السلام عليكم ورحمة الله وبركاته
بالنسبة الي والحمد لله انا راضية عن نفسي اكيد مش 100% والسبب الوحيد الي مخليني اني ما اكون راضية عن نفسي 100% فقط سبب واحد مش اكتر الي هو اني مش عمالي بقوم بالواجبات الدينية على اكمل وجه وبالنسبة الي هادا اهم شيء بالحياة وازا الواحد بحققه اكييييييييييد بكون راضي عن نفسه 101% مش بس 100% لانك لما تقومي بالواجبات الدينية بالطريقة الصحيحة وتتعمقي بالدين وتكوني عارفة كل اشي بالدين وبطبقيه فاكيد انتي حترضي عن نفسك مية بالمية لانو الاسلام والتفكير بربنا لوحده بخليكي تحسي انك انت ملكتي الدنيا وما فيها وبعطيكي شعور حلو فازا انتي ارضيتي ربك فاكيد نفسك بتكون راضية عنك وبتكوني راضية عن نفسك وعن الي بتعمليه.
وطبعا بشكر الاخت ترانيم النفس على الي قالتو وانا بأيدها فيه جزاها الله كل خير الحقيقة كلامها اجا في موقعه، مثل ما تكلمت الواحد ينظر للي اعطاه اياه ربنا من نعم وفضائل وينظر لغيرو وللبلاء الي غيرو مبلي فيه، هادا وحده كفيل في انو يخليه راضي عن نفسه وعن البلاء الي الله بلاه فيه مهما كان ويخليه يشكر ربنا على النعم الي اعطاها له وحرمها لغيرو وطبعا نعم الله لا تعد ولا تحصى على الانسان فانتي لو جيتي بس تفكري بنعمة وحدة من نعم الله وهي انو خلقك على هيئة انسان وفضلك على جميع خلقه فهاي اكبر نعمة بحد ذاتها فكونك انسانة وكونك بتتكلمي وبتسمعي وبتشوفي وبتمشي وبتحسي وبتشعري فهاي اكبر نعمة نشكر ربنا عليها.
فانتي عشان تكوني راضية عن نفسك اول شيء لازم تفكري بالنعم الي عندك والاشياء الكويسة والصفات الايجابية الموجودة عندك وتبحثي عنها قبل ما تبحثي عن الاشياء والصفات السلبية.
طبعا ما في انسان كامل 100% وما في انسان راضي عن نفسه 100% لكن الحمد والشكر لله على كل شيء ونحمده انو خلقنا بهاي الصورة ونكشره على نعمه الي لا تعد ولا تحصى.
بتمنى من كل شخص مش راضي عن نفسه انو يفكر كويس ويبحث عن الصفات والاشياء الايجابية الموجودة عنده قبل ما يفكر ويبحث عن الاشياء السلبية واكيد هو حيكون راضي عن نفسه باذن الله وخصوصا لما يشوف بلاء غيره ويشوف كيف هادا الشخص الي الله بلاه باكبر بلاء راضي عن نفسه وعن الي الله بلاه فيه وبشكر ربنا على الي عنده.
ملاحظة:- انا حابة بس اسأل كل الي بشاركوا او شاركوا بهادا الموضوع اذا كانوا قدروا يفهموا لغتي بسبب اني فلسطينية وطبعا ردي كان باللغة العامية مش بالفصحى ومش عارفة ازا كلامي بكون مفهوم الكم او لأ؟؟؟ بتمنى من الاخوة والاخوات انهم يجاوبوني عشان ازا ما كان مفهوم اكتب مرة تانية باللغة الفصحى ومشكورين.