نفساني - عرض مشاركة واحدة

12-11-2001, 06:45 PM

للرجاجيل......سفينة

شفنا نهاية وضعنا بالتهاويــــــــــــــل
وبعض النفوس بغيرها مستهينـــــــه
وضاع الحيا في وجه بعض الرجاجيل
والطيب عيا لا يبين في عينــــــــــــــه
يومن تجمل في وجيه المشاكيــــــــل
وخوينا لاحتاج ..جينا نعينــــــــــــــــه
ما ننوي الصدة وقطع المواصــــــيل
ونفزع اليامن... قالوا فلان وينـــــه
ما قصدنا زيف زتظاهر وتمثيـــــــــل
وما همنا ما تحتويه الخزينــــــــــــه
نتعب على كسب المراجل وبالحيــل
نجهد نبي نرقى لمتن السفينــــــــــة
والمرجلة ماهي بهون و تساهيــــل
تصعب على النفوس الرخوم العفينة
والناس فرق بينهم عاذل الميــــــــل
وكل على ساسه وطبعه ودينــــــــه
احد رقى بالطيب للجدي وسهيـــــــل
واحد رداه محوله بالطمينــــــــــــــه
وترى البشر بالطبع جيل ورا جيـــل
يرجع على مجناه و مخلفينـــــــــــه
ابن الردى ما منه نفع ومحاصيـــل
وبالتربية... يرجع على والدينــــــه
يرجع على ساسه ردي المواصيل
وعما يبي يقصر وتقصر ايديــــــنه
وابن الكريم القرم نسل الحلاحـــيل
اللي مشى بالطيب باول اسنينــــــه
ما للردى والشك عنده مداخيــــــل
وما يرضى بالتكليف بينك وبينــــه
تلقاه فزاع وراعي معاميــــــــــــل
ولا جيت له محتاج تندى يمينــــه
وما يسمع النمات والقال والقــيل
ويجنب الزلات مع كل شينــــــــه
هذاك له بالقلب قدر وتجليـــــــل
وله منزل بعيونا رافيعنـــــــــــــه
يستاهل الخوّة ومدالفناجيـــــــــل
وكف لمد الطيبة والثمينــــــــــه
قلته وقلت اللي طرى من تماثـيل
وهيضت ما في خاطري من غبينه
وتمت وصلى الله عداد الهماليـــل
وعداد زوار الحرم والمدينـــــــة
على شفيع الخلق يوم التهاويــل
نبينا اللي كلنا تابعينــــــــــــــــــه

المصدر: نفساني