نفساني - عرض مشاركة واحدة

25-02-2012, 03:44 AM

اعوذ بالله من الشيطان الرجيم

بسم الله الرحمن الرحيم

اولا اقول الله يشفينا اجمعين من كل شيء يؤذينا انه هو السميع العليم

ثانيا انا ما سجلت الا عشانك يا ابو خالد بحاول اساعدك باللي اقدر عليه و يا رب يشفيني وياك وكل مسلم

بالنسبه لزوجتك قول لها تصبر عليك لان هذا غصب عنك و ان الامر فوق ما تتصور وهذا اختبار لمحبتها لك

تزيد من حنانها وعطفها واهتمامها لانك حاليا بامس الحاجه لها بعد الله وبالنسبه للمدير والناس احس ما راح يتقبلون اللي فيك لانهم ما راح يحسون باللي فيك

اهم شي ابيك توصل فكره لاقرب الناس لك ان وضعك مو بسيط ولازم يقتنعون بانك في حاله يرثى لها وان هذا مو وهم وان انت تحتاج لعلاج فلازم يراعون ظروفك ويصبرون عليك

ثالثا لازم تروح دكتور نفسي باسرع وقت ممكن عشان يعطيك العلاج المناسب لك ولازم احد يكون معك وعشان تفهم المدير بالحاله اللي انت تمر فيها وانها مو سهله خذ تقارير من الدكتور للمدير

فيه علاجات كثيره للاكتئاب و نوبات الهلع و الوسواس القهري لكن مو شرط تنفع معك لان بعض الناس تفيد معهم علاجات وبعضهم لا وهذا لان كل انسان له خريطه جينيه يعني يمكن انا يفيد معي

علاج سبرالكس وانت لا ويمكن انت يفيد معك علاج لوسترال وانا لا يختلفون الناس

طبعا العلاجات تحتاج فتره طويله ويبي لك صبر لين يتحسن مزاجك ويتفاعل العلاج مع جسمك

فيه علاج سريع بالكهرباء ويقال انه جدا ممتاز للي يبي يتحسن بسرعه لكن انا ما جربته اعتقد التحسن في خلال شهر على ما اذكر ويمكن تزود او تقل

رابعا برايي لا يكفي العلاج الطبي فيجب عليك العلاج بالرقيه لان احتمال وهذا برايي يكون فيك عين او مس وطبعا المس يسوي بالانسان اشياء ما تتخيلها حتى اشد من نوبات الهلع واعتقد ان حتى نوبات الهلع يمكن تكون منه

طبعا انا اقول لك الاشياء هذي عن تجربه وتحسنت بنسبه كبيره والحمد لله لكن لازم تستمر عليها فتره طويله ما راح اقول لك كم لي وانا مريض عشان ما تنهبل بس الحمد لله ان مع العسر يسر بديت اتحسن ولله الحمد ولازم

ترضى بالامر الواقع وتحاول تصبر نفسك و زوجتك تساعدك بالشي هذا

العلاج بالرقيه اللي انا مجربها اولا اذكار الصباح و المساء واذكار النوم _ اكتب ف القوقل اذكار ابن عثيمين _ استمر عليها قد ما تقدر واذا قطعتها ارجع لها بس لا تتركها ابدا

ثانيا ايات السكينه و ايات الشفاء و سوره يوسف وسوره البقره وايات المس و العين كلها موجوده باليوتيوب اسمعها يوميا مو شرط كلها مع بعض لا يعني غير بينها بس اسمعها اطول فتره ممكنه وطبعا لا تنسى تجعل لك كل يوم ورد يومي تقرا القران من المصحف

فيه ادعيه احب اقولها دايما وهي كما قال تعالى (وقل رب أعوذ بك من همزات الشياطين وأعوذ بك رب أن يحضرون ) كررها دايما وانت رايح وانت جاي وفي كل وقت

فيه الدعاء هذا ( بسم الله ارقيك من كل شيء يؤذيك من شر كل نفس او عين حاسد الله يشفيك بسم الله ارقيك ) هذا اذا احد يرقيك اذا انتي ترقي نفس غير الصيغه في الكلام على نفسك مثل بسم الله ارقيني ..الخ

دايما قل حسبي الله ونعم الوكيل وكررها دايما

ولا تنسى المعوذتين و الاخلاص و الفاتحه كما قال الرسول عليه الصلاه و السلام عنها انها الكافيه

اتمنى ايضا تذهب للشيخ تراه موثوق ( لا يطلع دجال ) يقرا عليك يوميا اذا تقدر او حسب استطاعتك

طبعا ماء زمزم قال الرسول عليه الصلاه و السلام لما شرب له يعني اشرب وخل بنيتك ربي يشفيك من كل شيء يؤذيك و ادع ربي يشفيك

الزيت المقري دهن جسمك كله من راسك لساسك حتى المناطق الحساسه وادع ربي يشفيك واقرا ع نفسك

طبعا كل اللي اقوله لك عن تجربه و الحمد لله انا حالي افضل واسال ربي اكون افضل و افضل وكل مسلم

السدر المطحون اغتسل به بعد ما تتروش حط السدر شوي منه في سطل و حركه مع المويه ولو تحط شوي زمزم يكون احسن بعد وتوضى منه وامسح جسمك كله من راسك لساسك واطلع تنشف والبس ملابسك

وايضا السدر اولا تعبي كاس مويه زمزم وحط بطرف اصبعينك شوي من السدر وحطه في كاس المويه واشرب منه يوميا كل ليل و انا عن تجربه حسيت تحسن ( فيه ناس يخافون انه يسبب لهم مشاكل عقم وكلام كثير لكن كثير جربوا وانا منهم واقول انه من افضل العلاجات)

اخر شي ابي اقول لك لازم تستمر وتصبر لين ربي يزيل البلاء عنك وحتى لو حسيت انك طبت استمر عشان ما ترجع لك الحاله

و شي ثاني ابي اقول لك انت شكيت لنا وعبرت عن حالك وتعبك وحنا مثلك مالنا حول ولا قوه لكن جرب تكون ساجد لرب العالمين وتشكي له باللي شكيته لنا وعبر وقول اللي بخاطرك كله لا تبقي شي لو تقعد بالساعات وانت تشكي له وتفضفض له

راح يساعدك لانه ارحم الراحمين وارحم منا لك

اتمنى اني افدتك واسال لي ولكل مسلم تايه او مريض ولا يعلم ما به من مرض ولا يعرف حاله الا رب العالمين ان يشفيه السميع العليم اللهم امين