انا عندي مشكلة تتكرر معي وقت السفر في الصيف خصوصا في السنوات الاخيره

سافرت تقريبا 4 مرات من الرياض الى مدينة اخرى
قبل السفر تكون الحالة نفسية جيده
لكن مجرد وصولي لمنزلنا مع اهلي في المدينة الي اسافر لها ينقلب الحال بشكل غريب وتنتابني نفس الاعراض الي تجيني مع كل سفر

اخرها كانت الاسبوع الماضي ماكملت 48 ساعه الا انا راجع للرياض ماقدرت اتحمل ونفس الاعراض تقريبا


الاعراض :
1- نوم متقطع وقليل ( ارق )
السنوات الماضيه كان يمر يومين او ثلاثه مايجيني نوم بس غفوه يمكن ساعه او اقل ( بدون ادويه منومه )
المره الاخيره هذي استعملت حبيتن من الريفوتريل المهدى والمنوم في نفس الوقت بس مانمت الا 4 ساعات في اليوم الاول ونفسها في الثاني
اليوم الاول ساعه في النهار و3 ساعات في المساء
واليوم الثاني ساعتين نهار وساعتين مساء مع اني ماخذ حبيتن يعني 4 مج خذلني هالدواء بصراحه ..

2- نقص الشهيه للاكل والشرب ،، الرغبه ضعيفه في الاكل وشرب المويه
3- مزاج سيء وحزين ومشحون في نفس الوقت
4- الشعور بالندم على السفر
كل ماسافر وتجيني الاعراض اعاتب نفسي بالداخل اقول ليه حطيت نفسي في الموقف البايخ ذا وانا حاس بالي بيصير لي قبل اسافر وسبق ان صارتلي لي مرات سابقه

5- عدم الخروج من المنزل وتفادي مقابله اي شخص
6- الشعور بالامساك
7- دوخه وخمول وارهاق


حوالي 4 او 5 مرات تقريبا جاتني المشكله في السنوات الاخيره ونفس الاعراض مع كل سفر

مع اني قبل مااصاب بالمرض النفسي كان السفر طبيعي واقعد بالشهرين واكثر ومافيه اي شكوى



بس السنوات الاخيره 24 ساعه او 48 ساعه او ثلاث ايام كحد اقصى وانا راجع للرياض .



مدري وش الحل هل كان من المفروض علي البقاء مع اهلي حتى اتأقلم مع الوضع
ولا قرار عودتي وبقائي وحيدا كان سليم ؟؟؟






طبعا اول تشخيص لي في بداية مرضي قبل 14 سنه : قلق عام مصحوب باكتئاب

المصدر: نفساني