نفساني - عرض مشاركة واحدة - أنا مريض عضوي ولا نفسي / ارجوا اقناعي بحل

08-10-2011, 05:51 PM

أنا مريض عضوي ولا نفسي / ارجوا اقناعي بحل

السلام عليكم ورحمة الله وبركاته

أنا كتبت موضوع سابق في قسم الهلع ومالقيت الحل
أنا كل اللي ابي اعرفه هذي اعراض مرض نفسي ولا لأ
لأن كل اللي يصير معاي احسه غير نفسي بس تعب نفسيتي
أنا غير كذا امس حاولت انام ماقدرت لأن بدأ معاي موضوع الكتمه اول ماجيت انام على طول وكمان نبض قلبي وصل 54 الى 56 واعتقد انه طبيعي لأني اخذ كونكور بس امس اخذت نص حبة كونكور 2,5 وهذا اللي خلاني استغرب,, او عشان كنت مرهق من القلق وقلة النوم !! لأن قرأت ان وقت النوم ينخفض نبض القلب,, بس انا مع الخوف صرت احس بكتمه وخفت كثيييييير وحاولت اقوم من السرير مع اني اشعر بدوخه واشتدت علي الدوخه ولما قمت رجعت اقيس نبض القلب وصل 70 طبعاً تفاعلاً مع الحركه اعتقد
بس انا استغرب ان لما يجيني تسارع بالنبض ما اتنفس بسرعه لأن انا قرأت ان المرض النفسي الهلع يصير يتنفس بسرعه ونبضات قلبه تسرع !!! هل شرط ان اكون اتنفس بسرعه ؟ انا عشان كذا خفت يكون غير نفسي,, وخفت كمان يكون حاصل شي بالمخ دم متجمع او زي كذا لأن قرأت ان هذه اسباب دوخه برضوا ؟ وتجي مع ارتفاع ضغط الدم :(
والله خايف بس ياليت تشوفون الموضوع اللي كتبته سابقاً وهو تحت تفضلوا:
بس ياليت تقنعوني حتى اقدر اروح اتعالج نفسياً لو كان نفسي وخليكم صريحين معاي الله يوفقكم ويسهل عليكم
طبعاً عمري 25 سنه واعزب وزني 67 تقريباً واتوقع نزل اكثر لأن كان قبل 4 شهور 82 تقريباً

اخواني واخواتي بعد التحية
انا راح ادخل بالموضوع على طول...

أنا قبل اكثر من 4 اشهر جاني ارتفاع بالضغط بالعمل ودخلوني عنايه مركزه لأن بعد ماعطوني ابرة حقت الضغط فجأه جاني تسارع بالقلب وقالو ان السبب قلق وتوتر سوولي تحليل وتخطيط قلب وايكو كله سليم الحمدلله

الثانيه كانت قبل رمضان بإسبوعين تسارع بنبضات القلب وقالو نقص بوتاسيوم من كثر الإسهال الله يكرمكم والسبب قلق وتوتر سوولي تحليل وتخطيط قلب وايكو

انا بعدها وسوست وقلت اكيد فيني شي طبعاً عطوني دوا كونكور 5 مجم حق القلب ينضم النبض وبعدها بشهر خفض الجرعه الى 2,5 المهم انا صار بعدها يجيني نغز بالقلب وزي كذا واتعب لما امشي وحتى شغلي تركته طبعاً صرت اخاف اروح العمل

المهم بعد ماتركت العمل انا بعدها صار معي موضوع جديد وهو الدوخه المستمره كانت بدايتها اول ما اصحا من النوم وبعدها صارت طول الوقت
رحت مستشفى حكومي وقلت هذول هم الأفضل بإذن الله وسوولي تحليل دم وتخطيط قلب وايكو قالولي الحمدلله ماشاء الله تبارك الله القلب زي الفل بس برضوا عشان نتأكد راح نركبلك هولتر والموعد القادم حق الهولتر باقيله اسبوع ونص تقريباُ وانا الحين صارلي مع الدوخه وعدم التوازن اكثر من 20 يوم وزاد الموضوع بحيث صرت ماقدر امشي طبعاً الحين زاد اكثر اني احس بثقل الجهة اليسرى مع اني لما رحت المستشفى كنت احس بثقل بنصف الصدر واليد بعد لكن الحين لا على يسار الصدر واليد والحين زاد اكثر بحيث لو اني جيت امشي بس مسافه بسيطه احس بدوخه اكثر واحس بالثقل بصدر واليد ومدري هي وسوسه ولا وش لأن انا قرأت ان هالأعراض تصيب اللي عندهم امراض قلب
كلمت اليوم دكتور القلب اللي كنت اراجع معه قلتله انا ترا احس بكذا وكذا قالي عادي هذا تأثير الأدويه النفسيه قلتله لا بس انا ما اخذ اي علاج نفسي ومارحت طبيب نفسي لسه قالي لاتخاف مافيك شي ولازم تزور طبيب نفسي قلتله ترا سوولي تخطيط وايكو قبل اسبوع قالو مافيك شي قالي ايوه مافيك شي ان شاء الله وبس زي ماقلتلك زور طبيب نفسي ....

هل الدوخه والثقل مرض نفسي ولا وشو يرحم والديكم قولولي لأن انا من جد تعبت نفسياً بسبب هالموضوع لأن حتى بالبيت اهلي اقتنعو ان اي الم احس فيه نفسي !!!
ابي احد يقنعني بشي انا ماقد قرأت او سمعت ان مثل اعراضي ممكن تكون نفسيه

ولحد يكتب اشياء توسوس فيني وتخرعنا ترا موب ناقصن قسم بالله
اتمنى محد يرد الا الفاهم والمختص فقط رجااااااااءً ياجماعة الخير

اخوكم ابو تركي ؛ انا طبعاًُ موب متزوج بس احب هاللقب

المصدر: نفساني