المشاركة الأصلية كتبت بواسطة أبـــ تـركـــي ــــو

السلام عليكم على الجميع ..

أمس الساعه 2 بالليل حسيت بتسارع نبضات بالقلب وقلت مومشكله راح استرخي ويروح ان شاء الله طبعاً كنت مع ولد خالتي ورايحين نوصل أقاربنا وهو يسوق وقلتله ترا كذا كذا انا حاس المهم وقفنا صيدليه اشتريت دوا الكونكور حقي واخذت منه ربع حبه ولسه مستمر اخر شي صرت اشوف الدنيا بيضه زي الغشاوة بيضه مو عارف كيف اوصفها لأنها اول مره تحصلي ويارب ماعاد تحصل مره ثانيه وبرضوا جفاف في السان ولون لساني صار ابيض وقلت لولد خالتي بسرررعه عالمستشفى ورحنا المستشفى طبعاً راحت الغشاوه هذي لما حاولت اخذ نفس وارش وجهي مويه واشرب مويه ,,
المهم دخلوني عند العناية القلبيه جا الدكتور سوا تخطيط قال انا مو شايف غير تسارع سوالي التخطيط 3 مرات طبعاً اول مره يوصل التسارع عندي 160 الى 170 تقريباً حسب التقرير , والضغط ارتفع 150 وشوي على 70 تقريباً
المهم اقنعته يسويلي تحاليل انزيمات القلب بالقوه وافق وقال مره وحده نعمل تحليل الدم المعروف السي بي سي اللي يسمونه صورة للدم, وطلعت نتايج الأنزيمات الحمدلله طبيعية مافيها اي شي
وطلع عندي نقص بالبوتاسيوم طبعاً هالبوتاسيوم مشكلتي من اول وطلع عندي السكر موصل 240 سألني متى اخر مره اكلت قلتله قبل ما اجي بساعتين قالي اها مومشكله لكن برضوا حاول تنتبه للسكر لاتاكل سكريات كثيره طبعاً انا وسوست شوي وبدأت اقرأ عن السكر ووو إلخ
المهم يقولي اعراضك مرررررررررره مالها في القلب ولازم تزور دكتور باطنية قلتله انا سويت كل فحوصات الباطنية في احد المستشفيات قالي لا لازم دكتور شاطر وشوف من عندنا المهم عطاني ابره تخفف النبضات قلتله لاتعطيني اي ابره لأن اعرف نفسي راح يزيد وعطاني شوي منها وفعلاً زاد قام قال للممرضه بالإنجليزي انه انا صح كلامي
المهم شوي يصير ينزل على خفيف وصل 130 ويرجع يطلع 140 اخر شي قالي انت يبغالك دكتور متخصص في كهربة القلب وقالي ارجع راجع مع الدكتور وسوي موعد يوم السبت ان شاء الله وقالي لما تروح البيت خذ ربع حبه من الكونكور قلتله لا راح اخذها هنا قدامك احسن, وقالي اذا مانزلت النبضات بعد ساعه ان شاء الله ارجع, طبعاً الدكتور هندي او باكستاني ومسكين كبير بالسن وهو اعتقد زي الطبيب العام في القلب او شي زي كذا او طوارئ قلب حسيته زي الضايع معاي ويقولي انت عندك قلق اصلاً, بس المشكله اللي جاني قبلها ماكان عندي اي قلق بالعكس كنت مره مبسوط انا قلت يمكن عشان كثرت اكل وبرضوا يمكن عشان نقص البوتاسيوم وكان بيعطيني حبوب قلتله ماقدر اخذها لأن جربتها قبل وحاست بطني حوس وتخليني مسطول ماقدر اتحرك وحالتها حاله
والحين بحاول اعوض عن طريق الموز والأشياء اللي فيها بوتاسيوم مع اني الحمدلله اكل موز كل يوم تقريباً بس انقطعت عنه كم يوم ومادري وش سبب نزول البوتاسيو دائماً عندي .
لكن خوفني موضوع السكر ويارب نقدر نتغلب عليه لأنه نفسي تقريباً وماعطاني اي علاجات طبعاً
وبرضوا من قوة التفكير ماقدرت انام من امس غير ساعين تقريباً او 3 وكلها قلق

دعواتكم