نفساني - عرض مشاركة واحدة

03-11-2012, 05:54 PM

مرحبا بالجميع
انا قصتي وهي:
كنت في الدوام وحسيت بصداع واخذت بنادول اكسترا وبعدها حسيت بدوخة وشي غريب وكتمة ودوني المستشفى وقالو الضغط مرتفع وبنعطيك ابره , وبعد ماعطوني ابره صار عندي تسارع في نبضات القلب لأن الإبره شكلها ماناسبتني ودخلوني عناية مركزه وطلعوني ثاني يوم قالوا كل اللي كان فيك قلق وتوتر << ماتوقع لأن مايبغو يعترفون بغلطهم !!

بعدها انا قلت شكل اللي فيني عين ورحت شيوخ وكلهم يقولون عين وحسد واستمريت مع شيخ واحد اوخذت من عنده خلطة بالعسل والحمدلله حسيت بتحسن بعد اسبوعين او 3 اسابيع لأن بعد العناية المركزه كنت احس بقلق وتوتر شديد , ولكن عيب علاجة انه يخليني ادخل الحمام الله يكرمكم بعد كل ما اكل شي يعني أعزكم الله (اسهال يومي) وبعد شهرين تقريباً وانا بالدوام دخلت الحمام الله يكرمكم وبعدها حسيت بحرارة بالصدر وخفقان وصرت اعرق كثير وكلمت دكتور كان موجود بالشركة وقلت له اللي احس فيه وودوني المستشفى على طول وحطوني عناية مركزة , وطلعوني ثاني يوم وقالوا كان عندك نقص في البوتاسيوم بسبب انك فقدت سوائل كثير ولكن السبب الرئيسي هو قلق وتوتر وعطوني دواء اسمه كونكور قالي لازم تستمر عليه فترة وبنوقفه عشان يهدي نبضات القلب , واستمريت عليه اول 3 شهور وبعدها قالي ماراح توقفه بتستخدمه مدى الحياة ولازم تزور طبيب نفسي , لأن بعدها صرت احس بنوبات الهلع وصارت تتكرر علي واجيه زي المجنون ويسويلي تخطيط قلب ويطلع مافيني شي , وكنت اقوله احس بعدم توازن بعد ما اخذ الدوا وكان يقولي تتوهم وطبعاً طلع من اثار الجانبية للدواء او اعراضه الجانبية هي الدوخه وعدم التوازن , وبعد فترة حاولت ارجع العمل للأسف ماقدرت واول يوم كنت بداوم فيه جاني هلع شديد وشردت على البيت مدري كيف وصلت وقدمت استقالتي من العمل بعدها و صارت تجيني دوخه اول ما اقوم من النوم وتجلس شوي وتروح ولكن بعد اسبوع صارت الدوخه هذي مستمره وطول الوقت وصارت مرررره قوية وماقدر احرك راسي منها وجلست على فراشي لمدة شهر ونص تقريباً ماقدر اتحرك وسويت فحوصات للقلب واشعة مقطعية للرأس والحمدلله مافيني اي شي , ولكن تعودت على الدوا وماقدرت اوقفه , بمجرد إني احاول اوقفه وتمر 24 ساعه على طول يرجع تسارع نبضات القلب , وطبعاً الحمدلله بعدها استمريت على الرقية الشرعية فترة وصرت اتحرك شوي وكان عندي انسداد بالبطن والحمدلله انفك , وسويت فحوصات كثيرة وكلها الحمدلله كانت سليمة , ورجعت تقريباً طبيعي لكن عندي عدم التوازن وما اقدر اوقف من دوا القلب هذا , وبعد فترة كنت مكثر من الأكل ونفسيتي كويسه واحاول ازود جرعات الأكل عشان وزني يرجع لأن نزل وزني من 80 الى 60 او 59 , بعدها حسيت بخفقان وانا برا البيت, وماقدرت اتحمل وصرت اشوف الدنيا بيضه من قوة التسارع , ووداني قريبي عالمستشفى وكشفوا علي وسوولي تخطيط قلب والحمدلله سليم وتحليل انزيمات القلب سليم الحمدلله ولكن كان السكر مرتفع وصل 240 والبوتاسيوم نازل وصل 3 ويعتبر بداية نزول مو ذيك الخطورة وجلست عندهم من 3 الفجر الى 7 الصباح حاولو يعطوني ابره وسولي اختبار لها قبل الحقن وعطوني ربعها وسببت تسارع بالقلب, وقالي الطبيب خذ من الكونكور زود نص , واخذته لكن برضوا ماهديت الا لما طلعت من المستشفى ووصلت البيت , وعملت بعدها فحوصات والحمدلله كلها سليمه ولكن كان عندي ارتفاع في هرمون الكورتيزول ووصل 32 والطبيعي من 7 الى 20 وهو صحيح يرتفع بسبب الخوف والقلق والتوتر ولكن المفروض مايوصل قد كذا علماً إني كنت جداً جداً جداً خايف من دخول المستشفى ومن إبرة سحب الدم , وقرأت عن اسباب ارتفاع الكورتيزول وطلع امراض الله يبعدنا عنها يارب ووسوست فيها والى الآن ماعملت فحوصات ثانية عشان اتأكد اكثر ,,

اعتذر على طول القصة ولكن ماتوقع في احد واجه مثلها أو ماعتقد في نوبات هلع زي كذا , مع العلم إن نوبات الهلع تجيني حتى وانا ماخذ الدوا حق القلب وازيد من الجرعه عشان تخف ..
والله يشفينا جميع يارب