نفساني - عرض مشاركة واحدة

19-11-2003, 10:54 PM

بسم الله الرحمن الرحيم
إلى إختي ترانيم النفس السلام عليكم ورحمة الله و بركاته أما بعد :-

فالقضية التي تطرقت إليها مهمة جدا لما فيها من حالات خطيرة تنتج عنها
أما عن حالة التعدد فالكثير من الناس فاهمين القصة غلط , بس شنسوي الجهل هو مربط الحبل ليش الناس متخلفين ؟
ليش ما عندهم خلفية بالدين ؟
إحنا الحين ما راح نتكلم عن بس الحريم؟
إلي هم راس التخلف , لكن راح نتكلم عن الرجال الذين هم لب المشاكل و عوار الراس ,
المهم ليش تصير هذي المشاكل ؟ و منهو أساس المشكلة ؟
راح تقولون الرجل هم راس الأفعى .
كلامكم صح لكن هم المرأة لها زاوية من المشكله .
لو كان الرجل من أول ما يخطط على الزواج يقول حق زوجته كان ما صار إلي صار , مثال :-
خالتي متزوجة واحد متزوج , لكن الحالة بين الحريم مومثل ما نشوفة في المسلسلات و الأفلام كله متهاوشين و متزاعلين لكن بالعكس ,
إلي خطب خالتي , بتقولون أمة بقولكم لا , إلي خطبها زوجة رجل خالتي
بتقولون شلون ؟
بقولكم إذا كان الرجال متفهم لحالة المرأة بعد ما يتزوج عليها من غير علمها
تكون ردة الفعل أقل ,
زوج خالتي قال لزوجته الأولى إنه راح يتزوج , إذا كانت الزوجة تحب زوجها ما راح ترفض له طلب , لكن لازم تشرط على الزوج إنه يعدل بينهم , على سبيل المثال في الحوار التالي :

الزوج : إم (فلان ) أنا أبي أتزوج
الزوجة : (بهدوء) ليش ؟ عسى ما شر شايف مني أي تقصير ؟
الزوج : لا والله حشا بس أبي أمشي بالحلال
الزوجة : الحمد لله , عبالي العيب مني , على العموم تبيني أخطب لك ؟
الزوج : إيه و الله إذا ما فيها تعب لك
_: حاضر بس على شرط مثل ما يقولون :( إلي أوله شرط آخرة نور )
_: أمري
_: تعدل بينا بكل شيء
_:حاضر و ممنون
__________________________________________________ ____

و بهالحال تمشي الأمور عادية , و أكبر مثال زوجة ريل خالتي الأولى
يوم بالعرس يت و سلمت على خالتي و عطتها هدية و قعدت يمها , و في صباحية خالتي , عطتها هدية ثانية و قالت لها : اليوم إذا ما عندكم مشوار
أنا عازمتكم على الغدا العشا في بيتي .

شفتوا المرة السنعة , لا موبس كذا ألحين خالتي عندها بنت وولد
كل يوم الزوجة الأولى تاخذ اليهال و تخلي خالتي تاخذ راحتها في بيتها و ما تشوفون شلون هي تحب عيال خالتي أكثر من عيالها كل يوم تاخذ بنت خالتي بمشوار و تشتري لها ملابس و أغراض لدرجة إنها شرت لها حمام سباحة لأنها تعرف أن بنت خالتي تحب تلعب بالماي مثل اليهال .

لكن اللي يدور في راسكم إن أكيد موكل الحريم مثل هالمرأة و مو كل مرة تسلم الجرة .

و إن ردة فعل الزوجة إذا درت إن زوجها تزوج عليها و خاصة من ناس برة
تكون كبيرة و أكيد بتقول : شلون هانت عليه العشرة الطويلة ؟

بعد في مثال ثاني ( أدري إني طولتها , بس شسوي أحب القرقة )
المهم, جارتنا زوجها تزوج عليها وحدة كبر عيالها و المصيبة إنها درت من وحدة معاها في الشغل , ما تدرون شصار فيها , حاشتها جلطة في المخ و حالتها ماترضي حتى العدو مسكينة , بس ما سوت مثل ما يسوي البعض تطلب الطلاق و تخلي عيالها إللي في سن المراهقة للشارع , قولوا شسوت ؟

قالت حق زوجها يسكن مرته الثانية عندها في البيت , ( أكيد إللي يدور في راسكم إنها راح تطقها و تعفر فيها مثل ما يسوي البعض ) لكن قالت بدام إنها كبر عيالي خليني أعاملها مثلهم , كل يوم تطبخ لها و كل ما تشتري حق عيالها شي شرت لها و قامت تعاملها بهالطريقة و عمرها ما صرخت عليها
و آخر شيء قولوا شصار ؟

الريال طلق الزوجة الثانية ( الصغيرة) و خلى الأولية بعذ ر أنها ما عورت راسه بالصراخ مثل الصغير و بالطلباتها إللي مثل اليهال .

و النهاية و الختام . أقول إن لازم المرأة تحترم الرجال حتى وبعد زواجه عليها , وتخليه يندم على الساعة إللي فكر فيها بالزواج , و على الرجال إنه يشاور زوجته إذا كان بتزوج مرة ثانية و بهدوء و بدون عصبية .

و مشكورين على قرآءتكم لقرقتي إلى ما لها اول و لا تالي .

و السلام عليكم ورحمة الله وبركاته