المشاركة الأصلية كتبت بواسطة متحطم

السلام عليكم

مشكلتي بدت في عيد الفطر الماضي قبل 7 شهور تقريبا والله لا يعيده من يوم
انا شاب عمري 21 سنه وضعي كان زي العسل واحلى عايش حياتي بسعاده ما تنوصف وما عرفت قيمتها الا الحين
لاهم ولا قلق ولا خوف ولا ضيقه ولا ولا ولا .. الخ الخ
مشكلتي هي ..
في رابع العيد او خامس العيد اتصل علي صاحبي يبي يمرني نطلع ونغير جو طبعا وقتها كنت اعاني بكتمه لها ثلاث ايام تروح وتجيني وما اعطيت للموضوع اهتمام كبير قلت يمكن من تغيرات الجو او ما الى ذالك
قلت في بالي مجرد ما اطلع واغير جو انسى كل حاجه طلعت معه بالسياره واحنا ماشين بالطريق وقفنا عند محل
تقريبا 15 دقيقه لحظتها حسيت بشي غريب من حولي يعني كني وسط حلم والدنيا صايره ثقيله احساس غريب
يعني مع احترامي لك يا دكتور حسيت اني كني محشش ومنكمخ وجالس بوسط تابوت ومقدر اتحرك
قلت لخويي خلنا نمشي لاني وقتها حسيت بالكتمه ترجع واحنا ماشين بالطريق دخلنا بشارع مزدحم ومقفل من اوله لاخره في اللحظه ذي من شفت المنظر جاتني نوبة خوف ما تنوصف ضربات بالقلب قويه من قوتها حسيت اذاني بتنفجر وضيق بالتنفس وبروده في يديني وتلعثم بالكلام يعني انتظر ملك الموت يطلع لي لاني حسبت اني بموت هذي لحظتي خلاص شريط حياتي كله مر قدامي في ثواني قلت لخويي رجعني البيت بسرعه مع انه اصر يوديني المستشفى بس رفضت ورجعني البيت ومن رجعت البيت وشفت اهلي رجعت الامور لطبيعتها راح الخوف وراح كل شي وارتحت وكانه ما صار شي ومن بعد هالموقف صار عندي خوف من اشياء كثيره

1 / صرت اخاف من زحمة السيارات مجرد ما اشوف زحمه اتجنن احس بكتمه وضيق بالتنفس وضربات القلب تزداد وارتباك ورجفه في رجولي ويديني ودي اهرب من الموقف اللي انا فيه حتى صرت ما عاد اسوق سياره الا اذا كان معي اخوي الكبير لانه احسه مصدر اماان من اكون معه

2 / ما اقدر اجلس لوحدي نهائيا احس بنفس الاعراض يعني اذا فيه مناسبه زواج والا شي معين احسب حسابها كيف اجلس لوحدي وكيف وكيف حتى اهلي ملوا من وضعي اللي غير مبرره وتصرفاتي مثل تصرفات الاطفال
حتى احيان وانا نايم افز من نومي اشوف اهلي فيه ولا لا ,, ادري انه وسواس ولكن مثل ما قلت اخاف من الوحده وهذا الشي زاد معاناتي سبب لي تحطيم نفسي ومعنوي فقدت لذة الحياه تمنيت اموت ولا اعيش هذي العيشه الكئيبه طول وقتي قلق ومهموم وحزين وحاس بغصه بوسط صدري ومتحطم وحساس جدا حتى اني تركت جامعتي وسحبت ترمين والسبب لاني مقدر ابعد عن البيت لان من بداية العارض اللي مريت فيه
كني بوسط دائرة وكل ما له تضيق علي يعني لدرجة انا صرت منعزل ولا ارد على جوالي وطلعاتي من البيت قليلة جدا وكل من اتصل وطلب مني اخرج معه اصرفه باي تصريفه لاني اكره الزجمه ولا ابي امر بنفس الموقف اللي مريت فيه
وايضا لا اخفيك صار معي كتمه مطفشتني وثقل بالراس و صداع مزمن والم بالبطن راجعت دكتور يقول معك شد مدري تيبس بالقولون في فم المعده دايم معي احساس بالغثيان وصداع لدرجة اني ادمنت على البندول بشكل غير طبيعي والله العظيم ان حبة البندول في بوكي وين ما رحت لان اذا زاد الصداع يجيني استفراغ وانت بكرامه

//

اعتذر على الاطاله بس بغيت اوضح مشكلتي بكل تفصيل وانشالله تكون واضحه
اتمنى تشخص حالتي يا دكتور رعد ما هي مشكلتي بكل تفصيل

مشكلتك ياأخي الفاضل انه اصابتك نوبة هلع في مواقف ثم ارتبطت بالمواقف واصبحت مخاوف من تكرارها في مثل تلك المواقف. الهلع والمخاوف والوسواس من الموت هي مشكله واحدة مترابطة وكلها بسبب نقص مادة في الاعصاب اسمها سيروتونين ولها ادوية ترفع من مستوى هذه المادة وتتحسن بإذن الله

واذا عندك سؤال عن شي معين انا بانتظارك
وهل تنصحني اروح دكتور نفسي ؟؟ لاني انا متردد مع ان اهلي يبوني اروح وانا متخوف لامور كثيره وانت تعرفها
ادمان الادويه والاضرار الجانبيه والانتكاسات وعدم نجاح الدواء يعني متردد وخايف كثير وبالي مشتت

اعزم امرك وروح لدكتور، بالعكس شيء طيب ان اهلك متفهمين
زليس صحيح موضوع الادمان فالأدوية التي تسبب ادمان خاضعة للرقابة
ونجاح الدواء علمه عند الله لكن اغلب الناس ينجح معهم الدواء بنسبة تعافي طيبة
واذا لم تتحمل الاعراض يمكن تغيير الدواء لنوع اقل اعراض جانبية ولكن اذهب لطبيب مشهود له بالأمانة والعلم ولو كنت في الرياض اقدر اساعدك

والله يجزاك خير مقدما

ويجزاك الف خير اخي الطيب