم آخر وأي شخص يديد ينقط بجناح 16 ولا 15 و وخري عنه لا يحوشج مابي ادش بتفاصيل أكبر غلطة سويتها قبل بس كنت منهارة وفاقده سيطرتي

ثانيا بالنسبة لدكتور الأعصاب انسيه

لو تبين الادوية لازم تروحين مستشفى الطب النفسي حتى سمعت لو رحتي خاص والدوا يحتاج وصفة لا ترجعين للطب النفسي للدوا والله أعلم من المعلومة بس في بالخاص استغلاليين

بالنسبة لمنو بالطب النفسي أنا شايفه سبعة

بس مادري بطاقتج المدنية على أي منطقة قبل ممكن تختارين أي دكتور مع انه لازم حسب الوحدة التابعة لمنطقتج بس ما كانوا مشددين بس إلحين شددوا شوي

أنا بقولج اللي عرفهم وانتي جربي الصبح فتح الملف وفي العصر لو خايفه أحد يشوفج أنا شافوني طلبة ميداني وانكشفت فديري بالج إلا إذا ما تعرفين أحد له سبب يروح هناك فلا تحاتين

الخلاصة الكلام المهم دكتور بدر بروسلي دين وموجود الاثنين الصبح بس مجرم بمعنى الكلمة بدون مبالغات ويعطي ادوية بس تسكيته ويزيد فيها وبعدين ادوية ثانية للأعراض الجانبية إلى ما لا نهاية وبقص عليج بيقولج لو تدشين المستشفتى أحسنلج وطعته وندمانه وكتب بالملف بلاوي عني مو صدج مثل اني مو بنت مع اني مو متزوجة وووو يمكن لأنه دين بس بعقليه صعبه شافني سفور فعباله اني رايحه فيها بس الحمد لله محتشمه وملتزمه فمادري شنو سالفته

عندج عادل الزايد هم من الاول مع المريض قبل أي شي بيطلب تدشين المستشفى لمدة مو محدودة عشان يلاحظونج ويعرفون انتي شنو....فانسيه

الدكتور حتى الاخصائي مهدي أعتقد صغير وما عنده خبره وما يدري شالسالفه فانسيه

الدكتور سلطان مصري من الاول لا يفهم ولا يستوعب شي والتواصل معاه صعب وحولني لـ التالي

الدكتور باسم بدر خوووووووش دكتور وعنده خبره ويهتم بمصلحتج مو بس يقط عليج أدوية ولا يقولج تفضلي دشي المستشفى بس للأسف حولوني غصب بس حاولي معاه لـ التالي موجود الصبح الخميس والعصر شنه الاثنين والله نسيت بس اعتقد الاثنين بس لفتح الملف اول مره لازم الصبح وقبل الساعة 12

دكتور مصطفى محمود تتوقعين من كبر سنه وخبرته انه زين بالاول يتهيألج انه من أحسن ما يكون بس بعدين ينقلب هذا بعد 4 زيارات تخيلي وما يحب تحاورين ولا تسألين ولا تفهمين شي سكتي واخذي الدوا بس ويألف أعراض من عنده مادري من وين يابها ويصر عليها ويحب يعطي أدوية ثقييييلة جرعاتها عاليه وما تهمه مصلحتج

والدكتوره ناهد ألعن دبلات اول ما شافتني سمعتني وايد كلام خرابيط وتقول لازم تاخذين أي أدوية نعطيها لج بغض النظر عن أعراضها الجانبية وانتي لازم تتحملين فانسيها

وآخرهم دكتور أوهير نيجري قلبه ابيض وطيب لأقصى حد ويهتم فيج ككل مو بس يقط عليج أدوية ومع السلامة وما يخليج تطلعين إلا وانتي راضيه ومرتاحه ومو متسرع بقرارته 5 أو 10 دقايق ومقرر شنو الدوا اللي يناسبج خووش دكتور موجود بس الاربعة الصبح بس نصيحة لا ترضين بعلاج نفسي بعد منه لأنه يحب يعطي الاثنين من نفسه دوائي ونفسي بس بالنفسي يتعب وما احس انه شاطر ويدوخج بس بالأدوية امتياز

وانا انصحج وانصح الكل واعيد وازيد لا تعتمدين على الادوية النفسية وبس ترى كله تشتغل على الاعصاب ولمدى طويل مو زينه للجسم ووووو ممكن اتكلم فيها لباجر

انا كنت بحالة جداً سيئة جدااااااااااااً اقولج فوضى والحين بدون ادوية لأني خذيت علاج نفسي بعد مع الدوائي وتعلمت اشلون اوقف على ريولي واعتمد على روحي بدون ادوية

فأنصحج من تجربتي بالاول خليهم خطين متوازيين دوائي مع نفسي وبالتدريج شوفي نفسج ووقفي الدوائي بعد ما حسيت برحلة العلاج النفسي انج متمكنة من نفسج صدقيني والله مهم وايد مو شويه

وبدون لف ودوران مالي غير الدكتور جاسم الخواجة شاااااااااااااطر ويهتم جد بشغله ومصلحتج وسلامتج وطيب وخبرة طويلة موجود في مكتب الانماء الاحد مسائي من 4 لـ 8 و الثلاثاء صباحي افضلج تروحينله هناك بعد ما تحطين موعد دقي عليهم وطلبي فاطمة دشتي من البدالة او قوليلهم حولوني لـداخلي 217 أو ممكن تكلمينه بالتلفون أفضل او تروحينله الرميثية بمركز الاستماع العصر من 5 لـ 8 وموجود بعد بالرقعي بمجمع المحاكم بإدارة الاستشارات الاسرية والروضة بس متى اي ايام وأي أوقات مادري

بس الانماء أهدى واريح في العصر وأنا اروحله في الحالات الطارئة بس للرميثية

في حال قالولج ما يصير تروحلينه لأي سبب من الاسباب لأنه عليه ضغط او شي حاولي بالاستاذة بشاير الزواوي بس اصري على جاسم اول

وأي سؤال انا حاضرة؟

واسألج هو الاكتئاب المشكلة الوحيده عندج ولا معاها اشياء ثانيه؟

لأن في ادوية ودي انبهج عليها بعد احياطي بس يعتمد شنو عندج بالضبط

وآسفة طولت عليج بس مو سريعه بالطباعة وابي اقولج كل شي