ساليباكس

بيانات اضافيه [ + ]

رقم العضوية : 42396  تاريخ التسجيل :  02 2013  أخر زيارة : 10-03-2013 (09:52 PM)  المشاركات : 27 [ + ]  التقييم :  10

لوني المفضل : Cadetblue

رهابية متشافية بأمر الله

السلام عليكم ورحمة الله وبركاته
يسعدني انضمامي لكم لاشارككم تجربتي ،،،،
موضوعي مو غريب عنكم وحالتي تشبه وضعكم
انا كنت طفلة طبيعية زي باقي الاطفال العب واجتماعية وكل شي ، بس لاحظت في نفسي اني تفكيري اكبر منهم افهم اشياء هما مايفهموها حتى لما اهلي يتكلمو بالالغاز كنت افهم
اول كم سنة بالدراسة كانت عادية جدا وكنت جريئة زيادة يمكن ، الين وصلت لسنة خامس لما طلبت مني المعلمة اوقف للقراءة بدأت اتلعثم ، وهيا استغربت بحكم اني شاطرة وهادي بداية قصتي ... فجأة من غير اي مقدمات ومن يومها بدأت مأساتي اللي كرهت حياتي بسببها

تخرجت من الابتدائي وطول الاجازة وانا يوميا ابكي كيف حروح مدرسة جديدة ... ما اقدر انطق واقول اسمي .. لو ابلة سألتني عن اسمي لازم اتأتي واقول اااا الين اقول اسمي ....

طبعا معاناتي هادي ما احد يدري عنها لاني ما اقدر اقول لاهلي ... علاقتي بأمي عادية وانا ما اقدر افضفض واقول ... وما اعرف اش اقولها ... اقولها ما اعرف اقرأ ... ماراح تفهم .. اصلا انا ما اقدر افتح معاها اي موضوع خاص كيف لما يكون موضوع زي كدا ... يمكن هادي اصعب شي في الموضوع انه امي بعيدة عني وما اقدر اقولها شي ابن ابدن
دخلت المدرسة وبدأت الدراسة ومخاوفي كلها جات بمكانها ... بس النقطة الايجابية اني كنت شاطرة وكانو بعض الابلات يعدولي انه ما اقرأ بس اكيد كانت في احراجات كتير من الابلات والبنات واذا احد طلب منب اقرأ اوقف وارجف واعلق ع الكلمة الين يشفقو عليا ويجلسوني ...

في تاني سنة في المتوسط صار انه ابلة ماتعرفني واجبرتني الا اقرأ ... طبعا ماقرأت ورجعت البيت ابكي وقتها عرفو اهلي ...

طبعا فهمو الموضوع على انه مراهقة وخجل ولا كان في اي ردة فعل ولا اي مساعدة ... زي قولت هادي مراهقة سيبوها .... عشت لوحدي مع معاناتي

الناس اللي حوليننا دايما يشوفوني حزينة فيربطو الموضوع بالمراهقة والمشاعر .. كنت انقهر انتو فين وانا فين اي مراهقة اي خرابيط انا بأتعذب ... حافظة الجواب ما اقدر اقوله
هدا اكتر شي يدمر انه ما احد حاسس فيا لاقريب ولا بعيد

وفي الثانوي تكررت نفس الحكاية مع نفس الفشايل
عاد الجامعة شي تاني .. كل ماكان عندي عرض اجلس ابكي شهر قبلو ... اول كم مرة حاولت وقفت ورجفت وما قدرت اقول شي ... بعدين اخذتها من قاصرها وسرت ما اعرض لو كان عليه 20 درجة كنت اضحي فيها

وقتها كنت رجع البيت وابكي واشكي واهلي لاحياة لمن تنادي ... دايما يقولو ليه ماتقدري ليه غيرك يقدر ... مو مقدرين انه هذا مرض ... مو حاسين فيا

اوجا الوقت الاصعب الاختبارات الشفوية .. نوم ما اقدر انام ... اكل مااكل ... ليله الاختبار انهيار وصياح .. لمحتلهم انه ابغى علاج ... قالو شيخ اكيد عين وطنشوني

كانت سنة سيئة ليا وانا اشوف نظرة الشفقة من البنات والدكاترة ،،، والاستفهامات في عيونهم ...

وقتها كان لازم اوقف وافكر لو ماتعالجت راح اخرج من كلية الطب واجلس في البيت ... جلست افكر سنة كيف اقولهم اني ابغى دكتور وكنت ادعي طبعا في كل صلاة .. اصلا ماعندي هم تاني في الحياة غير الرهاب .

استخرت وكان قتها رمضان وكلمت دكتور وحجزت ... وجيت وواجتهم انا ابغى علاج وانا حجزت كانت صدمة بالنسبة لهم .. وقتها قالو خلاص ناخذك عن شيخ .. قلت اروح رحت وكان الوضع طبيعي ماحسيت باي شي .. وقتها عرفو انه مشكلتي مو عين ولا حسد

وقتها مر علي معاناتي 12 سنة ... 12 سنة من عمري ضاعت

بعد كدا قلتلهم خلاص شيخ ورحت خلاص دحين انا رايحة للدكتور .. الحمد لله ربي اعطاني قوة ماتخيلتها من نفسي ... رحت للدكتور والحمد لله كانت بداية العلاج .. هذا الدكتور اللي ادعيلو كل يوم في حياتي

اخذت الادوية اللي هيا ساليباكس وانديرال عند اللزوم ... طبعا اهلي كانو يشتروها ويدسوها عن اخواني والناس لاني مريضة نفسية بنظرهم ... بدل مايوقفو معايا ويساندوني

عدى كم شهر ونظرات اهلي ليا مريبة كانهم بيطالعو في مختلة عقليا .. وقتها ماهمني ... لانه الادوية بدأت تجيب مفعولها الحمد لله وثقتي بتزيد شوية شوية .. بعد 3 شهور قدمت اول عرض في حياتي او زي ما احب اسميها اول فرحة في حياتي وكان جيد بمعنى وقفت وقدرت افتح فمي واتكلم ... هذا كان بالنسبة ليا انجاز ... لو قلت اسمي وخرجت هذا كفاية بالنسبة ليا
يوم بعد يوم بدأت اقدم ومريت سنتين واخر عرض كان ليا قدام جمهور كبير بحضور العميد ودكاترة ودكتورات وكان من احسن مايكون ..

الحمد لله ... الحمد لله .... الحمد لله ... الحمد لله حمدا كثيرا ... الحمد لله دائما وبدا

في النهاية بس حبيت اقول كم نقطة :
1- الرهاب مرض زي اي مرض ضغط . سكر ، ربو له علاج
2- ما احد يحس بأالمك الا رهابي زيك ... للاسف اهلك مايحسو عشان كدا قرر انك تتعالج وتعتمد على ربنا ثم على نفسك
3- انا مثال لكم وتعالجت الحمد لله وهذا يعني انه الحل مو مستحيل


اتمنى اكون اعطيتكم تجربة تنفعكم ... واي استفسار انا حاضرة ... ودعواتكم ليا انقبل في التخصص اللي ابغاه

المصدر: نفساني