نفساني - عرض مشاركة واحدة

24-09-2012, 05:14 AM

السلام عليكم ورحمة الله وبركاته

اخواني يقول الشيخ راكان بن حثلين

ماقل دل وزبدة الهرج نيشان

والهرج يغني صامله عن كثيره

باختصار وبعد خمس سنين من المعاناه والاكتئاب الي مقدر اوصفه لكم لأن كل مكتئب يعتقد ان مابه هو اشد انواع الاكتئاب في تاريخ البشريه ههههه
اخواني يكفي ان اقول لكم وصل فيني الاكتئاب اني وصلت لمرحله احسد الي يمووت تخيلوووووووووو

وصل فيني لمرحله انام في حضن امي وانا رجال عمري وقتها 28 سنه

وصل فيني اني طحت ع الفراش 3 شهور كل الي اعرفه اني ابي امووت وبسسسس

وصل فيني ان حياتي صارت من البيت الي مكان الرقيه الشرعيه فقط

ومع هذا كانت تزود حالتي سوء

ومن قبل سنه بس اتخذت قرار اعتبره الاشجع في حياتي.

اتخذت قرار انفض غبار الخوف من حياتي وارجع امارس حياتي مثل ماكانت قبل الاكتئاب حتى لو تعرضت لضغوط نفسيه وضيق ورهاب وخوف

اول شي سويته رجعت كل علاقتي الي انقطعت بسبب الاكتئاب ورجعت للاستراحه وصرت اسوي كل شي كنت اسويه قبل الاكتئاب لدرجة اني كنت اسوي برنامج يومي مخصص فقط لاستعادة ذكرياتي الحلوه وزيارة كل مكان لي ذكرى حلوه فيه وصرت ما اجلس في البيت ورجعت لهوايتي الاعمال الحره والبزنس ورجعت لعمالي وصرت اجلس معهم ونتناقش في الشغل يعني ورجعت للشباب في الاستراحه وانبسطو برجعتي لهم في البدايه كنت احس ارجولي ترتجف بسبب عدم الثقه بالنفس وهذا كله بسبب الاكتئاب وكنت اقول في نفسي انا الي كنت اسافر اخر الدنيا لحالي وماخاف من شي انا الي كنت لا دخلت مجلس يفزون لي ويجلسوني في صدر المجلس انا الي كنت لا تكلمت سكت المجلس يسمع لي انا الي كنت اكسر خشم بندر وفهد في البيلوت ههههههه كذا يصير فيني و ترتجف ارجولي بس لاني جاي للشباب في الاستراحه افا افا يابونايف ماهيب هي وصرت اعطي نفسي دفعات معنويه وكان لها تأثير جدآ ايجابي ع نفسي واستمريت ع هالوضع البيت ما اجلس فيه يا مع العمال او في مجلس عماني او في الاستراحه ولاحظت اني يوم بعد يوم اتحسن والدنيا تبتسم لي بعد ست شهور تقريبآ حسيت اني تعافيت بشكل كبير جدآ بفضل الله سبحانه وعرفت علتي ودريت ان الاكتئاب كان بسبب الضغوطات الي مريت فيها لاني خسرت مبلغ كبير جدآ في الاسهم وتعرضت بعد لمشكله سببت لي قلق يومي استمرت معاي خمس شهور تقريبآ

والان وبعد سنه من اصراري ع الخروج من محنتي ومن الاكتئاب استطيع انا اقول لكم بفضل الله تعالى ان شفيت بنسبه كبيره جدآ ولله الحمد

اخواني والله العظيم اعرف شخص من شدت الاكتئاب والهلع الي عنده ورب البيت انه ينحاش في الشارع ومايدرون جيرانهم الا وهو داخل عليهم في البيت ويطيح عندهم والحين ابشركم والله انه متزوج وعنده عيال ورجل اعمال ناجح و يمووت في شي اسمه وناسه وسفر ودايم يصيف برا مع عائلته ماشأء الله تبارك الرحمن .. وع فكره ماياخذ علاج نفسي ولا قد اخذ نهائيا وطلع من الاكتئاب بالتطنيش والنسيان هذا كلامه لي

اخواني الاكتئاب والهلع والرهاب وكل الامراض النفسيه هو تصوير عقلكم الباطن يعني الاكتئاب منك واليك

كل ماكانت ثقتك بالله اولا ثم افكارك ايجاييه كل ماكان وضعك النفسي افضل

نصيحه نصيحه نصيحه ارجعو مارسو حياتكم مثل ماكانت قبل الاكتئاب في البدايه راح تعانون لكن مع الوقت راح تلاحظون ان ثقتكم بانفسكم ترجع تدريجي والدنيا تبتسم لك ونفسيتك تزين شوي شوي بتحس بشعور غريب بتقوول اااه معقوله الحياه حلوه كذا وانا مدري معقوله كنت اسير افكاري السلبيه واسير للوهم والاحباط

همسه لكل الرقاة الشرعيين اتقوو الله في انفسكم ولا توهمون الناس بامراض ليست فيهم الله يسامح كل راقي اوهمني بالمرض الروحي

اخواني لا تيئسون الشفاء قريب بأذن الله تعالى توكلو ع الله ومارسو حياتكم بشكل طبيعي ومع الوقت بتلاحظون بتحسن كبير جدآ جدآ جدآ

كل ما ارتاح العقل من التفكير السوداوي ارتاحت النفس

مابي ارجع لكلامي فوق وارتب المفردات لاني ابي كلامي يوصلكم عفوي كما كتبته

اسئل الله العظيم رب العرش العظيم ان يشفيكم جميعا ويكتب لكم خير الدنيا والاخره وان يعوضكم عن كل لحظة معاناه عشتوها وان يكتب لكم الاجر

الصلاه الصلاه الصلاه. والدعاء. والاذكار. لاتتركوها

تقبلو تحياتي وااسف ع الاطاله

المصدر: نفساني