نفساني - عرض مشاركة واحدة

07-01-2012, 07:09 PM

المحاضرة الثالثة: برنامج الاسبوع الاول:

في الاسبوع الاول اللي احنا فيه ده وهنقول هيبدا من اليوم لمدة اسبوع بامر الله ان كان لنا عمر
انا مش عاوزة اتقل عليكم وصفات وماسكات وحوارات كبيرة لاني عارفة انكم هتزهقوا وتملوا بسرعة ساعتها.
ومش هطلب نشتري حاجات كمان كل حاجتنا من البيت وبنفس نظامك لاني عارفة الموضوع جه فجاة وكلنا في اخر الشهر (ألا اللي معاهم فلوس تحت البلاطة بقي)

انا قصدي بس اننا في اول اسبوع بامر الله اننا نوصل لنقطة ان يبقي عند كل واحدة برنامج يومي ولو بسيط نسبيا تلتزمي بيه يوميا وتشوفي تاثيره في نفسك هيظهر ازاي بامر الله ومشيئته
وبالتالي لما ننزل بشغل مكثف شوية يبقي اخدتي جرعة حماس كفاية تخليكي تلتزمي بيه من غير زهق و الا كسل والله المستعان اولا واخيرا.

برنامج العبادات:

1- الالتزام التام بالصلوات الخمسة في اوقاتها وخاصة صلاة الفجر و العصر ولو قدرنا علي النوافل يبقي فضل و نعمة من الله سبحانه وتعالي وبعد كل صلاة ياريت لو نفتح كتاب الله ونقرا ولو ربع حزب في كل مرة
(انا عارفة ان فيه ناس ماشاء الله عليهم ملتزمات بالفروض والنوافل والتلاوة ولكن الكلام موجه بشكل خاص للمقصرين احيانا).

2- أذكار الصباح والمساء الالتزام بكل ماجاء فيها قدر الامكان.

3- استغفار الله عزل وجل طول مانتي واقفة في المطبخ او بتعملي اي شغلانة طول وقت فراغك بمعني اصح استغفري في سرك كل ما تلاقي فرصة استغفري كتير تربحي كتير ان شاء الله.

4- الصلاة علي رسول الله عليه افضل الصلاة والسلام علي الاقل عشر مرات غير المفروضة في الاذكار.

5- نمسك اللسان اللي هيودينا في داهية ده وبلاش نم و لوك لوك في سيرة الناس وفي اي كلام فاضي نقفل بقنا لو الكلام مالوش لزمة قدر المستطاع نعود نفسنا علي كده بلاش خدمة حوللي شكرا يعني نغلط في الناس ونجيب سيرتهم ونحول لهم من حسناتنا.

6- الزكاة باي شيء مهما كان بسيط ولو بدقيقة موبايل.

7- بر الوالدين (اهلك واهل زوجك علي حد سواء) وطبعا ده من غير ما اقوله.

برنامج معاملة الزوج (ان وجد)

1- البشاشة

يعني كل ما يشوفك تضحكي في وشه مش تضحكي بهبل او باستخفاف لا تبتسمي بسمة كده تديه تفاول تحسسه بالانوثة
حاجة زي كده

2- الصوت المنخفض

اكتر حاجة بتضايق اي رجل في زوجته هو الصوت العالي والجعير اسمحوا لي في اللفظ (اانا اسفة علي اللفظ بس متعمدة اكتبه)
مهما العيال يزهقوكي ويقرفوكي
زعقي فيهم وعنفيهم من غير صوت عالي يسمعه الجيران ويخلي زوجك يتضايق منك
لان الصوت العالي رمز من رموز الرجولة لما تزعقي انتي بقي هو بيحس ان فيكي ملمح من الخشونة بالتالي بيتضايق وانوثتك ورقتك تنقص عنده.
وافتكري ان زميلاته في الشغل ما بيزعقوش والا بيعلوا صوتهم والبنات الحلوين في الشارع ما بيعلوش صوتهم برضه بيتكلموا صيو صيو زي العصافير.

3- الاستقبال الحلو

اول ما يجي من الشغل ولو انتي لسه داخلة قبله بثانية واحدة من شغلك معلش
تنادي عليه انت جيت يا...حمد الله علي السلامة ياحبيبي ثواني وجاية لك
و تروحي له في ايدك اي حاجة حلوة ولو كباية عصير فراولية شوكلاته طوفي كباية لبن اي حاجة حلوة تعوضه مر الشغل والشقا طول اليوم.
ولو بيتجوا مع بعض اسبقيه ادخلي مطبخك وهاتي له حاجة من دول
صدقيني ديه مفعولها مفعول السحر علي قلبه
وتدي له هدومه اللي اكيد نضيفة ومترتبة وتساعديه لو انتي معوداه علي كده.

ومازال للحديث بقية كتيرة قوي بس نلتزم بدول بس واللي بتعمل كده تخليها علي كده و تزود جرعة الحنان شوية.

برنامج التغذية

1- التقليل من النشويات اللي بتاكليها تدريجيا.
يعمي نصغر حجم الطبق اللي بناكل في الرز او المكرونة ونقلل العيش.

2- ممنوع الحلويات او المعجنات تماما الا حتتين صغيرين ومرة واحدة بس في يوم واحد في الاسبوع
(الاتنين دول اللي بيكبروا الموخرات خدوا بالكم منهم).

3-الشاي او القهوة او النسكافيه مرة واحدة بس في اليوم وباقي اليوم لو بتحبي الحاجات السخنة يبقي ينسون و نعناع وبابونج
لان الشاي و القهوة بيصبغوا الاسنان و بيتعبوا المعدة علي الفاضي اهتمي بشرب المواد المفيدة تنضف معدتك وبالتالي تنصف جسمك وتنقيه و تبقي اكيد احسن.

4- لو بتاخدي اكتر من معلقتين سكر في اليوم قللي تدريجيا ولو نص معلقة الاسبوع ده بس.

5- شرب الميه الكتير جدا.

6- علي الريق معلقة عسل ابيض وممنوع العسل الاسود لانه بيتخن جامد جدا وبيزود نسبة السكر في الدم وده عن تجربة.

برنامج الرياضة

1- شفط البطن وانتي واقفة علي الاقل خمس مرات في اليوم وكل مرة تعدي من واحد لعشرة وانتي شافطة بطنط وبعدين تسيبيها تشفطي وتسيبي وهكذا.

2- ترفعي ايدك الاتنين فوق راسك وبعدين ترميهم لورا تلات مرات ويتكرر في اليوم علي الاقل خمس مرات (لشد الصدر)

3- تسندي عالحيط وتتني ركبك وانتي شافطة بطنك وتنزلي وتطلعي مرتين وايدك في وسطك يتكرر خمس ست مرات.

التمارين سهلة الاسبوع ده وتتعمل وانتي في المطبخ مش محتاجة وقت والا حجج فارغة.

برنامج العناية بالجسم:

1- النوم بدري يعني بالكنير الساعة 12 ولو سيادتك سهيرة والا بتابعي برنامج ما روحي بصي لوشك في المراية
شوفي الهالات السواد واعرفي انها بتاكل انوثتك وانتي هتنامي تحلمي بيها.
ولو مش قادرة تنامي خشي خدي لك شاور واستغلي الطاقة السلبية ديه في نضافة جسمك النت والا التلفزيون مش هيطيروا انما جمالك و شبابك وانوثتك وقبل كل حاجة صلاة الفجر هما اللي هيطيروا.

2- هنحاول الشاور يكون يومي
مش عاوزة اقول مرتين مرة بعد ما نيجي من الشغل او الكلية و مرة قبل النوم
او مرة بعد ما نخلص الطبيخ وشغل البيت ومرة قبل النوم
لا هقولك مرة بس بعد ما نخلص شغل البيت لو ربة منزل
او بعد ما نرجع من الشغل لو عاملة او بتدرسي.

3- مرتين في الاسبوع بس شاور الصنفرة وباقي الاسبوع شاور عادي
الطريقة الاولي:
وهو بسيط مش عاوزة منك حاجة الاسبوع ده خدي معاكي الحمام سكر ابيض و شوية زيت زيتون واخلطيهم الاتنين ببعض كويس (كمية مثلا تلات معالق سكر علي اتنين زيت)
وافرديه علي جسمك كله من تحت لفوق وعلي ما تسرحي شعرك وتدلكي فروة راسك وتلبسي البونيه البلاستيك (غسيل الشعر مرتين اسبوعيا بس)
تفركي بالليفة المغربي او جوانتي التقشير او قطعة من قماش صوف قديم
القصد يعني اي ليفة تحكي بيها جسمك برفق.
وفي الاخر شطف بميه دافية وتجفيف بطريقة طبطبة عالجسم وترطيب باي حاجة ولو بكريم علي خفيف كده.

الطريقة التانية:
هنجيب نشا ونعجنه بالميه الدافية لحد ما يبقي قوام تقيل شوية وندهنه في كل الجسم زي ماسك و نخرج من الحمام ربع ساعة او تلت ساعة كده
و في الوقت ده جهزي شوية شاور جيل من اللي بتستعمليه او لو مش عندك شاور جيل هاتي ربع صابونة وابشريه و اغليه مع كباية ميه عاديه لمدة خمس دقايق اما الصابونة تسيح
وحطي فيه كمية سكر مساوية لكمية الشاور و خل وياريته يكون خل تفاح
يعني لو نص كباية شاور جيل حطي نص كباية سكر و معلقتين كبار خل تفاح

وادخي الحمام اغسلي خليط النشا من علي جسمك بنفس الطريقة بس مع استعمال الشاور والسكر مش هنفرد علي الجسم لا هناخد منه بالليفة وندعك بيه الجسم بشكل دائري برقة برضه مش بعنف.
و نشطف وننشف ونرطب.

4- كعوب الرجلين في اخر وضوء في اليوم ادعكي رجليكي بحجر الرجلين اي نوع الموجود عندك واعملي بين صوابع رجليكي وبالليفه اعملي تحت الضوافر و التنيات
و قبل النوم افركي بنص ليمونة كويس الكعب وبين الصوابع وبعدين نرطب باي كريم وندلك حلو اما يتشرب كويس جدا وتنامي.

5- المناطق الحساسة ديه موضوعها كبير معانا لسه
بس مبدئيا كل يوم قبل النوم هنمسح المنطقة كويس بالميه او لو عندك مطهر زي سيتيال او غيره خففي شوية منه وحطيه في زجاجة نضيفة و امسحي منه بقطنة المنطقة من قدام لورا
تلات مرات هنغير القطنة مرة للمنطقة الامامية
ومرة للخلفية
ومرة تانية للامامية وسوري التنيات الجلدية في المكان.

6- بالنسبة للشعر
يتغسل مرتين في الاسبوع بالشامبو و البلسم يستعمل مرة واحدة بس
و بنفس الانواع اللي انتي شغالة عليهم مش هغير لك حاجة
ويتسرح مرة الصبح ومرة بليل و ياريت اكيد لو المشط خشب
والصبح بدري تبللي ايديكي بميه دافية وتدلكي فروة الراس كويس جدا جدا زي ما تكوني بتهرشي.
والشعر يتلم او تسيبيه مع لبس سورتيت او توكة بسيطة كده.
يعني نظامك في الشعر زي ماهو بس ندلك و نسرح مرتين في اليوم.

7- بالنسبة لايدين
كل مرة ايدنا فيه هتلمس الميه سواء كان وضوء او شغل بيت او غسيل او اي شيء لازم هنرطب ايدينا باي حاجة ولو بسيطة كريم مثلا
وقبل النوم هنفرك الايدين ومكان العقل بقشرة ليمونة ونرطبهم كويسة ونخبطهم في بعض كويس (من الضهر) لحد ما الكريم يتشرب كويس جدا.

برنامج بشرة الوجه:

لكل انواع البشرة بشكل عام اللي عندها مستحضرات بالفعل
هتغسل وشها بغسولها او صابونتها عادي مرتين في اليوم وتسيب الرغوة شوية علي وشها وتدلك بيها علي خفيف وتشطف بالميه
تقفل المسام باي تونر (الا البشرة الدهنية وام مسام واسعة بلاش مية ورد)
ترطب باي كريم
تعمل اسكراب مرتين في الاسبوع

ماسكاتنا علي وش نضيف مغسول بميه دافية والشعر ملموم لورا والماسكات للوش والرقبة

اولا :البشرة الجافة:

مرة في اليوم هنمسح بلبن الوش كله باستعمال قطنة
وهناخد من تحت لفوق يعني من الدقن لفوق وهكذا ونسيبه دقايق ونشطفه
اللبن ما يكونش ساقع قوي عشان ما يبقاش شديد علي البشرة

ماسكات مرتين في الاسبوع

* ماسك تنظيف وتعذية من بياض البيض و معلقتين الزبادي مع نص معلقة عسل

* وماسك تاني للتنضيف وعلاج البهتان من معلقة خميرة فورية و نفس الكمية الدقيق والميه الدافية لحد ما يمسكوا كويس ونقطتين زيت زيتون او سمسم و يفضل انه يكون زيت سمسم.

والاسكراب
زيت زيتون وسكر

ثانيا: البشرة الدهنية و المختلطة

هنجهز تونيك البقدونس و النعناع
هنجيب بقدونس فريش ونقطعه ولتكن كمية كباية مليانة مثلا
هناخد تلت كباية نعناع
ونحطهم علي النار مع كبايتين مية ونسيبهم يغلوا لحد ما الميه تخضر تقريبا عشر دقايق و قبل ما نقفل هنزود نص كباية ميه
ونصفي ونشيل في التلاجة
وتلات مرات في اليوم نسمح منه وشنا ورقبتنا بقطنة ونسيبه دقايق ثم نشطفه

ماسكين اسبوعيا

* الاول: تلات معالق دقيق و تلات معالق عصير جزر ونص معلقة صغيرة جدا عصير ليمون (بلاش منه لو بشرة حساسة)

* الثاني: زبادي و عسل ابيض وترمس مطحون او رز مطحون وده بيتشال بطريقة الفرك وبعدين يتغسل بالميه

الاسكراب
سكر معلقتين يتعجن بمعلقة ميه.

ثالثا:البشرة العادية:

هنعمل تونيك من ميه سلق البطاطس مع شوية لبن وناخد منه برضه بقطنة وبنفس الطريقة

وماسكين اسبوعيا

* الاول زبادي بعسل وبشر قشرة ليمونة

* والتاني بطاطس مسلوقه مهرية مع عصير جزر ولبن بودرة

الاسكراب
زيت زيتون وسكر

رابعا البشرة الحساسة

تونيك التنضيف هو نفس تونيك البشرة الجافة وهو تونيك اللبن

الماسكات

* زبادي وبس

* و الجزر بالعسل واللبن

اللي هو نص جزرة مسلوقة و مهروسة مع معلقة عسل ومعلقة او نص معلقة لبن حسب الكمية

الاسكراب
معلقتين زبادي مع نص معلقة سكر يتفردوا علي الوش لحد ما الزبادي يتشرب ثم يتفركوا ويتشطفوا بميه دافية.

العيون

كله يعمل يوميا ماسكات من شرايح الخيار الساقع وتتساب لحد ما تفقد حرارتها علي العين

الشفايف

زبدة كاكاو يوميا مرتين تلاتة مش مهم
و تلات مرات في الاسبوع عسل يتساب علي الشفايف ربع ساعة بعدين يتفرك بفوطة قطن برفق
وقبل النوم ياريت ان وجد نفتح كبسولة فيتامين e علي الشفايف
وان لم يوجد كفاية زبدة الكاكاو
ممنوع الفازلين تماما

الرووس السودا

مرتين في الاسبوع
فوطة سخنة علي الانف او منطقة حرف الT
وبعدين نجرب طريقة بياض البيض
او لاصقات بيور
او الجيلاتين
او الفرك باستعمال البيكنج بودر
او اسكراب الطماطم المهروسة مع القرفة.
ولو ما نضفتش قوي هيجي لها دورها لسه اصبري عليها
اوعي تستعملي الابره لانها بتوسع المسام.

الفم:

غسيل الاسنان واللسان مرتين علي الاقل في اليوم وبعدين نستعمل السواك ان وجد
قبل النوم مضمضة
اول ما نصحي من النوم مضغ ورقتين نعناع.

واجب المحاضرة التالتة:

1- ارجو الالتزام باللي قلته انا بقالي ساعتين بكتب لكم عشان تنفذوا وتدعوا لي بلاش تخلوني اطلع الخرزانة والا الفلكة بدري كده.

2- تجميع قشر الليمون والبرتقال واليوسفي اللي هيستعمل في البيت لمدة يومين وحطيه في كيس في التلاجة.

3- نفتح درج المعالق و طلعي معلقتين كبار (معالق استنلس استيل عادية من اللي بناكل بيها) فاضيين والا عليهم حاجة والا فيهم حاجة
وحطيهم في الفريزر لحد ما اقولك هاتيهم.

4- توضيب الميزانية عشان علي الاسبوع الجاي هنشتري حاجات مهمة.

المحتوي حصري وطالع عيني فيه والله اعلم
لا ابيح النقل بدون ذكرالمصدر

وطبعا المصدر كما قلت منتدى فتكات لكاتبته د/بكرة أحلى من النهاردة