|
اخى الاكبرواثارالحبوب المخدره
السلام عليكم ورحمة الله وبركاته
احييكم اخوتى واخواتى واعرض عليكم مشكلتى عسى الله سبحانه وتعالى يجعلكم سبب فى مساعدتى بالدعاء والنصح والارشاد جزاكم الله خير وشفا مريضكم واتم عليه الصحه والعافيه
لى اخ يبلغ من العمر 35سنه فى فترة الثانويه العامه بدأ بتعاطى الحبوب المخدره اللى اسمها حبوب الصراصير واخرى اللى بتخلى الانسان ينام كتير
اخويا طيب جدا وحنون ورغم تعاطيه للحبوب دى الا انه محبوب من كل قريب منه وعمره ماتسبب فى أذى لانسان
هوحاليا مبطل الحبوب دى من حوالى 4شهور على حد قوله لانه تعب بس المشكله انه بيبطل ويرجع تانى بعدفتره
صارحنى من يومين انه لمابيبطل بيبقا لسانه تقيل وبينسى كتير فانافهمت انه علشان كده بيرجع لانه فاهم انه شكله العام وحش قدام الناس وانا مش برضى اجرحه واقوله انه بيبقا غريب الشكل لما بيتعاطى الحبوب دى مسكين جسمه رفيع جدا ومهمل فنفسه وخصوصا بعدجوازى وبعدى عن البيت فى محافظه بعيده عنه وهويتيم واخواتى قلوبهم قاسيه عليه لانه احيانا بيبقا عصبى
وبيجرحوه بالكلام وهويبكى زى الطفل
انامعتبراه مريض وحقه عليا اخد بأيده بس هما مش مستوعبين ده وفاكرين انه هو اللى اختار طريق الادمان بمزاجه وانه يقدر يبطل من نفسه ربنا يهديهم
كل خوفى عليه انه يفضل طول عمره هايم فالدنيا وميتجوزش واشوف عياله
ياترى هيقدر يبطل نهائى وازاى وهو بعيد عن ربنا طبعا بسبب الادمان وانا بكل الطرق بحاول معاه انه يحسن علاقته بربه علشان يقدر يقاوم وينصلح حاله بس بعدى عنه معجزنى عن متابعته طبعا
بسألكم ياترى هيفضل يبطل ويرجع كده علطول ولا فيه امل انه يبطل نهائى
طبعا الكل عارف شكل متعاطى الحبوب عامل ازاى مفيش بنت هتوافق تتجوزه رغم انه موظف وعنده شغل خاص بس اى بنت تخاف تربط حياتها بشخص كده
نفسى اشوفه كويس وقريب من ربه ومهتم بنفسه وصحته والله انى ببكى لما اشوفه واثرالحبوب دى مخلى لسانه كأنه معوق وايديه ترتعش احيانا
مين عنده فكره عن هذا النوع من الادمان يفيدنى افادكم الله وبالله عليكم اللى معندوش فكره يدعيله لانه قسما بالله انسان طيب بكل معانى الكلمه والف خساره انه يعيش ميت بقية عمره
لعل دعوه بظهر الغيب تشق السماء ويقبلها رب العباد ويصلح حاله ويبرد قلبى عليه
واخيرا اسفه للاطاله بس والله من حرقة قلبى على اغلى انسان عندى من بعد امى اخويا الحبيب شفاه الله وعافاه
والسلام عليكم ورحمة الله وبركاته
|