مشتاق لك حيل
مشتاق لك حيل ودّي بك تناجيني
ودّي طموحي تضمّه في طموحاتك
يا ليتني كلّ ما أنادي لك تجيني
أتعَب عشانك و ألبّي كل ّ راحاتك
بُعدك عذابي و قربك لي ينجّيني
يا ليتني دايمٍ صوره بلوحاتك
ما غيرك أحدٍ من الّلوعات يشجيني
دنياي تدْهِر بدون زهور واحاتك
ارجوك دايم مثل ما أرجيك ترجيني
ياللي جمالك يكفّي منه لمحاتك
خلّيك قربي من الدّنيا تفاجيني
تنزع علي صفحتي من ضمن صفحاتك
أهل الهوى في الهوى مثل المساجيني
يالله عسى ما أنحرم عطرك و نفحاتك
أبي عيونك تبسّم و الحجاجيني
في صورةٍ لّك قبل لِبسك لطرحاتك
لا ضاق صدري رجعت لْها تهجّيني
فيها أتصبّر إلا طوّلت روحاتك