|
ليه نكبر موضوع الرهاب ؟!!
السلام عليكم ورحمة الله وبركاته
صبــــــــاح الخير w==ewe
قبل ماأبدأ كلامي بقولكم اني دخلت المنتدى بشوف لي حل من مشكلة الرهاب
ولقيت موضوع تجمع الرهيبين والرهيبات << خلاص بعد اليوم اسمنا كذا  _
المهم قرأت وقرأت وجا ببالي كلام فقلت قبل ما أكتب سؤالي
اجي هنا واقول اللي بقلبي بموضوع وان شاء الله نستفيد كلنا
أول شي طبعا " ودي أشكر نوفا على جهودها معانا ربي يسعدها
وأشكر الدكتور رعد " قاعده أدور كلمات شكر تليق بس والله عجزت "
لكن فيه حديث بمامعناه من قال جزاك الله خير فقد أبلغ في الثناء
وأقولك الحين وقلت من أول وأنا أقرا جزاك الله خير ربي يسعدك دنيا وآخره
ويآرب نتقابل كلنا بالجنه ونرتاح من الهموم وانت ترتاح من مشاكلنا
يآآآآرب بدون حساب ولاعذاب..
مدري من وين أبدأ ؟!
أغلب الصفحات قرأتها وحسيت بانزعآآآآج شديد وزعلت مررره على بعض اللي كتبوا
مشاكلهم ..
حسيت في طريقة طرحهم بنبرة يأس وكلمات سلبية تزيد من المشاعر السيئة
وتفرح الشيطان أكثر وأكثر وتخليه يدخلهم من مداخل ماحسبوا حسابها
أنا ماأقلل من معاناتكم بالعكس والله حاسه فيها لكن لازم نذكر بعض
ونشوف الناس اللي أقل مننا احنا مشكلتنا دائما" نشوف الناس اللي أحسن
وندور على اللي ناقصنا ونشوفه عند غيرنا ويبدأ مسلسل الهم والعذاب
طيب أنا عندي رهاب اجتماعي لكن الحمدلله بكامل صحتي أقدر أمشي وأطلع
وايش يعني مآآآقدر أتكلم مع الناس الله يرضى على الصم والبكم عايشين حياتهم
الحمدلله حالي أحسن من ملايين ومليارات كمان
فيه غيري مايقدر وانتو بكرامة يروح للحمام يقضي حاجته
ولازم ينتظر لين أحد يجي ويشيل فضلاته من تحته
بكل وقت يحس بالاحراج والذل والاهانه ويمكن يسمع تأفف من اللي حوله
خلونا نفكر بس في الشباب اللي بالعناية التأهلية
واحنا اذا حسينا ان الناس انتبهوا لارتجافنا أو تلعثمنا نتنكد ونتمنا الموت
بالله مو سخافه ؟
ايش يعني لوارتجفت قدام الناس ؟!
يعني بتكون نهاية العالم مثلا" ؟!
أنا ماأقول خلونا كذا من غير علاج لا بالعكس حلو نستشير وندور على الحل
لكن فرق بين اللي ياخذ العلاج وهو يحب ويحترم نفسه مهما كان وضعها
وبين اللي كاره نفسه وياخذ العلاج وكأنه يقول لنفسه
يلا تشافي بسرعة ترى قرفتيني في حياتي
يعني معقوله اذا أعاني من الرهاب يعني خلاص ما أستمتع بحياتي ؟
وأجلس أجلد نفسي جلد على كل ارتجافه وكل اهتزازة صوت ؟
اذكر بالجامعه كانت تدرس معاي وحده عندها تأتأه لكن ماشاء الله تبارك الله
تتكلم مع الأساتذه وتتناقش واحنا معانا تسوولف وأغلب الوقت الكلام كله لها
بالرغم انها تتأتئ واحيانا" تتقلص عضلات وجهها وبصعوبة تطلع الحرف
وهي ولاهمها الله يحفظها
والله أحيانا" أطالع فيها وهي تتأتئ وأقول بنفسي الظاهر لو أنا مكانها
يمكن ماأطلع من بيتنا ..
يعني القضية في المقام الأول قبل مانعالج الرهاب لازم نعالج تعاملنا مع نفسنا
وكلامنا مع نفسنا ..
يعني مثلا" حسيت ان الرهاب كان واضح علي
وكان فيه تجمع كبير وحسيت انهم لاحظوا
طبعا" يجيني شعور سئ جدا" ويستمر لين أرجع البيت
لكن أحآآآول اني ماأخلي هالشعور يسيطر علي
مثلا" أجلس وأحضن نفسي
"أجلس القرفصاء وأضم يديني على رجولي "
يعني كأني لميت جسمي على بعض << ان شاء الله وصلت : )
أو حضن عادي المهم اني أحتوي نفسي وأجلس أقول:
خلاص ياقلبي يامريوما الدنيا ماتستاهل ايش يعني شافوكي وانتبهوا
يختي انتي ايش سويتي عشان تزعلي ؟
شوفي غيرك يالطيف يقتل القتيل ويمشي بجنازته ولاكأنه سوى شي
وانتي قاعده تحاسبي نفسك على شي تافه
يختي الحمدلله انتي بخير وكنتي ماشاء الله قمر وألف وحده تتمنى تكون مثلك
وخلاص فكيها عآآد خلينا نعيش اللحظة لاتفكرين باللي راح
<< أتوقع الدكتور رعد بيعطيني تحويل لأقرب مصحه * _ *
بس الحمدلله ارتآآآح بعدها ماشاءالله لاقوة الا بالله
ولازم نخلي ببالنا ان الرهاب موجووود عند أغلب الناس ولانفكر نفسنا غريبين
ولاكائنات عجيبه عآآآدي زادت الحين النسبة بشكل رهيب والله ناسيه بس الظاهر
واحد من كل عشرة يعني اللي زينا مرررره كثير سيم سيم احنا _
المهم لاتقسوا لاتقسوا لاتقسوا على نفسكم ترى الدنيا ماتستاهل
دلعوا نفسكم مثلا" بالنسبة للبنات كل ماحسيتي انك تعبانه نفسيا"
البسي ألوان فراحيه واكشخي وحطي مكياج ولفلفي شعرك
وسويلك عصير ولاقهوه واشتريلك كوب شكله حلو
وحاولي تملي وقتك يعني لوكنتي عاطلة زيي روحي تحفيظ قرآن
واشتركي بدورات ومحاضرات ولوكان الرهاب مخوفك هنا بالنت فيه كل شي
حتى تحفيظ قران فيه عن طريق قاعات البث المباشر ممكن تتمرني فيها
بالنسبة للشباب برضو فيه تحفيظ قرآن وممكن كمان نادي لو يومين بالأسبوع
غير كذا حاول تتمشى بأي مكان لو لوحدك أول مره بعد كذا تاخذ معاك أحد
أهم شي تغير جو وتجدد نشاطك ولو تقدر تسافر كمان حلو ولوتعتمر بعد كل فتره
بتحس بشعور روعه ..
يقول ابن تيمية :
(ما يصنع أعدائي بي ؟أنا جنتي وبستاني في صدري أينما رحت لا تفارقني ،
أنا حبسي خلوة، وقتلي شهادة ،وإخراجي من بلدي سياحة )
ودي نعيش كلنا هذا الشعور اللي عاشه ابن تيميه رحمه الله ..
يعني سواء باين علي الرهاب ولا موباين أنا جنتي بصدري ..
سواء فادني العلاج أو مافادني أنا جنتي بصدري ..
والشي المهم اللي لازم ننتبه له في علاجنا هو تحسين علاقتنا مع ربنا سبحانه وتعالى
أي ذنوب وآثام نتركها ونطلب من الله المغفره والشفاء في آخر الليل
والصلاآآآآه المحافظة عليها هو سبيل النجاة من كل الهموم والأكدار ..
ربي يشفينا ويشفي مرضانا ومرضى المسلمين ..
|