نفساني - عرض مشاركة واحدة

12-12-2001, 08:24 PM

احم احم
وخيتي وسن ووخيتي فتو قصدي فاطمه كل سنه وانتو بخير وشهر مبارك عليكن

با النسبه لاابو مروان اظن والله العالم انه مو فاضي ها اليومين ,يتابع حلقات احلى ما طاش بمجهر ومكبر وكاميرا خفيه وبيجينا بعلوم زينه لا تستعجلون عليه خللوه على راحته :)
با النسبه لترطيب الجو
يا خيتي هو الجو نشف حتى ترطبينه؟:)
الاختلاف في وجهات النظر لا يخلف للود قضيه وهذا حوار العقل مع العقل مافيه مجال للزعل ولا للتعصب واللي بيزعل لا يتكلم

ومافيه بعد منتصر ومهزوم انما هي قضيه تناقش واظن يا وخيتي مازلنا في صلب الموضوع ما طلعنا برره ولا تخطينا الحدود
وش رايك تدلين بدلوك وتقولين انتي مع اي راي
تظنين ان طاش حرام؟
تظنين انه تافه؟
تظنين انه ما يستحق المتابعه ولا من وراه الا صرف كهربا وتعب عيون؟
ما كنه فتح عيوننا على بعض الامور؟ما كنه يا وخيتي خلانا نشوف بعض الحقايق المخفيه من زمان؟ما كنه قال شي كثير ما يقولونه الا وهم صاكين شبابيك بيتهم؟:)
.....................
الحين انا قصيرة النظر يا عسا عيونك للعافيه قول امين

الحين انت مصمم ان الاعلام ماله دور؟

اوكي
تعرف عبدة الشيطان؟علمني وشلون طلعوا ها الجماعه؟ووش بعض اساليبهم في نشر دعوتهم؟
تقوللي ان محمد كلاي ومالك وعمر هم اللي فرضوا انفسهم على الاعلام؟
اوكي كلام حلو بس حتى سيدنا نوح فرض نفسه علينا كبشر ويستحق انا ندافع عنه وما نخللي فيلم مثل الفيلم اللي شفته يمر علينا وحنا نضحك الا اذا كنا متبلدين الحس وماتت فينا مشاعر الغيره على دينا وتاريخنا
تقوللي ان طاش يموت الغيره في شبابنا ابشرك اخوي الشباب ماتت الغيره بقلوبهم من زمان ولا تخليني اخرج من حيائي كا امراءه واقول لك وشلون شفتهم بمناظرهم السيئه خارج السعوديه
لا تخليني اقول لك ان كثيرين من اللي ما يشوفون تلفزيون ولا يتابعونه ويقولون انه حرام يعاملون نسائهم كا البهائم والبهيمه محد يغار عليها
لا تخليني اقول لك ان شبابنا تركوا منتزهات الشباب وتجمعوا في الفيصليه واشباهها عشان ايش؟ اظن حتى يحمون بنات ديرتهم من الاذيه؟
وش رايك تتوقع عشان ايش؟
لا تجمع مساويء المجتمع وتعلقها على شماعة طاش
طاش مثل العيادات الخارجيه اللي عليه يحدد موضع الالم ونوعه ثم يرسلك للعيادات المتخصصه وانت وحظك يا لقيت طبيب مخلص بعمله يا لقيت ناس نايمه والا تلعب ............والا ......كمل انت الباقي

اما اني محاميه عن طاش فلا انا مالي علاقه فيهم وصدقني محد دفع لي فلوس :)
كل الموضوع ان من راى منكم منكرا فليغيره .....وكون البعض يعيب في مسلسل وطني الكل صار يتابعه ويعرض على اكثر من محطه اظن لازم احد يرد
وبرد عليكم رغم ضعفي وقلة حيلتي الى ان تعييني الحيله بس هااااااااااااااااااا ترا بااااااااااااااااالي طوووووووووووووويل مره مره