|
أرجوا منكم المساعده .. أعاننا الله و إياكم
السلام عليكم ورحمة الله وبركاته
انا رجل متزوج أحب حرمتي و تحبني هيه
لكن بعد فتره تقريبا من زواجنا بعد شهر العسل بشهرين
بدأت تصرفات حرمتي تتغير مثلا يعني ..
الفتره الأولى ::
لا تنام معي و تبتعد عني و كل ما اقتربت منها طارت بعيد
و صارت حركاتها مثل المراهقين في شدة العمر
يعني كل دقيقه تتصل فيني و تقولي انت ما تهتم فيني و لا تعطيني ويه انت ما تحبني ما تحبني و تم تكرر هذا الكلام
انا اكون بالدوام و دوامي فيه الكثير من الناس جنبي ما بي احسسهم انه انا اسوي علاقات غير شرعيه و مثلا ارد عليها .. ليش ما تحبيني
اسكت و اقوللها انزين اشوي اخلص المعامله و الصرف و اتصلج ..
تقعد تصيح لين ما اضطر اطلع من دوامي و اسير لها .. من حبي لها و خوفي عليها لكن لاسف ما تقدر
الفتره الثانيه ::
بعد تقريبا اسبوعين انجلبت غير قامت تطبخ بفظاعه يا ناس يعني اتسوي اكل و اتسوي و اتسوي و اتسوي و بعدين تقولي مب حقك هذا
انا اكون توني راجع من الدوام و يوعان و تعبان و هالك دوامي من الصبح الساعه 7 لين 5 العصر
تشيله من عندي و توديه حق البشكاره تقولها أكلي و اشبعي و جدامي
انا ما قووللها اي شي سكتت بس كم مره نبهتها ماريد تسوي هذي الحركه و انا يوعان
و يوم اني نرقد تشل اللحاف كله و تعقه على الأرض و انا ساااااكت
يوم ابطل التلفزيون تبنده و تقعد عليه و انا ساااكت و اضحك
يوم آكل تشل الأكل عني و تقعد جدامي
يوم اطلع تكون في الكرسي الوراني للسياره و فجأه تنط للكرسي الجدامي
و تمت هذي حالتنا لين اسبوعين
الفتره الثالثه ::
تغير تماما صار ويهها اصفر و شفايفها بيضه و عيونها حمره و نقصت من وزنها 5 كيالو .. حاولت وحاولت فيها
لين ما قمات تصيح وايد وايد يعني اللي يجوفها يبي يصيح معاها
قامت ما تكلمني تكتب لي ورقه و اول ورقه و صلتني كانت محطايه على سيارتي " ليش ما تفكر تضمني لحضنك و تنسيني همي "
مادريت شو اسوي سرت الدوام و وصلي مسج منها " ماحبك لأني في داخلي احبك "
و يعني شعورها متناقض وايد يخوفني وايد
حاولت فيها وايد يا ناس و سرت لأبوها و امها بس استحي اتكلم معاهم بهذي الطريقه لأنهم كبار في السن
و مشكلتي مشكله الله يعين كل متزوج على بلوته و كل اعزب على عزبته
و آسف على الأطاله
فمان الله
|