نفساني - عرض مشاركة واحدة

07-12-2011, 10:27 PM

السلام عليكم ورحمة الله وبركاته
جزاكم الله خير عن هذا التطوع بنصح الاخرين وجعله فى ميزان حسناتكم
انا ام لطفلين توئم عمرهم 7شهور وعندى 30سنه متزوجه من حوالى 5سنوات زوجى عمره 44ونص زواج تقليدى اسرى بس انا وافقت لانى توسمت فيه خير لانه خجول وكريم وشكله مقبول كمان
الجواز تم بسرعه كبيره هوكان مستعجل جدا حتى ملحقناش نتعرف على بعض كفايه
اكتشفت بعد الجواز انه غير محب للعلاقه الزوجيه رغم كل محاولاتى انى احببه فيها بس هو دايما كان يقولى الجنس دا شىء هامشى اناعندى اصحابى مش بيلمسوا زوجاتهم بالشهر
دى اول مشكله حاولت انى اتغاضى عنها واعيش وكان عندى امل انه يتغير بعدما يحصل حمل لانه كان بيقولى اناحاسس انى مجبر على العلاقه علشان يحصل حمل مش حاسس انى مستمتع وهواصلا ميجيش ناحيتى ابدااااااا الا لواتخانقت معاه وقلت له كلام جارح زى انت عاوزنى انحرف ولا اتجنن انت اتجوزتنى ليه طالما مبتحبش الجواز ولوكانت المشكله عندى انا ومش عاجباك طلقنى وكل واحد يروح لحاله ييجى يصالحنى ويومين ويرجع زى الاول يعنى انا اللى ابدأ فكل حاجه لدرجة انى شكيت فنفسى انى فيا حاجه مكرهاه فيا وسألته قالى لومكنتش عاوزك مكنتش عملت المستحيل علشان اخلف منك بس انتى اللى مش قادره تراعى ان انا راجل تعبان وشقيان وكلام من ده ميقنعش عيل صغير يعنى ايه شقيان هو اصلا شغله مش بدنى وراجل مقتدر ماديا وتحت ايده ناس بتخدمه يعنى مش بيجهد غير صباعه فالاتصال بالتليفونات
تانى مشكله وهى المأساه انه مع كل الناس ضحوك وبيهزر ويتكلم بالساعات وعندى انا بمجرد مايدخل البيت يبقا عاوز ينام ومبيحبش يخرج ولا يغير جو رغم ان ظروفه تسمح بكده ولماقلت له انى وحيده فبلد غريبه(انامتجوزه بعيد جدا عن بيت اهلى بينى وبينهم سفر 8ساعات) محتاجه حتى كلمه حلوه منك او نخرج نتمشى شويه اونروح مره فالسنه مصيف زى خلق الله يقولى انتى مدلعه انا راجل شقيان علشان اعمل مستقبلنا وانتى عاوزه تتفسحى
وحصل الحمل وطبعه متغيرش وامى كانت عندى معظم فترة حملى لانها كانت مريضه الله يرحمها ويجعل مثواها الجنه
وهى دى القشه اللى قسمت ظهر البعير
موت امى
هى كانت معنى للاخلاق والصبر والحنان وكل شىء جميل فحياتى ربنا يرحمها ويصبرنى ويبرد قلبى على فراقها
وولدت وجبت ولد وبنت ربنا يحفظهم لى وبرضه متغيرش فاسلوبه معايا وانا مبقتش قادره اتحمل وهومن فتره بدأ يتبع اسلوب انه يبين قدام الناس ان اى ست فالعيله احسن منى مع جوزها لدرجة انه قال لواحده قريبتى ان اختى الصغيره احسن منى وانه مكانش ينفع معاه كزوجه غيرحد زيها يقصد زى اختى يعنى وقريبتى دى راحت قالت الكلمه لخطيب اختى واختى قالتهالى وهى متعصبه وانا حسيت كرامتى اتجرحت من ناحيه وخفت من ناحيه تانيه ان خطيب اختى يمنعها من زيارتى لان جوزى عينه منها وقلت له الكلام ده قالى انا مقصدش انا لمالقيت كل الناس بتقول على اختك انها لسانها طويل وصعبه حبيت بس اقول كلمه كويسه وبصى انا ليا طاقه وممكن اتصرف تصرف ميعجبكيش قلت له ايه هو التصرف
هتطلقنى
طلقنى دا حتى تريحنى من الحياه دى وبص بقا لومكنتش هتتعدل كل واحد يروح لحال سبيله ونتطلق علشان انا خلاص اللى كانت بتصبرنى على العيشه معاك ماتت
والكلام ده بقاله 3ايام وهو مش بيكلمنى وانا عارفه انه حاسس انه غلطان بس بيكابر
معلش اناطولت بس لازم اخرج اللى جوايا كله علشان حضرتك تفهمنى
دلوقتى انا بجد بتجينى اوقات احس انى عاوزه اهج او اموت نفسى علشان اخليه يندم على كل اللى عمله معايا
اصر على الطلاق ولا اعمل ايه
انا خايفه مقدرش اتحمل الحياه دى ويجى عليا يوم بعدما يكون عمرى راح اكرهه وانتقم منه بأى شكل
محتاجه نصيحتكم بشده
جزاكم الله خير

المصدر: نفساني