الحياه رخيصه

بيانات اضافيه [ + ]

رقم العضوية : 37532  تاريخ التسجيل :  02 2012  أخر زيارة : 18-02-2014 (05:22 AM)  المشاركات : 35 [ + ]  التقييم :  10

لوني المفضل : Cadetblue

باكتب حالتي بشكل مختصر لعلها تفيدك

حاله الهلع جتني بدون سابق انذار كنت في سياره وفي خط رجعه للرياض كذى حسيت شي يمشي بجسمي وخفقان ودوخه وكتمه
وصلت للرياض ووصلت للبيت ريحت وقمت اليوم الثاني وش زيني
حسبتها في البدايه تعب وقلت راح
بعد ثلاث ايام بدت ترجع لي حاله الدوخه لكن اخف واستمرت معي ولا القيت لها بال على اساس انها حاله دوخه عاديه تمر على الانسان من فتره لفتره
مره كنت رايح لمهمه عمل وانا راجع للرياض حسيت بنفس الاحساس الي جاني اول مره وانا راجع لكن كنت لحالي وخفت واشتدت الدوخه والخفقان واحس بجسمي بااااارد وقفت في محطه وشريت شراب شتويه ولبستها وسبحان الله من نزلت البقاله والخفقان راح ولبست الشراب ووقفت غسلت وجهي وصارت فيني الدوخه بس وقلت امرها سهل كملت خطي وشوي بدت ترجع لي الحاله خفقان وكتمه الله لا يوريك وكنت احس روحي بتطلع لين باقي على الرياض 100 كيلو قمت زدت السرعه باقصى شي وانا القط انفاسي لين وصلت للرياض ووقفت عند اول مستشفى وانا في حاله مثل المصروع ونزلت المستشفى ووصلت للاستقبال وكان قدامي وحد يخلص اوراقه شوي حسيت اني طبيعي ويوم جاء دوري تسالني الموظفه وش عندك قلت لا خلاص وطلعت ريحت في الكراسي في الاسعاف شوي وغسلت وجهي وارتحت ورحت لسيارتي وكملت مسيرتي للبيت

من بعدها وانا اعيش في دوخه واحس بالعالم قدامي مثل السراب .. استمرت الحاله وكنت امارس حياتي دون الطبيعي لاني اشعر بالدوخه وكل مالها تزيد الى ان تطور الامر وصرت ما اقدر امسك نفسي من الدوخه اشعر بحاله التقيئ كل شوي وقلت لعل الامر فيه مس او عين وصرت اقراء عند مشايخ والحاله تزيد يوم عن يوم الى ان وصلت لدرجه اني مجرد ما اطلع من البيت تجيني حاله الخفقان وصرت حبيس البيت ورفعت اوراق استقالتي من العمل ويأست من الحياه حتى اني عرضت على زوجتي الطلاق لكنها رفضت وتصبرت الله يجزاها خير كانت تبي تساعدني باي وسيله

وطبعا كلمني المدير وشرحت له حالتي قال انت في اجازه مفتوحه لين تخف الله يعطيه لعافيه .. استمريت حوالي السنه على هالحال وكانو اخويائي دايم يتصلون علي ويسالون وانا مطنش العالم الى ان اصر واحد من اخويائي انه يقابلني وكلم اهلي واستطاع مقابلتي وشرحت له حالتي ودعاء لي بعدها بكم يوم اتصل علي قال لازم تروح دكتور نفسي انا في البدايه عارضت وحلف على اني اروح قلت مااقدر اطلع من البيت خفقان وخاف اموت قال عندي حبوب تنظم دقات القلب ومستحيل يصير لك شي وعطاني حبوب اندرال وفعلا كانت ممتازه واستطعت الخروج من البيت والتوجه للدكتور النفسي

دخلت على الدكتوروشرحت له حالتي قال عندك حاله هلع وكتب لي اقراص باروكسات واصر اني ارجع للدوام وقال اذا جتك الحاله وانت في السياره انزل منها فورا وراح تشوف انها راحت دقات القلب وفعلا لمااسترجعت بالذاكره لما جتني الحاله اول مره ونزلت البقاله راحت دقات القلب وقال لا مانع انك تاكل حبوب اندال

بعد استخدام الادويه باسبوع بديت الاحظ تحسن واقل من شهرالى راحت الدوخه وبديت ارجع طبيعي ورجعت لحياتي العمليه والاسريه ورجعت طبيعي مثل اول

الان بعد سنه وشهرين من استخدام العلاج اشعر اني طبيعي لكن انا منزل الجرعه نص حبه كل اربع ايام واحس اني اصدع في اليوم الرابع

شرحت لك بشكل سريع لان التفاصيل اكثر ولعل كلامي يفيدك بشي والله يوفقكم في حياتكم العمليه

واذا سنحت لي الفرصه للدخول عقبت زياده في الموضوع