نفساني - عرض مشاركة واحدة - اخواني ابي استشيركم بموضوع ضروي ارجو الدخول

14-10-2012, 11:18 AM

اقتباس:

المشاركة الأصلية كتبت بواسطة أبو تركي

الشيخ اللي في الخفجي اللي هو الشيخ ارشيد العنزي هو مخاوي والله اعلم ولكن يستخدمه بالتشخيص وسبحان الله في ناس يستفيدون منه وفي ناس مايستفيدون لأن الشفاء من الله وعلاجه بالعسل والزيوت وهو غالي شوي بيني وبينك وانا رحت له وقالي انت ماتنام وتتكلم كثير وعندك وسواس .. طبعاً مادري وش قصده في اتكلم كثير الله واعلم .. لكن عندي وسواس من الادوية والقلب واوسوس اقول اكيد فيني شي لأن الأعراض اللي فيني تدل انه في شي لأن انا غير عن اي شخص مهلوع ومتعود على دوا يهدي نبضات القلب وحاله حاله

بس ليتك تقولي وش اسم الشيخ اللي تقصده الأول ؟

بصراحه انا ماعرف احد مخاوي الا خالد عبدالرحمن لانه مخاوي الليل ههههههههه

والله هالخزعبلات والترهات تخليني اضحك من قلب ههههه الي يسعدك يابوتركي

ممكن سؤال ؟
وش معنى كلمة مخاوي ؟ اوكي انا بجاوب بالي افهمه اعتقد كلمة مخاوي يعني مثلآ فلان مخاوي فلان يعني يمشي معاه ويتبادلون الزيارات يعني اصدقاء طيب السؤال الي يطرح نفسه الان هل فيه احد شاف رشيد يمشي مع صديقه الجني وطاق حكي معاه ههههههه هل في احد شاف الجني حاظر عشا ولا غدا عند رشيد وجالس في صدر المجلس هههههه

طيب اثبتو بالدليل القاطع ان رشيد مخاوي جني كلام عواطف ما ابي. ابي اثبات حسي ملموس يثبت هالشي .. طيب لو فرضنا ان الشيخ رشيد مخاوي جني او مجموعة جنون. طيب ليه ماتستفيد منه الدوله ؟ ليه مايطلبون منه يرسل جنونه ع صواريخ ايران الي موجهه للخليج ويدمرونها بدل هالخوف الي عايشين فيه من ايران وتهديداتها ... ليش رشيد مايرسل اخوياه الجنون ل بنك سامبا ويسرقون له كم مليون ويغتني ويرتاح من الرقيه وتعبها ههههه الحين سليمان عليه السلام مو قاله عفريت من الجن انا أأتيك بعرشها قبل ان تقوم من مكانك ؟ يقصد عرش بلقيس طبعآ طيب ليه الجني خوي الشيخ رشيد مايجيب له عرش اليزابيث ملكة بريطانيا ههههههههه

طيب بقولكم قصه صارت مع واحد اعرفه معرفه شخصيه وهو الي قال لي قصته بنفسه يقول صاحبنا انه بعد انهيارات الاسهم تعب نفسيآ وجاته حالت اكتئاب وراح ل شيخ يرقيه والشيخ كلكم تعرفونه او اغلبكم. قاله الشيخ انت معاك مس واضح من الاعراض الي عندك المهم جالس ثلاث شهور وهو يقرا عنده وخسر تقريبآ 10 الاف في ثلاث شهور ع العسل والزيت والما والاعشاب وكل يوم رقيه ب 50 ريال. المهم بعد فتره قاله انا متاكد فيك مس لكن يبي له وقت علشان ينطق المهم صاحبنا وسوس وصار ماينام وصار يجلس دايم لحاله راح للشيخ وقاله الاعراض الجديده قاله الشيخ هذا المس بدا ينضغط وراح ينفجر في يوم. المهم عايش ع امل انه في يوم ينطق هالجني بعد فتره تعب اكثر و قال للشيخ شوف لي لحل قاله الشيخ برسلك ل شيخ ثاني صديق لي مخاوي جني مسلم وهو راح يفهمك كل شي المهم راح صاحبنا ل المطوع وصار يقرا عنده وقاله فعلآ معاك مس جني مكابر مايبي ينطق لكن اوعدك مع الوقت اخليه ينطق المهم صاحبنا جلس ع ذا الحال تقريبآ شهرين ووصل لمرحله صار ماينام في اليوم كله الا ساعه او ساعتين المهم اخوه الي اكبر منه قاله انا بروح معاك للشيخ وبتفاهم معاه عاد اخوه الكبير رئيس كبير في شركة ارامكو ومعاه هندسه ميكانيكيه ورجال مثقف المهم راحو للشيخ ويعد الرقيه جلس مع الشيخ وقاله انتو وخويك امرضتوو اخوي وجبتو له الوسوسه وانا راح اشتكيكم ليه تقول لاخوي عندك مس لين صار موسوس قاله الشيخ فعلآ اخوك عنده مس قال خوينا طيب وليه مانطق طول هالفتره. تدرون وش قال له الشيخ !

قال الجني الي داخل جسد اخوك اطرررم ومايسمع ههههههههههههههههههههههههه ااااه يابطني

شفتو كيف الاستغلال والجشع الي عند هالجهله النصابين الي يستخدمون عالم الجن والاوهام لاكل اموال الناس بالباطل

المهم اخوه الكبير وداه ل دكتور نفسيه في مستشفى فخري في الخبر وعطاه علاج اسمه سبرام والحين الرجال طيب وبخير

في شخص ثاني مريض نفسي قاله شيخ في الجنوب في خميس مشيط تحديدآ انت مسحور وسحرك مكتوب ع الكواكب ههههههههه يالله عاد روح كلم وكالة ناسا يرسلون رائد فضاء يبطل السحر حقك ههههههههه

يا اخوان ابي منكم شي واحد بس ! ناظرو في كل الي يدعون انهم مشايخ ويرقون الناس. هل فيهم دكتور ؟ هل فيهم مهندس ؟ هل فيهم رجل اعمال ؟ هل فيهم اديب ومثقف ؟

ليش اغلب الي يمتهنون هالمهنه اغلبهم جهله ومامعاهم شهادة كفاءه ؟ لانها مهنة من لا مهنت له

اخواني بقولكم قصتي لعل الله ينفع بها

انا خسرت في الاسهم مبالغ كبيره مره وبعد خسارة الاسهم بسنه صارت لي مشكله اضغتني نفسيآ لمدت 7 شهور تقريبآ المهم اني تعبت نفسيآ مرره وطبعآ مثل اي مواطن سعودي اول مايتعب نفسيآ اول شي يفكر فيه المشايخ او بمعنى اصح الرقاه. المهم اني رحت ل راقي وجلس يقرا علي وقال لي معاك عين قويه طبعا شريت عسل وزيت وما واعشاب وغيره. المهم جلست اقرا عنده تقريبا شهر وتعبت نفسيا اكثر لان جو الرقيه والناس الي تصايح والي ينصرعون يجيب الاكتئاب. قلت له ياشيخ انا تعبت اكثر وانا جايك ادور الراحه. قال هذا مو انت الس يتعب هذا الجني قلت الله يعين. استمرينا ع هالوضع وفي يوم من الايام. جلس يقرا علي وركز عيونه فيني وطيرها انا بصراحه خفت وقام قلبي يضرب بسرعه وقلت في نفسي خلاص انا بنصرع وبينطق الجني وانفضح قدام الناس المهم حسيت بتوتر شديد وقلق وضيق في النفس وصرت اخذ النفس بسرعه بسرعه ل حد ما تشنجت. قام صب علي ماء مقري فيه وقال لي هذا الجني بدا يتاثر شفت كيف ماتاثر الا بعد شهر ونص لانه عنيد انا بصراحه صدقت المهم صرت كل يوم ع ذا الحال اذا جيت الرقيه توتر شديد قلق ضيق نفس تنفس بسرعه ثم تشنج. وفي يوم من الايام جلست مع نفسي وقلت انا لازم اوضع حد لهالموضوع كلمني واحد من اخوياي شمري بالصدفه وحس ان صدري ضايق قال لي وش فيك قلته له ياولد السالفه كذا وكذا. قال لي تعال لي في البيت ابيك ضروري المهم جيته وعطاني كتاب عن القلق والتوتر واعراضه قال اخذه واقراه جلست الليل كله اقراه لقيت ان القلق والتوتر اذا صار شديد مره يجيب ضيق نفس وتسارع في نبضات القلب وتشنج. قلت في نفسي اهااااا يعني انا يوم الشيخ خزني بعينه وطيرها فيني جتني افكار اني راح انصرع وينطق الجني واطيح قدام الناس وانا اساسآ متوتر من جو الرقيه ف زاد القلق والتوتر وضاق النفس وزادت نبضات القلب وجاني التشنج. وحسيت اني فهمت حالتي من بكره رحت للشيخ جلس يقرا وسوا نفس الحركه الس يسويها دايم طير عيونه وخزني قلت في نفسي انا مافيني شي مافيني شي مافيني شي. والله العظيم يا اخوان ماجاني لا ضيق نفس ولا نبضات قلب ولا تشنج. بعدها تاكدت انها مجرد اوهام. وزادت ثقتي في نفسي و ارتحت. المهم جلسنا ع ذا الحال اسبوعين وبعدها قلت للشيخ وين الجني ماعاد فيه تشنج ونبضات قلب ولا غيره. قال لي شكله تعب وطلع منك و ان شاء الله مايرجع لك. ضحكت باستهزأء وقلت له لا شكله قاطع اشاره ومسجون وبعد ثلاث بيطلع. قام الشيخ يضحك ضحكه مجامله وحس اني فهمته. ومن يومها قررت ما اروح للرقاه وارقي نفسي بنفسي.

والله ثم والله ثم والله اني بعد ما بعدت عن الرقاه ارتحت نفسيآ وبديت ارجع ل طبيعتي تدريجيآواسترد عافيتي. تدرون ليه ؟

لان عقلي ارتاح من الاوهام والتفكير اليومي كنت كل يوم افكر انا فيني حسد لا لا شكلها عين لا لا الشيخ يقول مس عنيد. لا لا لا يمكن سحر.

ومن هالافكار لين ضعف تركيزي وزادت حالتي سوء و زاد الاكتئاب

في النهايه نصيحة اخو لكم لا تأجرون عقولكم لأحد مهما يكون وخلك واثق من نفسك وتفكيرك و اتبع مايمليه عليك عقلك مو عاطفتك

وتاكد ان الراقي مو افضل منك بشي بالعكس يمكن انت افضل منه بكل شي لكن الفرق انك مبتلى وهو معافى وحتى الدكتور النفسي مو افضل منك الا بتخصصه فقط حتى عالم الفلك مو افضل منك الا بتخصصه حتى عالم الكيمياء مو افضل منك الا بعلمه فقط

يمكن انت افضل من كل هؤلاء في باقي امور الحياه

حتى رئيسك في الدوام مو افضل منك الا في الكرسي الي هو جالس عليه يمكن انت افضل منه في برك بوالديك افضل منه بمحبة الله لك افضل منه بمحبة الناس لك. افضل منه بثاقفتك بمعرفتك افضل منه بامانتك وصدقك

ازرع الثقه في نفسك واعتز بشخصيتك مهما تكون عندك من نواقص لان مافي احد كامل الا الله سبحانه

لا تخاف من الدخول على اي مسؤل مهما يكون ابعد عنك كل الافكار السلبيه طور من نفسك في كل شي. شوف انت وش هوايتك وحاول تنميها وتطورها لا يقف طموحك عند شي

تقبل نفسك وشخصيتك كما هي لا تحمل نفسك فوق طاقتها لانك لن تخرق الارض ولن تبلغ الجبال طولا

اسئل الله العظيم ان يكتب لناجميعآ خير الدنيا والاخره وان يتم علينا نعمة الأيمان والصحه في الأبدان والأرواح

اسف ع الاطاله