المشاركة الأصلية كتبت بواسطة محتري الفرحه

ثلاث سنوات من شيخ ل شيخ ولا حسيت بشي كل شي استخدمته زيت مقري فيه ماء مقري فيه اعشاب كل شي ولا استفدت شي

بالعكس الا المشايخ دخلوني في دوامت السحر والعين والحسد والمس ثلاث سنوات وانا عايش في وهم كل الي اعرفه اني صرفت اكثر من 200 الف خلال 3 سنوات كلها على الزيوت والماء والعسل والاعشاب. وكلها نصب في نصب وتجاره

والله ماتحسنت وحسيت بالعافيه الا بعد مابعدت عن المشايخ وكذبهم لانهم يعيشون المريض في اوهام يخلونك تحارب شي مجهول ماتشوفه انت فيك عين او سحر او حسد او مس وخلاص عاد يالله روح دور هالعين ولا الحسد ولا السحر وحاربه وياليتهم بعد فتره من العلاج يقولون لك اتضح معنا مامعاك اعراض روحيه وننصحك تروح طبيب نفسي لا لا يتركونك عايش في هالوهم علشان يبتزون جيبك وياخذون اموالك

انا انصح اخواني الي يعاني من اي شي يتجه للطب فقط او يرقي نفسه بنفسه لان القران علاج

وانا بصراحه اعتقد 99 بالميه من الي يقرون عند المشايخ مرضى نفسيين وبصراحه اغلب المشايخ ماخذين الموضوع تجاره وبزنس

اجل يشترون قارورة الزيت ب 8 ريال ويبيعونها ب 50 ريال ليه ؟ على اي اساس ؟ علشان تفلت فيها ؟ اجل المفروض سعابيلك تعبى بقوارير ويكون سعرها اغلى من البترول لانها علاج سحري الطب ماوصل له .. ياعزيزي الي يشفي القران مو سعابيلك الي اغلبها جراثيم

والعسل يشتريه ب 60 ريال ويبيعه ب 450 ريال

انا اسميها تجارة السعابيل
اعرف ناس عندنا والله بنو عماير وصارو تجار من ثقافة بيع السعابيل والوهم للناس

بعدين عطوني دليل واحد على التفال في الما والزيت ؟ معروف ان التفال في الما جابته الكنيسه ويسمونه الما المبارك او الطارد للشياطين

فيه شيخ مشهور يطلع ع القنوات يسفر احلام وتعرفونه والله العظيم انه رفض ينفث في ماء صحه جابه له واحد فقير ومعدم قسم بالله رفض ينفث فيه الا بفلوس. واذكر انه يقولون للحريم الي مامعها 50 ريال لا تجيني للرقيه فلوسكم قبل كل شي. وع فكره هالشيخ معروف جدآ وكلكم تعرفونه ويطلع في القنوات ويفسر الاحلام الي كلها كذب في كذب ودجل وضحك ع الناس

قسم بالله العظيم اني اعرف رجال زوجته تعبت نفسيآ مررره و ماخلا شيخ ماوداها له الي يقول سحر والي عين والي حسد. مافيهم احد قال والله مدري وش فيها هههههه المهم خوينا هذا جاه واحد من اخويانا وقال له حالة زوجتك نفس حالة اختي وبعد ماتعبنا من المشايخ وديناها دكتور نفسي وعطاها علاج والحين مافيها الا العافيه المهم اقتنع بالموضوع و اقنع زوجته وراحو دكتور نفسيه تدرون وش قال له ؟ قال ياخي وينك من زمان زوجتك معها اكتئاب مابعد الولاده ههههههه وعطاها علاج نفسي والحين مافيه الا العافيه ربي يتمم عليها

من يوم خلقنا الله وحنا نتحلم والحلم شي طبيعي جدآ بس الأمه كثرت احلامها في هالزمن وكثرو المفسرين لانها امه نايمه. فلسطين محتله من 80 سنه والمسلمين مضطهدين في كل مكان والامه متخلفه علميآ عن كل الامم وهذولا طايحين لي تفسير في الاحلام جد امه تفشل
بسئلكم بالله حنا وش قدمنا للبشريه ؟ كل الي سويناه اننا نبكي ع اطلال الماضي وع الاندلس وع علمأئنا الي اكتشفو ان الدم يجري في الجسم والضوء ينكسر ههههههه لا خوش اكتشاف

الغرب شوفو وش اكتشفو و وين وصلو. كل شي نستخدمه من الغرب الطائرات السيارات الجوالات الاجهزه الكهربائيه كل شي حتى الطب

بسئلكم ادويتكم النفسيه الي تستخدمونها من الي اخترعها وصنعها لكم ؟

انا الي ابي اقوله انه ماخلانا امه متخلفه الا هالمتخلفين الي تفكيرهم مايتعدى خشومهم

الاسلام دين يدعو للعلم والمعرفه والاسلام كرم العلماء واحترم عقل الانسان ولا يرضى انك تأجر عقلك لناس متخلفين حتى شهادة ابتدائيه مامعاه ويجيك يقولك انت فيك كذا وكذا ويقيم حالتك وعلاجك بعد

انا اقول القرأن شفاء لكل شي لكن مو بهالطريقه طريقة السعابيل وبيع الما والزيوت والعسل. دبل سعرها 8 مرات. لان اذا غابت النيه الصادقه غاب الشفا والعافيه

ع فكره مسئلت دخول الجن لجسد الانسان انا مو مقتنع فيها ولا فيه دليل واضح ع هالشي والي عنده دليل يجيبه وانا مستعد اناقشه

الانسان مخلوق من طين والجن من نار. كيف يدخل الجن الانسان ؟ طيب ليه مو العكس ليه الانسان مو هو الي يدخل الجن؟

طيب الله مو هو الي خلق الانسان والجن ؟ طيب ليه خلق الجن بطريقه تمكنه من دخول جسد الانسان وتعذيبه ؟ الله سبحانه وتعالى مافي اعدل منه ولا يرضى بالظلم

اخيرآ حاب تعرفون اني مو علماني ولا ليبرالي.

انا اشهد الا اله الا الله وان محمد رسول الله

ومصدق كل شي جا به القران والرسول صلى الله عليه وسلم ومؤمن ان القران شفا لكل امراض الدنيا لكن بشرط انت ترقي نفسك وتدعو الله انه يشفيك وتتتضرع لله سبحانه وتنكسر بين يديه

مو ب ثقافة التفال والنصب والتجاره


ع فكره انا مو قتنع بالعلاج النفسي لسبب بسيط ! لانه يصلح شي ويخرب شي يعني يعالج مرضك. ويخرب جسمك من سمنه الى ضعف جنسي. هاذي ملاحظتي ع الادويه فقط ولا انا مقتنع فيها طبيآ لانها نتاج علم وبحوث وتجارب. مو نتاج سعابيل هههههههه

ااااه بس متى اشوف امة الاسلام تتسيد الامم بالعلم والمعرفه والاخلاق والديموقراطيه واحترام عقول البشر. والدعوه ل دين الله بالحكمه والموعضه والرحمه والعلم

متى نرجع امه مشرقه امة علم مثل ماكنا قبل ايام بغداد السلام والاندلس المفقود

اسف ع الاطاله