نفساني - عرض مشاركة واحدة

31-10-2011, 01:47 PM

السلام عليكم ورحمه الله وبركاته
أول شي أنا عضوه جديدة وحبيب اطرح مشكلتي عندكم وان شاء الله أجد الحل .
لأني بصراحة ارتاح نفسيا وجسديا لما ادخل المنتدى واقرأ وأحس إني مو لوحدي إلي باعاني (الحمدلله على كل حال)
بسم الله الرحمن الرحيم

بدأت الحالة معايا من 14\3\1432هـ يعني من 8 شهور كنت في أمان الله يوم الخميس الليل قاعدة أتفرج تلفزيون شوي واحسب الم في عضله قلبي طبعا أنا متعودة عليها من زمان مو اول مره تجيني المهم قمت ادور في البيت قلت امكن يروح بس بعد مادرت رجعت ابغي اجلس حسيت جاتني ضيقه في التنفس فظيعة و اطراف رجلي بردت ماقلت لأحد قلت يلا انام ولما اصحي إن شاء الله يروح قمت يوم الجمعه وانا خاااااايفه بدات بطني تعورني بس فتحت التلفزيون قلت اسمع خطبت الجمعه واقرأ سوره الكهف يمكن يروح ماراح بدات اشعر انو الموت رحت صحيت اختي قلتلها مااعطتني وجه ودخلت الحمام انا سرت ادور في البيت وفجأة حسيت بدوخه ودقات قلبي سارت سريعه وبطني تمغص دقيت عليها باب الحمام قلتلها افتحي انا بأموت فتحت شافت شكلي متغير راحت قالت لابوي كان تو راجع من صلاه الجمعه روحنا المستشفى طبعا وانا في السياره بدا ريقي ينشف ويدي تنمل شعرررررت بالموت لما دخلت المستشفى اخذو دم وعملو اشعه صدر وكل شي قالولي مافيكي شي كلو سليم خرجت من المستشفى ما كأنو فيني شي رجعت طبيعيه رحنا اتعدينا و لما رجعنا البيت سرت احس انو جسمي طايح و خمول وخوف من الي سار لي وكنت ما أكل الا قليل وبعد الاكل احس بكتمه وبعدها استفرغ (يكرم السامع) وبعدها احس برااحه بس مرت ذيك الايام وانا هاذي الأعراض بالاضافه حالتي النفسيه جدا سيئه بسبب انو امي ماكانت موجوده راحت امريكا عشان اختي ولاده فكنت بس ابكي وطفشت ابوي واختي رحت لدكتور باطنيه و لدكتور صدر كلهم يقولو مافيكي شي وزاد الخوف والحيره فيني الين ماجات امي لما قالولها قالت امكن عين بعدها بكم يوم ودوني حق شيخ قرأ علي كنت ابكي ماكنت اتوقع في يوم اني اروح شيخ ما اقول غير الحمدلله بس بعد ماخلص قلي ايش تحسي انا سكت مني حاسه شي الصراحه , قلي تحسي بدوخه قلتو لا قلي تحسي بعرق في جبينك وظهرك قلتلو ايوا وانا الصرحه مااحسيت بس كذا قلتلو بس اعطاني شريط اسمع وقلي اقري سوره البقره لمده 3 ايام خرجت من عندو وانا مصدعه من البكاء بس واستمريت على قراءه سوره البقرة تقريبا مده شهر و ما اشعررر بشي هنا الحيرة بدأت فيني وكنت بس ابكي وأقلهم يعني انا ايش فيني بس وبعدها وبدأت نفسيتي تتحسن وسارت تجيني الحالة كل أسبوع أحيانا اقعد أسبوع مافيني شي و تجيني الأسبوع الي بعده وانا الان من شهرين مستمره على الرقيه اقرها بعد صلاه الفجر واسمعها بعد المغرب والحمد لله اتحست بس إلى الآن نجيني الحالة ولما تجيني اقعد في غرفه الجلوس ابكي واقلهم بطني وأطرفي بارده وضيقه في التنفس و دوخه وخايفه أموت وأحيانا راسي يعورني وتنميل بس اقعد شوي ويروح وسرت أي شي يصر لي اعلقوا بالموت واخاف من الموت بشكل غير طبيعي ومني عارفه هل هيا عين ولا هلع أبغى مساعدتكم وتحليلكم
علما ان عمري 17 سنه
وعلما انو بعد مابدات حالتي بأسبوعين تقريبا بدا دود يظهر في غرفتي والبيت كامل أما الآن اختفى ولله الحمد كليا بس أختي تقول عين بسبب المشاكل الكبيرة الي كانت في بيتنا والدود بدا يختفي لما المشاكل أتحلت والحمد لله . يعني مالو شغل في حالتك << كلام اختي لانو الدود اختفى وانا حالتي لسا فيه والله اعلم .

بس اول 3 شهور تقريبا كان الضيق في التنفس شبه ملازمني بس الان والحمدلله احيانا مع النوبه ...

المصدر: نفساني