نفساني - عرض مشاركة واحدة

05-05-2011, 02:40 AM

السلام عليكم د رعد

بختصر لك الي صار وبحط لك بعض الرسايل الي ارسلتها للحوارني الي ما قصر معاي

وكان خير معين بعد الله وبعدك

كان بيني وبين زوجي خلاف بقينا 20 يوم ما نكلم بعض

وانا بعد ما احترت بعد يوم طويل من البكاء واللام والحيره
يا اطلب الطلاق او اروح بيت اهلي مره ثانيه او ابقى بالبيت واطنشه

صليت ركعتين استخاره ربي هداني اني ابقى بالبيت واطنشه ولا كانه موجود

لا اطبخ له ولا اهتم به اطنشه
وطبعا بعد ما طردني من البيت والح علي صرت ما انام معاه

وعشت 20 يوم قاسين بين خوف منه وبين تطنيشه

ما تصالحنا الا قبل يومين من مبادره مني لافهم ايش بيصير

وهذي بعض رسائلي ورد الحوراني عليها ...

..............................

السلام عليكم استاذي

الوضع مثل ماهو لا اكلمه ولا اهتم به ولا كأنه موجود

لكن من الواضح انه بدا يفقد الصبر ويخاف من صمودي في الاغلب انا اجي اعتذر له علشان نحل الاشكال ويخف التوتر بالبيت لاني اتعب من الوضع وهو يكون يطول لسانه طول الوقت
بس هذي المره ما صار شي بالعكس صااامده للاخير

امس حسيت انه بدأ يستنزف كل اوراقه صار يمسك الاولاد واحد واحد ويتكلم عني ويشوه سمعتي ... م قادره اتخيل الي صار اول شي مسك بنتي الي عرها 18 سنه وبعده ولدي الكبير 20 سنه
بعدها تخيل مين؟؟ بنتي الي عمرها 8 سنوات
لمن هذي البنت مستحيل احد يغلبها في الكلام ولانها تحبني وااااجد ما قدر يقول فيني شي كان باب الغرفه مفتوح وصوتهم عالي وسمعت الكلام كله...الكبار ما قدروا يدافعون عني والبنت الصغيره قدرت

بس هذا الوضع تعب نفسيتي كثير ما توقعت يوصل لهذا الحد

انا فسرته لانه شاف اني ما اهتميت بزعله واستمريت اعيش حياتي اروح الكليه والمدرسه للتطبيق واي شي ناقص بالبيت اطلع مع ولدي

طبعا منع منا المصروف لكني بعت ذهبي وصرفت على البيت والاولاد

امس قال لولدي الصغير لا توصلها اي مكان الا للضروره وبعد ما تاخذ الموافقه مني!!

تخيل يقول لولدي حنا ما نعرف وين تروح وشتسوي؟؟؟ قاله ولدي انا اوصلها واكون معاها ؟؟؟
قال الكمبيوتر ما نعرف شتسوي فيه و وين تدخل وشتشوف !!!

قمت اضحك على حالي وعلى عقله المسكين

وزاد همي ان لو تصلح الحال اشلون بقدر اتعامل معاه واعيش معاه

والله وربي العظيم اني ودي تكبر المشكله ويطلقني وارتاااااااااح ...

بس ما ابيها تطلع مني ما ابغي اعيالي يلوموني واصير متهمه في نظرهم

الحين كلهم معاي وفي صفي ... وضده

الى متى هذا الحال ما بعرف؟
.............

مرحبا زنبق
طالما أن اولادك كلهم معك وضده ، فأنت بخير ،،،
ولو اضطررت للخلاص منه بالطلاق فلا تترددي ، خصوصا ان اولادك كبار مو صغار ،،،
خليك قويه ، ولا تقبلي بالإهانه ،،،
...................

صباح الخير

السلام عليكم استاذي الحوراني

استشاره ضروري لاني خايف مره ارجع الحياة معاه وارجع اعيش نفس الايام
واسمع نفس الاهانات خايفه كثير

امس ولدي الكبير يقول ان ابوه ساله عن ما كينة خياطة كنت ابغي اشتريها من سنوات بس سعرها غالي
وزوجي ما كان يوافق. يشتريها لي لانه ما يبغيني انشغل باي شي وما كينتي القديمه هو رماها

هو اصلا ما يوافق يشوف عندي شي يشغل وقتي وان كان كمبيوتر او كتاب

المهم ماراح تفهم كلامي لانه يحتاج شرح

لكن الي بيصير. انه بيشتري لي الماكينه كما سمعت علشان يراضيني

يسويها كذا مره اذا غلط غلط كبير ويبغيني اسامحه
يشتري لي شي يرضيني
وانا هذي المرة خلاص تعبت ما ابغيه وما ابي ارجع مثل اول خايفه جد
انا جابها. بيكون ورقة ضغط علي وجدام الاولاد بكون انا الي ابغي ازيد الحاله

وبيلوموني العيال وبيصيرون ضدي...... تخيل شنو هذي الحاله الي نخاف من نظرة الاولاد وحنا المظلومين

محتاره
.............................................

مسا الخير زنبق

إن رفضتي الماكينه سيقول للأولاد أن امكم ترفضها ، وانها وأنها وأنها ،، والكثير من الكلام يعلم الله كيف سيقولها للأولاد
وراح يكون للأولاد انك انت اللي رافضه الهديه ورافضه الصلح ،، وبتكوني متهمه امام الأولاد ،،،،

ولو قبلتيها ، بترجعي لنفس الموضوع ، وبرضه بتكوني متهمه ،،،

يعني خيارين أحلاهما مر ،،،،، وأعتقد الصح ان تقبلي الماكينه ، لأنك بكل الحالات ستكونين انت سبب المشكله ،،،،

ربي يعينك يا زنبق ، والله شكلك عايشه مع إسرائيل مو مع الإسلام ،،،

.........................

والله انك فاهم الوضع تمام

لكني الحين تعبانه كثيرة لدرجة احس اني مريضة مو قادرة اسوي شي

قرار لو اتخذخ بيلوموني اولادي واهلي والناس

وقرار لو اتخذه برجع لنفس الوضع القديم وما احد بيحس بي ولا بيعيش حالتي غيري

خااايفه بجد خايفه ارجع لنفس الحياة حتى لو سامحته او اخذت عليه عهد و وعد

ماراح يتغير شي هي يومين بس ويرجع مثل اول
.........................................

انا فاهم مشكلتك يا زنبق
وأنت بين نارين ، ويجب أن تختاري النار الأقل ضررا ،،،
قبولك للماكنه افضل لك من رفضها ،،،
واعتبريها الفرصه الأخيره ،،، ولا تعطيه فرصه يثبت انك السبب ،،،

ربي يكون معك ،،،،،
........................................

>>> هذا الي حصل

لكني اللحين اعيش الازمه بعد الخلاف والصلح

احس اني مخنوقه مع انه معاي زين لكن من خوفي من الي جاي وتكرار الخلاف

صرت مرعوبه من اي شي

انفاسي ضيقه وقلبي مقبوض

وما ابي اشوف احد اليوم زيارة اهلي وما رحت ما ابي اشوف احد او اسمع احد

ربي يعديها على خير

هاااا وشرايك بهذا الحال ؟؟